由周家怡、海儿（Hedy）及李靖筠（Gladys）主持的汽车节目《恨驾女团》今集请来黄宗泽（Bosco）做嘉宾，这次除了是他首次拍摄驾车节目，他更首度借出自己私藏、1968 Ford Mustang Fastback让节目拍摄，绝对是独家曝光。

黄宗泽坦言车库共有九架车

Bosco透露，这辆车是儿时Dream Car，“细个睇戏都未知系乜嘢型号，点解呢架车咁靓呢？好似好多电影入面都会出现，跟住自己又做呢行，越嚟越留意呢架车，终于忍唔住买咗返嚟。”可见他对这车相当有感情。他指车款约七年前从澳大利亚购入，“大约六、七十万，原本系黄色，加上油漆麻麻哋，结果索性全车拆晒重新整过，整好后冇再计总数几多钱啦。”讲到现时车库收藏，Bosco坦言共有九架车，对车的热爱可见一斑。

黄宗泽为海儿首借古董车拍摄

不过话音未落，Hedy即谓：“我都想忍唔住买架Stingray。”Bosco听完即刻接招，笑住话：“系咩？我下个礼拜去买。海儿老师你系咪钟意𠮶架？（Hedy：记住系1963年。）知道！我即刻去揾。64（年）、68（年）嘅我都唔买，我就系要63（年），哈哈。”Hedy笑到收唔到声，气氛即时升温。家怡指本想邀请Bosco拍reels，但Bosco回应，“我系同海儿老师拍，唔系同你拍㗎㖞。同埋我架车系借俾海儿老师揸㗎㖞。”搞到Hedy又尴尬起来，“Anyways⋯⋯”十分搞笑。

黄宗泽大方分享择偶观

随后三人登上古董车，一边游车河一边倾偈，讲到感情及择偶条件，Bosco大方分享自己对另一半的要求。家怡抛出男人及女人“不可能的铁三角”时，Bosco坦言如果只能选两样，他会选好脾气及能力，“靓女点定义先？我觉得顺眼，呢个就系我个type，人哋可以觉得唔系㗎嘛。要相处，有能力同脾气好，我觉得紧要过靓女，我自己唔钟意好嗲，我唔得㗎，我会钟意比较爽一啲。”说得十分直白，更笑指自己不为“嗲功”所动。

黄宗泽未婚原因与家庭有关

至于为何至今仍未结婚，Bosco指跟自己在单亲家庭成长有关，出世不久父母便离婚，小时候完全没有家庭画面，所以对“完整”的理解跟一般人不同，反而觉得现在已经十分完整，不需要靠结婚圆满，“我都系一个人长大，所有嘢都系自己搞掂。如果我生咗细路，我点样教佢呀？”家怡和议：“系呀，你养只猫，你教得佢唔好，佢都系打烂你屋企啲嘢，你自己受番；你教个小朋友教得唔好，佢出嚟社会就系为害人间㗎啦㖞，或者我生咗个仔出嚟，大个好钟意沟女，咁佢都令好多女人伤心，我唔知我使唔使有份受㗎嘛。”

周家怡分享近年单身心态转变

至于将来点样用钱，Bosco就话：“临死之前使晒啲钱佢！使唔晒就送晒俾人，无牵无挂走咁就得㗎啦，呢个世界都带唔走一蚊。”讲到单身生活，家怡指单身都有单身的自由及开心，又分享自己近年心态转变，“之前系单身咗好耐，但今年开始唔知点解突然间觉得可以拍拖，我之前直程惊㗎，可能因为之前啲经历都麻麻哋。不过可能同自己都有关系，我觉得我以前唔识拍拖。”

黄宗泽大爆林峰“偶包成吨重”

画风一转，谈到“偶包”话题，Hedy指家怡是她们三个（《恨驾女团》主持：周家怡、李靖筠及海儿）当中，完全没有偶包的一个，Bosco亦指自己没有，即被家怡调侃，“你本身靓仔，唔惊吖嘛。”Bosco即随大爆好友林峰“料”，“冇关系㗎，你睇吓林峰！哈哈。个偶包成吨重，成个货柜咁大㗎佢！我同佢咁friend唔怕讲㗎嘛，我都要爆吓阿峰啲嘢，我哋同埋卓羲做gym系同一个教练，我哋着背心、着条短裤加legging，揾个发夹夹住头发就嚟㗎啦嘛，阿峰唔系，着晒套装嚟，哈哈，又帽tracksuit咁样，你睇吓佢几重偶包！”