在邱礼涛自编、自导、自资的电影《我们不是什么》中，李蕙敏（Amanda）的惊艳现身成为了戏中一大亮点。她将一个长年沉沦毒海、饱受丈夫家暴、纵容对方性侵儿子的边缘母亲演得维肖维妙，凭短短两幕戏被网民一致推举为“MVP”。戏中的她命途多舛，然而现实中，李蕙敏的童年同样伤痕累累，儿时被母亲长年打骂否定，使她缺爱也自尊心低落，为了做艺人她不得不离家，否则她根本没办法自信地站在观众眼前；直至21岁那年，Amanda被养父告知身世，方知自己原来并非亲生，而是养女。这个秘密无损她与养父的感情，然而对养母，她则用了大半生时间去释怀。岁月流转，当养父离世、养母步入风烛残年之际，Amanda选择照顾断联多年的养母终老，表示：“我有同我自己讲过我原谅佢㗎。”究竟她如何做到如此大爱宽恕？
发型：Eddi So @ headquarters salon
鸣谢 : Golden Scene

若想收睇访问足本片段，18:30请留意《香港01》YouTube频道。

《我们不是什么》道友角色发挥多 获封MVP

近年少有大银幕作品的李蕙敏，一出手便凭《我们不是什么》中的“晖仔妈咪”一角惊艳观众，更有不少网民扬言要推举这位“MVP”角逐来年奖项，面对突如其来的赞誉，Amanda显得既惊喜又感激：“首先我问人咩叫MVP呀？后来系知道咗嘅。”她感谢网民和观众好评，指对她而言意义重大，“我都同导演都系咁讲，一个演员呢，我哋拍过好多戏，有唔同嘅角色，你话有发挥嘅呢，都唔系一定去到你、来临喺你身上，呢个角色我觉得系好好嘅发挥嘅。导演最初都系咁讲，佢话‘戏唔多，但系好好发挥嘅。’”

有别于过往不少电影要现场“飞纸仔”，今次Amanda收到完整剧本，能好好做功课，更重要的是Keep fit：“有啲赶嘅，我记得当时接完之后，死啦，仲有两三个礼拜，我又要运动，又要keep吓，因为你话晒做吸毒者，𠮶阵时我又喺旅行紧，因为小朋友暑假，咁我就要同佢去旅行啦，我旅行就同自己讲‘唔好食咁多嘢，唔好食咁多嘢！’我拍完依两场，开心咗好耐，我喺度谂‘哎呀，我真系好钟意呀！’呢个角色系我觉得有发挥，然后成组人𠮶个气氛系好好。”

Amanda在戏中饰演道友，神似度高到让人拜服，笔者尤其记得她被警察谭耀文问话的一幕，对于要如何揣摩此角色，她说除了小时候有亲眼见过道友甚为震撼外，就要靠做资料搜集：“呢个角色呢，多面就系一，最基本，佢系一个瘾君子，呢一part你要做得好、做得似；另一part就系佢系一个妈妈，而佢系一个咁嘅年青人嘅妈妈，然后佢嘅家庭背景发生呢啲事啦，佢亦都系一个俾人家暴嘅女人啦，咁所以你谂吓，呢一拃嘢喺呢个角色里面就系好复杂，你点样喺短短嘅时间呈现呢？我都有对镜练㗎喺屋企，跟住又做research，睇好多片，睇好多资料，我有问导演：‘其实你估系咩毒品呢？’佢confirm我就会更安心咁去做功课。”

大赞AK有礼貌识接戏 睇好其星途

不少年轻一代或许只知道李蕙敏是歌手，却忽略了她早在1998年就凭电影《9413》入围香港电影金像奖“最佳女配角”提名，同年更凭电影《高度戒备》角逐亚太影展“最佳女主角”殊荣，演技早获业界肯定。这次有一个全新的机会被新一代观众看见，又能与当时得令的偶像江𤒹生（AK）饰演母子，二人擦出了意想不到的火花。

