早前伍咏薇在主持的节目《九运会客室》上，大爆当年杨思琦拍剧遭欺凌，其后陈曼娜更指出商天娥及一位已淡出的年轻男演员便是欺凌者，事件令电视台欺凌事件闹得沸沸扬扬，而欧锦棠日前亦在自己的YouTube节目《乜乜棠水舖》分享自己的所见所闻，亲证有欺凌事件，剖析背后原因。他指自己不认同欺凌，但不讳言新人被欺凌的主因就是“唔得醒目”，表示：“有时𠮶啲唔系恰你，而系你力有不逮。”欧锦棠曾目击一位女新人因为不敢掌掴对手、怕打伤人，NG了很多次，结果导演叫剧组其他人轮流掌掴这位女新人：“几个轮流冚，‘你埋去冚，话俾佢听点样冚！’‘唔系咁，大力啲！’咪个个埋去冚佢！”

欺凌皆因新人唔醒目拖累进度 阻人收工惹祸

欧锦棠一开始已表示电视台有欺凌，自己亦被欺凌过，但就冇欺凌过人，他说：“点解会俾人恰？四只字，唔得醒目！”他说有新人力有不逮，所以自己做监制选角时，都尽量避走“唔醒目”的人，他又解释“欺凌”事件发生的原因，主要就是表现差拖累大家迟收工，因为在电视台流水作业式开工，厂景接外景、外景接厂景，时间甚至会重叠，演员根本无法同时出现在两个厂，做主角的话更冇时间休息，他说：“时间就是金钱，大家都攰，唔好净系话演员，我哋叫做crew，工作人员、摄影师、收音机、灯光等等，佢哋都要轮班制，个个除咗返工都想有自己生活，夜晚放工，虽然收厂都系两点或者三点，可以出去食个宵夜，大家纾缓吓今日嘅工作压力，然后先返屋企瞓觉或者睇波。”

NG累街坊惨受剧组面口 寄语新人执生学睇机位

不过新人埋到位会紧张，有时新人守尾门就大件事，前面主角、配角已讲了很多页对白，若果最后因为新人忘记台词要NG的话，就会被怪责，他续说：“梗系唔想自己衰，但呢个世界就系越穷越见鬼，你越唔想衰就越会衰，如此类推，面口就嚟㗎喇。”导演可能头一次次都会说：“唔紧要啦嚟多个啦。”但慢慢面口就会愈来愈差，因为没有人想工作耽误：“以前电视台我最高纪录一日拍超过二十几场戏，系好过分㗎依样嘢，系好过分，但系一般嚟讲十几场走唔甩，大家唔想OT咁辛苦，尽量争取时间唔去娱乐都要去休息，你咁样系令到人哋减少咗佢自己嘅私人时间，为咗你一个。有啲新人准备唔好，有啲以为自己准备好，其实系死背书，就系好紧张，咁就会睇面口㗎啦。一而再，再而三，咁点呢？唔单止主角系咁，有啲人会‘啧’，最轻㗎喇，或者‘唉，又嚟呀？’个个就避开你，摄影师𠮶啲阿哥就会‘唉，嚟多个啦。’或者俾啲声气你听‘都唔使搭厂车喇，自己call车走啦。’”他理解新人一定会压力大，加上很多人衰在“唔识睇机位”，但也只能执生，多睇playback摸索导演和摄影师要求：“你再冇进步嘅话呢，咁就会俾人嫌弃。”

忆昔日返工“带住阿妈返工” 导演开咪爆粗闹

欧锦棠直指个个都是被人闹大，自己以前都“带住阿妈返工”，尤其亚洲电视的导演好火爆，无法达到要求就会闹，他忆述：“喺panel（控制室）开咪落嚟，对住喇叭，成厂都听到，就问候你阿妈！就系‘你咁乜蠢！’、‘带咩返嚟返工？乜你老乜！’好难堪嘅说话我都听过，有时唔一定闹我，闹其他演员，自己听到都戥人哋唔开心，唯有点啊？醒目啦又系𠮶句。”他提及闹他最多的便是邓衍成（Billy Tang）导演，但自己从对方身上学到很多，因此他觉得有时闹人说不说得上欺凌是值得商榷：“所以你话系咪欺凌，一定会畀面口你睇，无非都系个个都有一个自私理由，就系想俾多啲时间自己，如果你自己能力唔及，影响到大围福利，呢个自不然会。我冇话呢一种欺凌系啱，但系俾人闹算唔算欺凌？唔系，针对你，话你算唔算系欺凌？唔算系，自己争气！自己争气啲！”

零经验女主角怕掌掴对手频NG 终被剧组轮流掌掴

欧锦棠指有些女艺人很阴功，可能是选美出身或样貌突出，被高层相中重点栽培，很快就有戏份重的角色可演，但她们却没经验，结果表现强差人意都会被幕后糟踬，他说：“有啲导演唔系人咁品！埋得嚟呢个位你应该孭得起呢个责任，对白、表情所有嘢你起码交足俾我，唔好讲感情。都系唔得嘅，何止闹！”他曾经见过一位女新人做女主角，因为不敢掌掴人，结果被工作人员轮住冚：“𠮶个case系咩？新人做女主角，冚人，冚唔到，NG好多次，唔识冚，就住，因为惊冚到人，所以导演好嬲！你知唔知点？真事嚟，𠮶场有其他工作人员有武师喺度，佢企喺度，几个轮流冚，‘你埋去冚，话俾佢听点样冚！’‘唔系咁，大力啲！’咪个个埋去冚佢！导演叫到都怜香惜玉，其实叫就叫教佢，就唔系大巴大把车埋去，个个埋去冚佢，都俾少少力，好惨呀𠮶次，呢个你当唔当系欺凌吖？定系你当导演教呢？我觉得你唔一定要咁教嘅，不过真系有啲咁嘅事。”讲到拍掌掴戏，他认为就住就住反而最易NG，分享经验之谈：“你一系一嘢冚埋嚟，你就住就住盏NG十几次，我就俾你冚十几巴，但系你扯行用晒肩力冚落去，入得院㗎喇，𠮶日收工㗎喇！你放软手脚，‘啪’一下，松松地，快嘅，导演听到声就收货。”

不过，欧锦棠认为这些欺凌情况近年已甚少发生，因为电视台生态已改变，TVB减少制作，一年只开一、两套剧，不会再像以前那样日接夜、夜接日拍很多场，也不会再开三部机；而ViuTV则以外判剧为主，时间较易控制，只要准时交货就OK。