艺人岑珈其今日（21日）带同儿子臻臻一同现身汽车品牌活动。他透露儿子以前也曾到过他的工作现场探班，但父子这样正式出席活动算是第一次，所以别具意义。

岑珈其爆儿子同是“车迷”

珈其受访时透露，儿子跟他一样很喜欢车，所以知道有得跟爸爸出席新车发布时，即刻很兴奋。问到臻臻以往的探班经历，珈其回忆起儿子的第一次探班，是他拍摄《胶战》的时候，因为碰巧在屋企附近。问臻臻最喜欢“6胶”中哪一位成员？珈其透露是Hillary（刘沛蘅），“以前臻臻仲细个嘅时候，Hillary抱佢，佢就会好黐佢。而家佢大个咗，就会一齐玩、倾偈。上一次我哋聚会嘅时候，大家都觉得臻臻大个咗好多，一齐玩得好开心。”

问到臻臻对幕前演出可感兴趣？珈其直言暂时还不知道：“我真系唔知，我觉得佢应该怕羞，好似叫佢影相，佢都会好惊咁，我估佢唔系好识，但亦都唔抗拒，不过我都随缘，唔会逼佢。”

《IT狗 2.0》玩转“多元宇宙”考演技

《IT狗 2.0》日前大结局，珈其透露儿子也是忠实观众，成日会问“爸爸，点解会咁样嘅？点解会咁样嘅？”，“我好记得有一场戏，咁啱我同佢睇𠮶集，就系黄又南客串FBI嚟捉小龙（凌文龙），我同又南有一场对手戏，佢就问我：‘爸爸，佢支枪系咪真㗎？佢系咪会嚟捉你啊？’我话唔系，爸爸系演戏。佢真系会了解个剧情，好得意。”

而在剧中玩转“多元宇宙”的珈其，透露儿子看得很投入，问他是否有四个爸爸，而对珈其而言也是演技大考验，“我记得𠮶时睇剧本最深刻就系呢一场，我问导演真定假，真系要咁拍？导演话你信我，一定会好爆。虽然拍嘅时候好难，要在同一时间，拍完一个角色就要立刻换妆，在同一个位再拍第二个角色，好考牌，但出到嚟效果好好，好有满足感。”

盼原班人马合作贺岁片

谈到大结局的剧情，不少观众都觉得剧本已经被“写死”了。珈其就卖关子笑言：“听返嚟嘅讲法就系无人知，你无得预计。但我觉得结局几好，睇落去好似一个Happy Ending，但又系一个Open Ending。我自己偏向当然想Happy Ending喇，希望大团圆结局。我最感动系见到网民话第二季可以承接第一季嘅气势。”

不少演员表示看大结局时都看到眼湿湿，珈其透露：“有少少感动，因为我哋系成班人一齐喺戏院睇，好难得。（边个喊得最犀利？）好似系Yoshi（余逸思），佢话自己攞定纸巾。”

珈其坦言渴望原班人马再合作，“好想啊！我哋𠮶晚Live完之后已经即刻倾，但导演都话好多嘢要睇大家一齐夹。希望真系可以原班人马，无论系再做《IT狗》相关嘅舞台剧、电影，咩都好，甚至乎可能原班人马再拍其他电视剧我都好想。哪怕唔系《IT狗3》，起码我哋呢班人可以再开第二个话题再做，我哋都会好开心。导演之前都有讲过，话其实拍贺岁片都OK，我哋都好期待，我都叫佢好快啲写（剧本）喇！”

渴望《胶战》合体

另外，问到《胶战》何时“回归”？珈其则大叹一口气笑道：“呢个真系好难讲！我哋都好愿意想继续发生呢件事，但好多嘢永远都唔系我哋一班人可以决定到，所有嘢都要睇大家配合，不论系我哋六个人嘅时间，又或者ViuTV佢哋嘅部署，所有嘢都要安排。所以我哋都希望仍然会有，但就真系未有一个实际嘅消息，希望快啲有！”