Amanda对AK赞口不绝：“我几欣赏呢个男仔，我反而系呢一段时间宣传先至比较了解佢，我知佢系MIRROR啦of course，但系我觉得佢有啲倔强嘅气质嘅，同埋听佢言行举止，佢喺佢年纪嚟讲都算成熟吖。我睇到佢有一股……又系有勇往直前𠮶种努力嘅气质，所以我觉得佢前途会好好。”

她忆述二人只得一场茶餐厅戏同场，但试造型阶段有见过，当时已觉得AK十分有礼貌，对戏时AK表现更让她喜出望外：“𠮶场戏，其实我哋唔系好多个take咋，一埋位，我哋试啦，大家个眼神接触，因为始终系母子，我希望我有个交流畀佢，咁我发现‘咦？佢都有㖞！叻㖞！’我知佢都有拍过电影嘅，但系就可能唔系好多啦，但我觉得，咦？佢有㖞，有嘢㖞，眼神，入到个角色，我觉得真系叻呀而家啲演员，我哋细个系战战兢兢㗎嘛，同埋见到导演呢，有时有啲问题我都喺度谂‘问唔问好呢？问呢个问题会唔会觉得好蠢呢？’”

《97家有喜事》 Man爆金毛玲成经典

翻开李蕙敏的电影资历，其丰富程度绝不亚于音乐作品，她透露自己拍了60多套戏，当中最让观众记得的，当然是《97家有喜事》的“尖东车神金毛玲”啦！问到当初为何有这个角色，她说：“我个人估计啦，我冇问过百鸣哥，因为第一套《家有囍事》呢，咪有Mo姐（毛舜筠）嘅？其实佢嘅pattern有啲似嘅，Mo姐咪对Leslie、哥哥嘅，我估佢又想有一个类似无双表姐个角色，又系man man 地嘅女仔，跟住我就咦，好有趣㖞，好玩㖞！”不过她就很怕被观众觉得她模仿无双表姐，于是她都花了不少工夫去建构角色，也要想方法与周星驰有所交流，“同埋我都钟意睇周星驰呀嘛，咁我直程喺度谂，佢都好犀利㗎嘛，你要对佢㖞，你要谂个方法系……都要对到，咁先得。”

《高度戒备》、《9413》获提名影后 赞吴镇宇执导有性格

除了《97家有喜事》外，Amanda与吴镇宇在《高度戒备》、《9413》等多次合作，其中后者更是由吴镇宇执导。先讲《高度戒备》，当时她首次拍摄林岭东导演的戏，“我听讲佢都好犀利，同埋会闹人啦。”Amanda直言用菲林拍戏每秒钟都是烧钱，而且一个人NG就会连累其他台前幕后要重来，所以自己理解导演为何闹人，在片场亦打醒十二分精神，最终出来效果不错，她完全被被骂：“冇呀！我直头觉得自己好似攞到‘白兔仔’呀！”她不但因而获得亚洲电影节“最佳女主角”提名，林岭东导演还将她引荐于另一导演南燕，Amanda一直渴望再与林岭东合作，可惜对方已离世。

至于《9413》，Amanda就评价吴镇宇导演：“我觉得镇宇都系一个好知道自己想点嘅导演啦，得意嘅，我觉得呢套戏系另类嘅，真系有啲cult 片嘅feel，我估佢一系好钟意北野武啦。镇宇佢好有性格㗎，但系又几好笑嘅有时，佢轻松嘅时候有几幽默，但系佢认真嘅时候又好认真啰，佢有佢自己好强烈嘅一套理念。”

