男团“SURFIVE”由冼靖峰（Archie）、余宗遥（DEZ）、黄奕斌（Hugo）、黄星绰（Hugo）及文佐匡（Sean）组成，5人早在节目《亚洲超星团》就认识默契十足，跳、唱、rap全无难度。SURFIVE推出第一首主打歌《POPSTAR》，MV邀请到IdG Bubbles偶像女生成员庄嘉咏（Anesa）担任女主角，演绎各个又甜蜜又斗气的场口，令整个拍摄过程都充满欢笑声。

Archie表示参与男团与自己个人演出感觉很不同，要放低自己很多想法配合整个团体的节奏与风格，提到要跳舞他笑言：“跳舞直头系我盲点添啊！唯有练多啲去补飞。不过我相信自己一直以嚟嘅训练，相信自己有进步，加上今次齐人排舞时间唔多，都系得两次，比著系以前嘅我一定唔咁短时间练好。”被问到与女主角Anesa的合作，他笑言：“我数过原来我系SURFIVE入面最老𠮶个啰！（27岁）我都大佢几年㗎，不过应该都冇咩代沟嘅。”

细Hugo黄星绰与Anesa有个镜头要近距离对望，在场成员睇到“哗哗声”，他扮傻说：“我都唔知咩事㖞，咩哗哗声呀？借位嚟啫，我哋都有隔5、6只手指距离㗎！”（5、6只手指距离咋㖞？）他说：“令我有心跳加速嘅感觉，好惊佢啲fans打我呀！多谢导演用心良苦俾呢个机会我，哈哈！”Anesa被问到感觉如何时，她爆笑说：“个感觉好似挨落阿Chur(IdG Bubbles成员)度咁，冇心跳加速呀，保持专业㗎嘛！”原来细Hugo是IdG Bubbles成员小倬（阿Chur）的弟弟，而二人之前亦有碰过面，她说：“佢两姊弟真系好似样，特别系对眼，拍紧嘅时候我当佢系短头发版嘅阿Chur，哈哈！”而细Hugo亦负责今次歌曲的编舞，他表示今次时间比较紧逼，加上要顾及其他成员一起跳好只舞，所以都花了不少心思，大家亦跳得好好。

为了把握时间编舞大Hugo黄奕斌、Sean与细Hugo一有时间就排舞，更会video call一起研究，希望成品出来能尽善尽美。大Hugo在MV中被Anesa指点球技深夜练波，但Anesa却说：“其实我系唔识打波㗎，但导演要讲话Hugo每球都射得唔好，但明明佢球球都入到，我都话‘你符碌㗎咋，呢球唔计数’成个过程好好笑。”

DEZ在MV中与Anesa坐在开蓬跑车，本以为揸跑车一定会可以迷到女生，点知变成一个不解温柔的男人，DEZ说：“其实我系为咗Chok先拣拍呢个跑车场口，同埋我觉得我喺呢个团入面啱做一个叛逆啲嘅角色，但其实我系唔识揸车㗎！哈哈！”在旁的Anesa说：“吓，又话P牌嘅？”二人立即爆笑，而且拍摄期间已经不停斗嘴有火花，Anesa说：“我同佢讲‘吹乱我个头呀，滴花我个妆点算呀，个头夹咗2个钟㗎’做一个野蛮女仔。其实DEZ都好细心，佢问返我系咪真系整头整咗好耐，其实我整咗10分钟㗎咋。””DEZ被问到与Anesa互动有没有心跳的感觉，他笑言：“本身都有啲感觉㗎，但佢一同我讲佢03年，我即刻冇晒心跳！”

Sean与Anesa互动的场口是一起打机，而剧情当然是被对方嫌弃，Sean即刻惨惨猪话：“佢话我A、B掣，左、右都分唔清呀，我唔系啰！”不过原来Anesa真系有打开机，所以今次Sean真系遇到对手。被问到与Anesa互动会否尴尬，他笑言：“尴尬㗎，我会怕丑㗎，我唔系咁直接嘅男人嚟㗎！”整个过程都充满欢笑声，加上各位年龄相近，很快就熟络了。

Anesa被问到如何可以极速跟5位男生一拍即合，她直言：“我觉得最主要系唔怕丑，因为我平时喺group入面都唔怕做啲奇怪嘢，其他队员有时都觉得我好跳掣，所以都系做返平时自己，哈哈！”