老戏骨卢宛茵去年离开TVB，现时是自由身演员，近日她接受方健仪网台节目《女人方言》访问时，就分享自己对行业已心灰意冷，以及曾被监制误解“𢱑show”及遭导演针对的故事，她指自己拍最后一套剧时，被导演“系又闹唔系又闹”，她忍足一星期，自言“百忍成金”，更一度想辞演。

无惧成“御用阿妈” 狠批时下新人态度欠佳

卢宛茵很年轻时已要演少奶、母亲角色，但她并不介意，哪怕成为“御用阿妈”，演过逾70个阿妈角色，她也一样欣然接受：“因为我系实力派，我唔系花瓶，总之你有戏俾我做，我就好钟意，所以我咪攞专业大奖。”不过她在访问中，就不讳言对现今行业生态感到心灰意冷，先批评现时入行门槛低，有人拍拍广告、唱唱歌又可以走来拍剧，没有受过专业训练，又说：“有啲学坏晒，譬如我同你做紧戏，佢诈谛喺后面彳亍（音：chit-churt）咁转，影到佢，佢咪有show，我觉得呢啲咩态度呢？破坏晒人哋𠮶套戏！”她直言：“如果一路咁有咩好做？做戏最紧要个cast，你嘅对手，有啲不知所谓嘅，做嚟做咩？”

心淡拒绝再做衰人教后辈 叹有导演如“鹌鹑”欠威严

卢宛茵被问是否对这行心淡，也毫不掩饰地说是，续说：“真㗎，譬如你一睇个cast，呢班老戏骨㖞，或者好嘢，有演技，你就会好乐意好开心去演。如果你一睇，冇角色嘅？我讲我啫，我就觉得冇乜意思。”当方健仪问到年轻一代中有否可造之材，她直认：“而家好难。”她试过畀建议某位年轻演员，告诉对方哪里做错了，对方却回应：“得喇，你由我自己。”因此她决定以后都不会出声。她忆述自己年轻时根本不会这样：“梁天做导演，佢就嗌落嚟，话我‘唔系咁做㗎！你要乜乜乜！’𠮶时我哋真系好惊，‘哦？原来唔系咁。’而家都冇咗呢啲，而家有啲演员教埋个导演架机摆边呀！哗，我睇到真系侧目，仲有，啲导演又好似鹌鹑咁，你应该有啲威严，但个导演就‘哦哦哦’，咁点会好吖啲嘢？”

礼貌向监制打招呼　竟遭误解“𢱑Show”

方健仪问会否是Madam Lo的气场太劲，她认为不是，并谓：“有啲唔听你讲咪唔听你讲，所以试过有监制，佢话乜乜乜有几个新人，你醒吓佢哋，或者教佢啲咩，我话‘唔好！咪搞！我唔做衰人！’个监制话‘你咁都唔帮我？’我话唔好啦，盏人哋憎咗我。”之后卢宛茵分享自己现时仍希望有机会遇上一位好导演、好剧本，能像叶德娴遇上《桃姐》那样，她又渴望演出一人分析两角的角色，例如《Strange Case of Dr Jekyll and Mr Hyde》，被问可曾试过主动向监制自荐，卢宛茵即爆料：“我试过某一个监制嘅戏，拍完㗎喇，有一次我上公司攞剧本，经过佢间房，我同佢打招呼，‘喂，同你打个招呼，我啱啱攞剧本。’佢话‘你系咪唔够show？你要嚟𢱑Show？’我走都走唔切！啲人啲思想点解会咁㗎？好奇怪，我话唔好搞，可能有第二啲人真系咁，真系走去话唔够show，去𢱑，我唔系吖嘛！我纯粹系一个礼貌，同你打个招呼，打个招呼啫，使乜𢱑？你揾我就揾，唔揾就罢！”

惨遭导演针对狂闹 澄清非离巢导火线仍感恩无线

Madam Lo再分享多一个不愉快事件，自爆“忍到百忍成金”，她指那时在TVB后段拍的一套剧，尚未出街，忍了足足一星期，原来是被导演针对：“我忍到我心谂，你闹演员都唔好揾我嚟闹啦！后尾我同啲人讲，啲人话‘梗系揾你嚟闹啦，你系老嘢，你冇用㗎喇，唔通闹啲主角呀？’”如果自己做得不好，她必定会接受，但她认为当时导演根本“系又闹唔系又闹”：“闹到佢自己都……我驳返佢，佢话‘总言之就乜啦’咁我已经知嘥气，我𠮶时真系好嬲。我本来想唔拍，我同监制讲我唔拍，我做咩事要受佢气，受𠮶个导演气。”不过她否认这是离开TVB的导火线，透露与TVB保持良好关系，间中TVB亦找她演出，表示：“我都好感激无线，当年我供书教学供我啲仔女，我真系好感激，有份工俾我，唔系我点供？唔系我点供啲仔女英国读书？”