拍《阴阳路》不觉降格 乐于与年轻新班底合作

除了这几套经典，Amanda当年其实也拍了好几辑《阴阳路》。在歌唱事业原来跻身天后之列，顶峰过后去接拍《阴阳路》这里低成本恐怖小品，看来有点自贬身价。然而对她而言，演员的尊严从不在于制作的大小，她反而只想多尝试、争取多储经验，挑战各类角色让自己进步：“知道啲镜位，知道灯光，自己feel到啲灯喺边度，其实都系一步一步咁进步啰。我觉得唔紧要㗎，最紧要你喺你𠮶个范围发挥到，自己做到最好，如果出到嚟就梗系更好啦。”

近年她更不计酬劳，参演新晋导演的微电影《丝丝》，只为与新世代同行，她表示因为当时未拍过微电影，觉得有新鲜感，自己亦想支持新进导演：“唔好话净系导演，我觉得人同人之间，我识一个新嘅朋友，我都会谂，会唔会喺人哋身上学到一啲嘢呢？我觉得喺人生里面都好重要，你唔好太过封闭自己，要接受多啲新嘅事物，新嘅人，咁你先至会与时并进。”

与其说是与新世代同行，倒不如说她长期都与小众同行，参与推动LGBT的活动，她说：“我觉得人系需要有多啲嘅同理心啦，唔系话冇，当然有好多人都有，但系我觉得人越大呢，我越觉得与人为善系一个基本，同埋互相尊重唔同嘅人。我觉得每个人都唔同嘅，你唔好要求人哋同你系一样啰，呢个系我嘅谂法，所以我会有好多嘅嘢我会……人哋估唔到我会做嘅嘢，我会做啰。”

21岁得悉养女身份 仍装冷静安抚养父

在《我们不是什么》中，Amanda的角色活在窒息的家暴阴霾中，只能靠毒品麻醉自己。现实中，她自小亦承受著养母的言语暴力及打骂，会瘀又会损，问到通常因何事被打得最劲，她回答：“冇咩事㗎，你知女人其实心情唔好起上嚟就……系呀。”而作为小朋友的她，每次被打之后，也只得叫自己尽快忘记。

入行后不久，约19、20岁的时间，Amanda决心逃离家里，搬出去住，跟养母断联多年，她解释：“因为我觉得如果我一路同佢咁样继续联络、来往，我做唔到呢行，因为我需要好多嘅自信，我企喺个台度，我要好自信，我每一个工作都要表现有自信，如果唔系我觉得我做唔到依行。”

而21岁，与Amanda感情甚好的养父，突然告知她原来她并非亲生，是养女，“佢话觉得你大个喇，我而家要话畀你听。”震惊固然是一定的，但坦白说，Amanda不觉得太意外：“因为你知小朋友个Instinct（直觉）好犀利，我细个已经觉得我同你哋又唔系好似样㖞，然后我好似觉得我同屋企人啲性格又唔系好似㖞，咁点解㗎呢？但系其实𠮶一刻系……有一啲震撼嘅，但系我好快就……因为我同我爹哋两个咋嘛𠮶个情景，咁我就同自己讲‘唔好呀，唔好有太大反应！’因为我都想佢都觉得comfortable，跟住我即刻话‘其实唔紧要吖，你都系我爸爸。’”因此，她在事件后对养父母的态度也一如既往：“我更加唔想佢哋觉得我有唔同。”

曾被养母打击自信 仍选择原谅照顾终老

古语有云“打在儿身，痛在母心”，Amanda过往常常被母亲打，会否就因为她并不是亲生呢？她坦言这个推断是合理的，她也曾这样想，但最后又不再这样想：“复杂啲讲，如果你话心理学上呢，我觉得我都系拒绝相信系因为咁嘅。”打骂小朋友，伤害不独于皮肉之苦，而是伤害了其内在小孩、影响其价值观、个性等等，更甚者可以摧毁一个小孩的自我价值。Amanda自搬走后与养母断联多年，原以为二人老死不相往来，她却在养父过世后，重新修补与养母的关系：“我爸爸走咗，跟住我妈妈好多病，我特登搬返近啲可以同佢去吓医院呀，成日照应到。咁我就更加透彻发现，其实我唔会再谂佢以前系……𠮶一啲我唔开心嘅记忆，或者佢其实系特登，定系因为我唔系亲生，我冇谂呢啲㗎喇。我真系纯粹觉得，尤其是我自己开始有小朋友啦，我觉得照顾小朋友都实在唔容易，然后我又谂返当时就系，佢年纪大，一个独居老人，我就系尽量想照顾到佢百年归老，咁㗎咋。”

