李施嬅今日（9日）以代言人身份出席美容中心活动，她表示自己13岁已开始做facial：“从此爱上咗，16岁喺加拿大学识揸车就自己揸车去做facial，佢哋当我水鱼咁，一有咩新嘢就叫我试，做过水晶磨皮，一个礼拜磨两次，我𠮶时唔识吖嘛。我𠮶时有做part-time，使咗好多钱去做facial，我妈咪从来唔做facial。最贵买过几万蚊嘅package，细个想开美容院可以日日去做facial。”提到将会开第一次直播带货，李施嬅表示想跟粉丝分享她用过的好物，可以享受很大的折扣，她屋企人也会受惠。

享受单身生活感快乐

问到现时的感情状况？李施嬅说：“依家都系努力工作中，都无时间有咩感情状况，单身几开心㗎，净系好自私地顾及自己嘅感受，咩都系谂自己，照顾自己爱自己，人生唔一定要有另一半先开心，单身都可以系开心，就算一生人无另一半都唔系一个失败，呢啲社会嘅框框可以慢慢搣甩。有啲人相爱可以白头到老，但系离婚都好多，我觉得有嘅时候就珍惜另一半，无嘅时候就放手，接受，唔好太执着要结婚生仔。（会唔会系你上上一段感情受伤害影响到你嘅谂法？）每一段感情都会受伤，都有开心同唔开心，呢个系一个过程，唔会因为受伤害而影响到我嘅将来，咁样太唔公平，佢唔系我唯一一段感情，每段感情都令到我成长。（同旧爱有联络？）有需要时就联络，都系朋友，都希望佢开心幸福，越嚟越好。（ready新恋情？）我都无时间，但如果缘份到都欢迎新嘅关系。”

赞龚嘉欣好nice不知对方是否双面人

近日龚嘉欣被指是双面人，问到曾经与她合作过的李施嬅可会觉得龚嘉欣是双面人？李施嬅说：“我唔知呢啲报道，同佢唔系好熟，但系见佢时觉得佢好nice，我判断唔到。我自己做新人时无俾前辈虾过，啲前辈对我好好，只系无得瞓觉。有见过人哋不和，但系自己好lucky无遇过。（有无试过畀男演员抽水？）无，啲男演员仲惊过啲女演员，惊畀你话抽水。无试过俾人加戏，减戏就试过，会讲清楚。自己好少亲热戏，好似无床戏。（接唔接受到床戏？）剧情需要会接受，如夹硬为做新闻就唔好。”

愿吴文忻安息

另外，对于吴文忻今日病逝的消息，李施嬅亦有留意，她表示感到伤心，知道吴文忻在努力抗癌，觉得对方很有正能量，好正面，得悉对方离世感到好震惊，希望吴文忻安息。两人并没有合作过，但有共同朋友。