视帝黄宗泽（Bosco）近日现身由周家怡、海儿主持的YouTube驾驶节目《恨驾女团》，首度借出车龄达63年的私伙古董车1968 Ford Mustang，Bosco指自己有强逼症，有少少瑕疵都要立即维修，初买这部车时更是大执过，又自爆目前共有9部车。节目上他将爱车借予海儿驾驶，自己坐副驾，倾偈期间不但大爆好友林峰的秘密，更剖白自己感情观以及不结婚的原因。

直指好友林峰偶像包袱极重　连做Gym都Full gear

三位先讲到偶像包袱话题，Bosco大爆好友林峰偶包极重：“成吨重！成个货柜咁大！同佢咁熟我唔怕讲，我都要爆吓阿峰啲嘢，我哋做gym系同一个教练，譬如两点、三点、四点，我同吴卓羲同佢，我哋着背心，短裤加条Leggings就去，攞个发夹夹住啲头发就嚟㗎啦嘛，阿峰𠮶啲唔系，佢着套装㗎！又帽又Tracksuit，你睇吓佢几重偶包！”

受父母离异影响拒结婚　冇家庭画面怕生仔唔识教

之后几位开始深入讲感情话题，Bosco坦言很重视朋友，若朋友不喜欢他的对象，那二人发展机会都十分渺茫，其后镜头后的“枉阿姐”问他为何不结婚，Bosco也非常坦诚，表示：“我？因为我单亲㗎嘛，由细到大，我一出世就单亲，一出世我老豆就沟女，我一出世佢哋就已经离婚。细个有定期嚟探吓我，我冇家庭嘅画面，究竟咩叫爸爸妈妈？我觉得我而家都好完整，我唔需要依样嘢，唔知系咪我一个人住，全部都系一个人长大，所有嘢自己搞掂，我会谂如果我生咗细路我点教佢呢？佢杀人放火定系贡献社会呢？”

享受孤独　盼临终前花光积蓄：无牵无挂就走得

他续说，有人觉得有老婆、小朋友甚至三代同堂才是圆满，但他不这么认为，反而倾向及时行乐，甚至说得上是享受孤独：“临死之前使晒啲钱佢，使唔晒就送晒畀人，无牵无挂就走得，呢个世界都带唔走一蚊，所以点解我咁舍得买车、买嘢，就系因为我唔需要储钱，我唔使储俾下一代。我都会储钱，储钱系for之后退休冇咁多嘢做嘅时候用，某程度上我都有啲享受孤独，我几钟意晏昼冇嘢做，就算有人食饭都约夜晚，晏昼一个人钟意做咩就做咩，电话冇响就得，因为电话响亲都唔系好嘢，一定系有公事揾我。”

不接受未来女友养蛇　得悉身旁海儿养“球蟒”大呻中伏

而周家怡就说，自己已单身很长时间，今年开始不知何故忽然觉得可以拍拖，Bosco问她之前经历了什么，她回答：“之前拍拖都麻麻哋，不过可能自己都有关系，我觉得我以前唔识拍。”及后枉阿姐又问Bosco能否接受女友养蛇，他斩钉截铁谓：“唔得！”殊不知原来他身旁的海儿就有养球蟒，令Bosco自觉“中伏”，海儿坚称自己的蛇很乖，但Bosco就取笑：“咪都系一条蛇！返屋企识得同你say hi？佢识叫你起身？仲会识比家用？”然后与周家怡笑得非常欢乐，更表示将来可以长驻做主持。