花剑世界冠军兼乐坛男新人蔡俊彦（Ryan），昨日（11日）出席名店品牌活动，活动上较早时间有韩团ITZY的申有娜（YUNA），可惜二人缘悭一面，Ryan解释因为刚刚练完剑，备战6月的亚锦赛及7月的世锦赛，要兼顾两个身份，他表示已慢慢找到自己的节奏，知道需要用多少时间准备比赛。他透露队友在练剑热身和玩游戏时会刻意播他的歌来扰乱他，起初他也觉得很尴尬，但慢慢已不再受影响：“我系证明咗我系唔会畀任何嘢影响到，只要我想赢嘅时候！开头好尴尬，但系运动员最紧要就系有适应能力，咁我好快就适应咗，当听紧人哋嘅歌，然后继续去表现自己。”Ryan笑指队友还会模仿他在《1206》里的击拳，“佢哋话觉得好尴尬，话觉得我做埋啲咁核突嘅嘢。”至于将来会否有机会跟剑友出歌，他表示其他人肯开金口他就OK。

点评老友Edan似唔似YUNA：有少少唔公平啰对个女仔

讲到他与YUNA缘悭一面，但过往曾有网民指YUNA跟他的好友吕爵安（Edan）好似样，问他觉得似唔似，他笑说：“系呀，我有听过，我都觉得有少少似嘅，但系𠮶位明星系真系好靓。我觉得真人似唔似呀？你地觉得似唔似呀？我觉得有少少唔公平啰对个女仔！”虽然未能见到真人，但睇完相后他就说：“少少啦，但佢靓好多！”至于Ryan则曾被指似《樱桃小丸子》的藤木同学，他笑笑表示：“都系呆呆滞滞咁啰。仲有……暂时未谂到，我谂到再话俾你地听，或者大家谂到话俾我听。（问：你觉得似佢系唔系好事？）都几好，起码大家记得啰！大家见到藤木就会谂起我，见到我就会谂起藤木，互相宣传啰。”

与Ivy So再合作 激赞对方：好真心顾及人感受

Ryan今日（12）日推出新歌《死因不明》，他介绍：“讲一啲人际关系上面嘅，好多时缺乏沟通，然后慢慢变得越嚟越生疏、陌生，然后最后渐渐咁疏远咗大家。”上次他惊喜客串苏雅琳（Ivy So）的歌曲《原地拖手》MV，今次他未正式公布MV女主角，已有很多人竞猜是Ivy So，虽然活动上他未有“开估”，但已同开名冇分别，预告今次“原地松手”，更赞到Ivy So“天上有地下无”：“喺拍之前，我做过一啲research嘅，我睇佢一个JFFT嘅直播，当时我觉得佢系一个好识做、好襟捞嘅女仔，因为fans打上去，佢每一个都好有互动，同埋好有情绪价值，氹到佢啲fans好开心，我𠮶时睇系觉得如果我系佢嘅fans，我都会好冧！到我真系认识咗佢个人，我觉得佢系真系一个好真心顾及人哋感受嘅人，一个好识照顾人哋嘅感受嘅人，所以虽然佢年纪细过我，但佢都有一个姐姐嘅感觉。”

初见Ivy So只敢用背脊“得”住：我社交有啲废

Ivy So曾“投诉”Ryan明明大过自己却叫她做“姐姐”，她解释：“因为佢好识照顾人，同埋我之前做research都见到佢有个细佬，而真系第一次见面嘅时候，佢都有一种好体贴嘅感觉，而我就有啲废啰，即系我第一次我见到佢我系……（记者：你唔废！你世一嚟㗎！）但系我社交有啲废啰，我见到佢第一下系……我净系够胆用个背脊得住佢啰，一来我第一样嘢，我惊佢未化好妆，唔想有互动住啦；第二就系我真系好惊啰，我真系好……我唔知点讲呀，总之就我有啲懦弱啰，但系佢就好好，令到我相处上觉得都好融洽嘅。”

回应“拍一日拖”邀请竟耳仔红：如果同到喜欢嘅人合作，会好啰

Ivy So早前曾表示，若《原地拖手》MV过1M views，就会邀请Ryan“拍一日拖”，他听罢回应：“我觉得要个女仔邀请我好似唔好大方，不如我个MV过咗10个views，我就邀请……”记者立即起哄，问他是不是很想跟Ivy“拍一日拖”，他立即怕丑到耳仔红兼且语塞，连忙说了几次：“俾我解释！俾我解释！”他说跟Ivy的合作确实很愉快，对方亦十分体贴，绝对有机会成为好朋友，但他觉得最重要还是睇观众：“唔系我想拍，佢想拍就拍，我觉得佢嘅fans钟意，我嘅fans都钟意，钟意我哋嘅互动，咁我哋咪试下。所以佢用一个佢MV过1M呢个条件其实好好，会反映到观众系咪真系钟意，如果真系钟意嘅，咁咪拍啰。因为我觉得我哋作为一个艺人，应该要顾及观众嘅感受，唔系净系我哋两个，咁你问我自己想唔想，我觉得系OK嘅，因为我自己都系好欣赏佢，同埋觉得佢系一个好好嘅人，所以如果可以同到一个我自己喜欢嘅人合作，咁我觉得都好……会好啰。”

笑言拍拖太Hardcore惊收刀片 竟反建议“打一日剑”

之后他竟然大胆扬言，其实不一定要拍一日拖，因为太hardcore，但竟建议“打一日剑”、“跳一日舞”，记者指要Ivy So打剑会否太hardcore，他说：“唔系我吖嘛，佢吖嘛！你知唔知，拍一日拖系我hardcore，唔系佢hardcore，因为我收刀片，唔系佢收刀片吖嘛！踢一日波啰，佢都有踢波㗎嘛，赚一日钱啰、发一日达啰，好多其他嘢可以试下嘅。”