金牌司仪郑丹瑞（旦哥）在行内德高望重，近日他接受陈志云的商台节目《又系时候同一天讲再见》访问，讲到自己在风光背后也经历过不少失败，其中一次是应邀去香港电台做黄金时段主持，结果忽然间被炖冬菇，调去深宵时段。他觉得自己被玩，直言：“你玩我啦！你叫咗我过嚟叫我做朝头早大锣大鼓，然之后揾啲借口跟住炖我落嚟，你分明系玩嘢！”他表示吞不下这啖气，含著恨去主持，又因为觉得深宵时段冇人听，在节目上求其播歌，甚至8月播圣诞歌都试过。直至收到一封听众来信，旦哥睇完顿时觉得无地自容，也有了很大改变。

失恋写稿竟获赏识 加入商台写广播剧剧本赞自由度大

旦哥透露自己当初是因为失恋而入行，他追求的女生跟别人拍拖，使他觉得晴天霹雳：“我就喺当时浸会𠮶份报纸，人哋个个写紧时事、社会动态，我就写‘天呀！惨呀！爱情呀！’咁就俾商业电台嘅两位监制睇到，就叫我上嚟试写广播剧，叫我写后生仔，唔好写《18楼C座》，话𠮶啲唔关你事，我就写返自己𠮶啲‘浩风散记’。”后来监制更叫他自己声演。他又透露自己1981去了香港电台，约1983、84开始“起朵”，他与陈志云都很感激高层吴锡辉、张文新、朱培庆，因为什么都不理会，但同时给予极大创作空间。

突遭调去深宵时段 含恨开咪盛夏狂播廿分钟圣诞歌

纵然如此，电台之路也非一帆风顺，说到当年被“炖冬菇”详情，旦哥说起初他是主持早上9至11点的《音乐旦》，后来被调职至深夜2至6点的《轻谈浅唱不夜天》，他很不忿：“即炖㖞！话觉得你都系唔适合做呢个节目，然之后过两日就炖咗落去，你点啃啫？（陈志云：咁你点啃？）冇呀，啃唔到㗎！”他觉得深宵节目冇人听，便随便播些够长的歌务求将节目时间填满，例如6分几钟的《Lyin’ eyes》、《梁祝》，之后甚至在夏天播20几分钟的圣诞串烧歌：“你话做乜嘢呢喺度？𠮶阵时我就系觉得香港电台，你玩我啦！你叫咗我过嚟，叫我做朝头早就大锣大鼓，然之后揾啲借口炖我落嚟，你分明系玩嘢！我𠮶时未开窍乜都唔识，我只能够含住呢个恨去做，做咗好长时间，三四个月都系咁。”

听众来信当头棒喝感羞愧 努力改进洗脱耻辱

旦哥说做电台常常都会收到信，听众会写信来点唱，直至他见到其中一封信写住“我系需要喺通宵时间听音乐、做嘢，你唔钟意做通宵节目，请你离开！”他顿时变得“醒神”，觉悟到原来深夜的确也会有听众，同时感到十分羞愧：“我收到封信，我收到无地自容！羞愧就系，呀旦，有两条路俾你自己拣，一系就唔好做，但系你唔做呢，你就永远孭住呢封信嘅羞耻，呢个羞辱系好大！虽然系我自己睇到，但系呢个羞辱后来呢，我将封信夹咗喺我张台嘅玻璃，𠮶阵时系玻璃台，夹咗喺底，卧薪尝胆，我要等你写返封信俾我！”旦哥痛定思痛，从那天起勤练Mixing、推出剧场版等等，尝试在歌曲加上自己风格等，结果竟然再收到同一名听众的信。

终获原听众再写信点唱认可 张敏仪自爆当年下令炒人

旦哥以“毛管戙”形容，当时他愈收愈多信，他亦一直等待同一位听众的信，有日终于收到，他表示：“终于对到啲字迹！但系佢亦都冇赞我，佢只系希望郑丹瑞‘四点后第一首歌，请你同我播呢首歌。’咁佢即系同意咗我，佢唔需要话‘你真系好喇，系咪呢？’一句都冇，呢个系我觉得系我开窍。”此后他更收到张敏仪用内线电话打上直播室，大赞他做得好，半年后旦哥终于“重出生天”，重回白天的时段主持，之后更与当时下令炒他的时任广播处处长张敏仪成为了朋友，“佢话‘当年系我要炒你㗎，听到你朝头早个节目不知所谓，吴锡辉保你咋！’”

出半自传澄清维基错漏 大方分享失败经历冀勉励后辈

旦哥之前推出了半自传《我失败，希望你成功》，他解释出书原因首先是因为“维基百科”资料有不少错漏，澄清：“我老婆唔系卢维思，佢又唔系姓卢又唔系叫维思，我老婆成日问我‘边个系卢维思’？维基成日写我好多有啲成就嘅嘢，但系其实有好多嘢你唔知。”他认为比起成功，失败更值得分享，其中一次使他大受打击的“失败”经验，便是炖冬菇一事，旦哥说：“我以为自己做电台好叻，其实炖冬菇系一个好大嘅打击，足以令我觉得我唔做，我做保险！我希望喺我呢五十年嘅生涯里面，唔单止《三个小神仙》有啲成功，但系有更多真系失败、做唔到，大家唔觉咋嘛，揞得好或者点样样，所以我觉得好多时呢啲嘢如果能够分享到俾大家，等大家唔使好似我行咁多冤枉路，可能都系好。”