丁子朗昨日（12日）现身其个人画展“艺术之旅：共鸣瞬间”的开幕礼，一向阳光气息十足的丁子朗，今次大转画风，以较为“赤裸”及大胆的画作呈现内心世界，他更亲自向《香港01》解构画作背后的灵感来源。对于有网民猜测他是否因为“冇剧拍”才转行画画，丁子朗亦大方回应。

“赤裸”画风展现内心：唔知大家会点睇

再次举办个人画展，丁子朗坦言心情既兴奋又紧张，他表示今次的画展，无论是主题还是画风，都比以往更加成熟和深入。今次画展的主题围绕“爱”与“共鸣”，丁子朗大胆地运用了比较“赤裸”和直接的画风去表达人与人之间的情感：“因为酒店大堂每个人都会经过，你会见到幅画，所以其实我好惊，我唔知啲人会点睇幅画啦，好唔好睇啊，够唔够Masterpiece啊，所以我系都带住一个毡惊嘅心。”

丁子朗笑言：“今次呢个Collection系我叫做最赤裸嘅一个Collection之一，好多我内心嘅剖白，咁所以希望大家好钟意啦。都系关于Honey啦、关于爱啦、同埋关于我自己嘅爱情观、世界观、价值观咁样嘅。”他强调，画作中的“赤裸”并非卖弄色情，而是希望表达出一种坦诚和真实的情感交流，同时他亦希望带著自己的画作冲出香港，到世界各地展出，他下星期已经率先在深圳有画展，而之后亦有数个地方在洽谈当中。

亲解“冇剧拍”传闻

近年丁子朗除了拍剧外，亦积极发展画画事业，更透露即将会与知名玩具品牌合作，推出联乘画作。对于有网民猜测他是否因为“冇剧拍”才专注画画，丁子朗即刻笑著澄清：“啲人都问我，咁你系咪画画画之后唔做戏啊？咁又唔系！我嚟紧都会拍嘅，嚟紧都会准备入剧组，咁但系都要keep住去两边balance。”

丁子朗表示画画是他从小到大的兴趣，亦是他舒缓压力和表达自己的重要途径：“画画呢个我谂系我由九岁开始已经画，咁有啲作品甚至系我十几岁嘅时候画，但系𠮶阵时semi finish一半完成，跟住到而家我再完成埋佢嘅画作。我觉得technical咁讲我啲画都成熟咗好多，即系比起上年嘅画展甚至比起前年嘅画展，第一次做画展都已经系争好远。咁所以其实都几开心就系见证住自己成长，见到啲收藏家买嘅画会越嚟越唔同风格，会钟意咩唔同嘅类型，慢慢叫做成熟咗我嘅画风。”

直言最受欢迎是人体画

至于哪一个系列得到最多人垂青，丁子朗直言是每个系列都有人会买：“最受欢迎都系人体画，即系比较多关于人体嘅嘢。”他更指有些画作投入了不少时间去画：“我试过拍戏嘅时候拍到一半跟住就因为喺外地拍，拍到一半跟住返酒店就继续画画，然后第二朝又去拍戏咁样。”虽然他最近忙于办画展，但他很享受这个过程：“都几感恩就系自己迫自己咁忙咁画，我enjoy呢一个咁忙嘅过程嘅。”

同知名ip公司合作

除了酒店大堂一幅巨型画作外，他表示今次的画展在另一层的餐厅门口会有五幅画作，餐厅里面亦有五幅画作：“咁有新collection，有少少旧collection捞埋一齐，希望大家认识一个以前到而家嘅丁子朗！”他更透露即将会跟一个有名的IP公司合作办联展，除了人像外，他今次更挑战画动物：“我画完之后畀咗gallery睇，畀咗对方睇，因为要畀佢哋approval。佢哋都话：‘哗！好钟意㖞！’真系竟然钟意过我画人像，跟住我就觉得原来系咁啊？咁系咪要画公仔呢以后。”