问到要如何令自己释怀，宽恕这个终日否定自己的大人，Amanda说：“我有同我自己讲过我原谅佢㗎，其实讲真，当你见到有个老人家，尤其是佢另一半走咗，除咗望到佢，带佢睇医生、入医院、做手术𠮶啲，你开始发现呢，人嘅生命系好脆弱，同埋你睇到隔篱床啲老人家，有啲系我觉得好sad呀，跟住我同自己讲，系㖞，其实人就系咁㗎喇，一个几叻嘅人，你做过乜，喺你壮年、年少嘅时候，最后可能都系差唔多㗎咋。你失智嘅就失智，病嘅就系病，感觉终点大家唔同，但系，又可以话系一样。”

如果可以选择，Amanda到底会宁愿永远不知道这个血缘秘密，抑或无论如何都想知道真相呢？她直言一定想知真相，至于用了多久才能消化这个晴天霹雳的消息，Amanda说“冇几耐”，但不讳言曾想过追寻生父母下落，只是后来打消了念头而已：“有谂过要去追寻嘅，但系我当时又有啲䒐䒏佢哋，哦，咁你都唔要我，唔紧要啦！有乜所谓啫？”

孩子冧爆言论 弥补过往失去亲情

身世的缺口，并未阻碍她建立家庭的渴望，一直恨要小朋友的她，几年前她终于遇上了养子，如今拥有一个爱意满满的家庭。小朋友到来前，她幻想他会很乖、很听话，老是“妈咪！妈咪！”地叫，结果儿子有时都难免有“马骝猪”的一面，周围跑唔停、叫他执拾也要叫几次：“因为我从来都唔系讲嘢好大声嘅，但系当你有个小朋友，你唔大声你系叫唔到佢返嚟！呢啲时候你就要大声，必要时都要㗎，因为男仔尤其是，等佢有返一啲纪律啰，唔可以㗎嘛。”

不过囝囝也会有很乖、很黏人、很嗲的一面，令Amanda明白何谓“前世情人”：“小朋友又好sweet嘅，佢又会‘你喺边呀？挂住你呀！你几时返嚟？’好得意，好可爱。”过往Amanda在原生家庭缺乏爱，那么现时与老公和儿子的家庭，会否能弥补过往的伤口，让她重新感到爱呢？Amanda说：“我谂都系㗎喇，起码我叫做complete咗呢个家庭啰，我觉得系㗎喇，唔系，我反而觉得系重新……好似一个next life，脱离咗我以前小朋友𠮶个圈，变咗我自己一个圈。”

由心说起——拒认“争啲运”　逆境中自我打气

在娱乐圈沉浮多年，实力有目共睹的李蕙敏，总会被部分媒体贴上“争啲运”的标签，个人觉得这并非负面，因为说出这句话的人，想必是相信Amanda的实力，才会替她不值，遗憾她未能站上更高峰。面对这些带著惋惜的赞许，她说：“好多人都系嘅，唔系净系我嘅，啲人系好钟意讲㗎，我唔知点解啦，唔知点解有啲记者朋友好钟意将我摆落呢个位，其实，我又冇㗎啦，我冇呢啲谂法。”

最后，记者请她分享一下自己的人生哲学，以过来人身份鼓励一下那些正在自我怀疑的人，她说：“我有㗎，我有啲座右铭提自己，好辛苦嘅时候我就‘吃得苦中苦方，为人上人！’真系好老土，但系真系有啲用，你自我加油，同埋好老实啦，个赛跑都未完，点知边个赢啫？系咪？”