今日（5月18日）是Twins成军25周年的大日子，蔡卓妍（阿Sa）及钟欣潼（阿娇）前一日早预告今日会开live，两位亦在直播中读出网民问题，而歌迷最关心的焦点就是讲了很多年的Side track演唱会，Twins表示好想好想，但就不想在大场地搞，属意5000人左右的场地举行，更问：“红馆会唔会太大呀？”、“Side track唔系唱大路歌，可能冇咁多人想睇。”

喊话好想开Side track演唱会：开唔开唔系我哋决定

直播中率先有Fans关心Twins会不会开25周年演唱会，早前参与完《25+英皇群星演唱会》的阿娇说：“冇㖞，啱啱我哋咪开咗25周年演唱会啰，你冇睇咩？”当fans追问会否举行Side track演唱会，阿Sa即说：“好想呀！真系好想呀！”阿娇续说：“我喺马天佑条片话十划都未有一撇，跟住啲人话‘下？十划都未有一撇？讲咗十年喇㖞。”阿Sa笑言：“唔系，有一撇呀，咪就系我哋想啰。”指不知今年能否成事，有fans叫她们别再开空头支票，阿Sa就表示：“唔关我哋事，我哋想，开唔开都唔系我哋决定㗎嘛。”

不懂分辨何谓Side track　歌迷即留言点歌

Twins之后讨论其实不知哪首歌算side track，阿Sa说：“我净系知《下一站天后》唔系side track 啰，《明爱暗恋补习社》唔系side track啰。（阿娇：系咪演唱会唱过都唔算side track㗎喇？）应该系冇乜人识𠮶啲。（阿娇：咁冇乜人识嘅时候，唱嚟做乜呢？）因为佢哋识吖嘛。（阿娇：但系我唔识，唔记得晒。）”不过歌迷就立即在留言区点歌，例如：《绑架》、《咖啡迷》、《香港纽约》、《哥哥》、《飞线》，而阿娇就自爆很想唱她跟关智斌（Kenny）的《良心发现》，问大家如果再跟Kenny组“新Twins”OK与否，有fans就表明不想他们再唱《死性不改》，阿娇就回应：“你唔知《死性不改》嘅威力，同埋你唔知我哋抢过嚟。”

宁舍大场选5千人细场　阿Sa：唔系唱大路歌可能无咁多人想睇

及后Twins在思考有什么适合场地，明言不想在大场搞，因为当有fans提到红馆时，阿Sa：“红馆做side track会唔会太大呀？”、阿娇：“红馆做side track 你个expectation就会提升，跟住又要排舞，又一堆衫，压力又大。”阿Sa希望在简单小型的场地开side track演唱会，形式像今年初的《TWINS 25周年1314新春限定粉丝见面会》，之后讲到伊馆、会展、麦花臣、启德体艺会等场地，阿Sa表示：“始终side track唔系唱大路歌，可能无咁多人想睇……有无啲譬如5000人以内嘅场呢？”虽然暂未有定案，不过当有人睇到亚博时，阿Sa也讲出不少fans的心声：“好远呀！”