杨千嬅“生女”了！佢主创嘅全新IP“Am'miri”全球首个限定快闪店，昨日（5月15日）清晨于深圳湾万象城静静鸡“出世”。千嬅笑住话：“我等咗咁多年，终于生咗个女，Torres有个妹啦！哈哈！”

不过呢次“生女”过程一啲都唔简单。本来活动安排喺下午举行，点知千嬅去到深圳后，活动场地收风大批歌迷及市民准备围观，担心人潮太汹涌难控，临时被要求改到早上八点半开始。千嬅笑话：“结果我系前一晚要凌晨五点半就起身化妆梳头，真系生仔都冇咁早起身，哈哈......不过当年生仔，都系一早入医院准备，所以成朝都有一个准备生个女嘅心情！”

呢位“囡囡”Am'miri，原来系老公丁子高Idea。千嬅透露：“其实成件事系丁生嘅idea，希望可以同大家分享生活理念。最终就一齐合作，做咗Am’miri出嚟，足足搞咗3年，今日面世真系好开心。”而呢个拥有淡紫色头发、精灵耳同纯白翅膀嘅天使BB，象征每个人内心嘅小朋友，温柔守护初心。千嬅话：“希望Am'miri总会喺你最需要嘅时候出现，用温柔治愈你。”

开幕活动中，千嬅分享了“囡囡”嘅五大情绪特质——陪伴、爱、接纳、包容、勇气，而她个人就特别钟意“勇气”：“心口最紧要有个‘勇’字，跌都唔使怕！”

讲到最爱嘅公仔，千嬅近年钟情玩偶，“依家多咗个自己亲生女，如果可以出毛公仔，第日就可以揽住个女瞓觉，哈哈！”

今次快闪店免费入场，至5月27日，同步为千嬅5月23至24日深圳“春茧”演唱会热身。下午抢购粉丝人潮淘汹涌：歌迷话“见到千嬅歌里面一直存在嘅温柔人格变成真嘅，特别开心，一定要拥有！”千嬅就话：“其实冇谂过话要做到个公仔几劲几多人钟意，只系想同歌迷朋友一齐开心分享。”