廖子妤（Fish）昨日（11日）以一身喱士露肩裙打扮现身名店品牌活动，坦言觉得自己确实有认真打扮，见到这条裙有哥德式感觉，自觉似“爱登士家庭”，于是再梳一个复古风的发型，配上深紫色唇膏，营造暗黑感觉。她直言以前不喜欢性感，后来却慢慢钟意，被问要性感给谁看，Fish说：“自己啰，最紧要靓！就嚟四十岁啰！觉得都三十几岁啦，唔靓几时靓啫？以前细个会唔钟意粉红色，唔钟意太girly嘅嘢，会觉得啲人觉得我中性嘅，我又觉得著中性啲嘅打扮好似型啲。但而家就觉得咩都试下啰。”讲到过往的男朋友是否不准她性感，Fish就表示不会被任何人的意见喜好左右到自己穿搭或做决定：“除非佢觉得我著得核突啦。”

她又表示要跟男友卢镇业（小野）著情侣装是有点难：“首先我要先自己著得靓，但系我著完靓之后呢，我觉得佢喺我隔篱好似我嘅仔咁呀！因为可能佢钟意嘅打扮系比较似返佢以前大学时期嘅𠮶啲打扮呀，咁就会可能……但系我而家又著得比较女人啲呀，咁就会有啲冲突啰大家。”不过如果二人约定决心要衬衫的话，一定是Fish迁就小野，因为她多衫之余，男装又有、女装又有，奈何小野未必穿得下。

活动上Fish跟韩国女团ITZY的申有娜（YUNA）同台合照，见Fish还跟她说了几句，问到是否讲韩文及讲了什么，Fish竟谓：“系呀，我系俾佢吓亲呀！因为头先一转过嚟，跟住，我系，情不自禁‘哗，You so pretty！因为佢突然间转身呢……其实唔系突然间嘅，因为我哋要行出去㗎嘛，佢突然间转身，因为好近呀！即系咁近，哗，呢个女仔冇毛孔㗎㖞，即系震慑到！跟住就突然间飙咗一句，但系我希望佢唔会觉得好冇礼貌啦。”她指自己只识几句韩文，例如去餐厅叫结帐、问侍应攞水、好肚饿等等，所以也只能跟YUNA说“Bye-bye”而已。而韩星之中，Fish最喜欢朴宝剑，还看了两遍《苦尽柑来遇见你》；另外她喜欢河正宇：“我有睇佢啲书，同埋我有睇佢啲画呀，我觉得佢对于演技嘅理念啦，又或者佢好钟意行路呢一方面，我觉得我哋都有偈倾嘅，希望将来有机会可以见到佢真人。”

Fish上月底衣锦还乡，带著自己的金像奖影后奖座回马来西亚见父母，她更说：“我觉得系个奖先至系个本体啰！因为我返到去，我阿妈见到我就问我‘个奖呢？’我话‘哗，好彩我有攞啫，我以为你系想见到我，原来系想见到个奖！’”由于Fish想再见多个奖一阵，于是奖座也有随她回港，问到妈妈是否觉得奖座很重，Fish表示：“上次女配𠮶次我都有攞返去，佢都话好重啰，其实每个人第一次攞金像奖都觉得好重嘅，因为真系好重！”此外，Fish凭《摇篮凡世》入围吉隆坡影评人协会嘅最佳女主角，今次是她首次入围，她感到非常荣幸：“因为系我哋𠮶部系唯一一部华语电影，我亦都系唯一一个华人演员入围，咁都觉得系非常之荣幸，可以喺自己嘅家乡有一个咁嘅殊荣。”

她透露，今次回乡竟然获安排“特别任务”，父母向她索签名相，想送给亲戚朋友，Fish更大爆：“𠮶个重点，唔系签咗几多张，个重点系𠮶啲相都系我自己印嘅！我话‘签名可以呀，咁相呢？’跟住我阿爸话，‘哦，你去印啦。’我话‘吓？要我自己印㗎？’我话好啰，因为都系我爸啲朋友。（记者：你攞咗咩相？）攞奖𠮶啲啰，因为费事佢哋唔认得我吖嘛，真系太夸张！”Fish目前正准备舞台剧《大龙凤》，过著规律生活，如一个上班族，讲到造型也颇搞笑，她表示：“好好玩呀今次呢一个，因为呢个剧呢我十年前都睇过嘅，我睇嘅系陈淑仪做爸爸嘅𠮶个版本，陈淑怡老师，我今次自己有份做，我都觉得好神奇呀，因为一个十年前自己睇过嘅戏，而家自己做，我觉得我会好好把握机会，因为我我有啲喜剧细胞，我想发挥呀！”