如果一个人花了十年时间追梦，最终仍然默默无闻，究竟算不算失败？
剧集《喜剧开场》里，“红白蓝”三子最终走向解散结局，在世俗眼光，他们或许只是三个“红不起”的失败者。然而林千渟却反问：“点样先算失败？”在她眼中，成功从来不只是名气、奖项或被全世界认识，而是这份工作究竟带给自己甚么，又是否让自己活得更丰盛；许月湘（湘湘）更睿智表示：“放弃梦想比追梦需要更大勇气。”同样问题，王智德（Alton）则借用了杨乐文（Lokman）曾说过的一句话：年轻时看重结果，长大后才发现，人生其实更重要的是过程。这场访问里，这四位演员谈角色，也谈自己，从追梦、责任、迷惘到放弃，拼凑出比剧集更真实的成人成长图鉴。
服装：@wanjansco @theclothesurgeon @equalnear @lowool.official @Implyofficial （Lokman）、@wanjansco @theclothesurgeon @cos @musium @lowool.official @i.t_too @conversehk_hongkong（Alton）、 Initial（千渟）、antiprima（湘湘）
化妆：Giann Cheung（Lokman）、Yumi Cheung @yumicheung7（Alton）、ManMan（千渟）、Melody Chiu（湘湘）
发型：Seiko Sin @Hair Culture（Lokman）、Frankie Ho @Hair Culture（Alton）、 Terry Yeung（千渟）、 Cooney Lai（湘湘）

千渟剧中陪男友追梦十年　现实同样会视梦想大于成家立室

林千渟在剧中饰演的“阿思”，是一位默默陪伴男友追梦长达十年的体贴女友，她与“红白蓝”成员阿桂（何启华饰演）的缘分于中学时代，阿桂暗恋了她很久并展开追求，最终她选择舍弃原本非常帅气的前男朋友，点头答应与阿桂在一起。这段看似稳定的中学青梅竹马恋情，在“红白蓝”陷入前路迷茫的樽颈位时，也迎来了残酷的现实考验：“好矛盾就系我又好想佢继续追梦，但系同时间我又觉得我哋嘅年纪好似差唔多要结婚喇㖞，咁到底系要放弃梦想，要组织家庭定还是系点呢？”

若突然不支持会显得自己很坏，但代价却是无止境等待以及牺牲对成家立室的憧憬，问到千渟若在现实生活中遇到会如何抉择，她坦言这个问题极难回答，因为自己也是追梦的人，但正因如此，若另一半同样在追梦，她定会选择支持：“我觉得冇分时间嘅限制，我觉得追梦就系冇时间啰，同埋我觉得人生好短㗎咋嘛，咁你就系要做自己开心嘅嘢，同埋你尽力去做啰，做好每一样嘢啰。”她直言对于现阶段的自己而言，成家立室的优先次序其实摆得并不是那么高，反而梦想才是第一。

团长包袱沉重　Lokman指MIRROR有团队支援反而少做决策担子轻

杨乐文（Lokman）今次率领“无悔三兄弟”的两位拍档何启华（Dee）和Alton追梦，他饰演的阿望是搞笑组合“红白蓝”的团长兼编剧，背负著一份执著的包袱，他形容：“阿望系一个年轻盲目嘅追梦者，咁佢系一个固执啲㗎啦，好有原则嘅一个人，佢就有少少唔肯认输、唔肯认低威，同埋有少少唔想俾现实打败嘅一个男孩子啰，所以佢都会有啲硬颈嘅时候系人哋会唔明白㗎啰。”

这种作为领导者的无力感，往往比一个人单打独斗更让人窒息，因为阿望背上扛著的，还包括别人的未来，Lokman感触良多：“有阵时会有啲压力，就因为佢带咗佢身边两个兄弟恭仔同埋阿桂一齐去追呢个梦，但系其实身为团长，又好似唔系带到啲咩嘢大机会呀，或者有啲咩好作品畀佢哋，而会有呢个包袱系度啰。拉咗佢哋落嚟陪我一齐癫，但系又冇乜方向呀，冇乜成就呀，咁样就会有，所以可能比自己追梦更加迷惘啰，因为你要揹埋人哋飞㗎嘛！”

身为MIRROR队长，这次在剧中又恰巧担当“红白蓝”的团长，记者好奇两者之间是否有微妙的共通点，Lokman却表示其实没太多相似之处，虽然剧中的“红白蓝”名义上有个经理人，但帮助有限，甚至可说是形同虚设；相反，在现实的MIRROR却有经理人团队全力支援，所幸很多重大决策和责任不需压在他的肩膀。他为阿望慨叹：“阿望就系自己会想揹上身啰，同埋佢都可能有责任揹晒上身，佢觉得要更加好，佢觉得自己畀唔到更好，或者其实可能恭仔佢会有阵时都系冇乜所谓，或者阿桂又唔会特登将呢个责任摆喺佢身上面，但系佢自己会一嘢擸晒啰！”

凡事先顾大局　Alton自认与恭仔相似：唔觉特别伟大

至于王智德（Alton）饰演的恭仔，是最后加入“红白蓝”的成员，他像是团队里的调停者与黏合剂，总是用一句“冇所谓”作为糖衣，包裹著内心的真实界线，Alton深入剖析角色的内心世界：“其实佢都系一个零同一百嘅人。”恭仔这种隐忍的性格与他的成长背景及家庭有关，而他认为这个角色与现实中的自己有不少相似之处，因为在真实社会里，每个人都背负著责任，不可能随心所欲地将自己“一百”的底牌掏出来：“我哋好多时出嚟做嘢，你就会有一种叫做忍让呀，或者叫做……过咗啲关呀，或者退一步呀，但系每个人心目中嘅𠮶一把尺都唔一样嘅，喺呢一套剧十集嘅故事入面，你哋会见到恭仔佢点样摆自己𠮶条线。”

问到他现实中是否也是凡事会先考虑团体，Alton坦言这看来并非特别伟大，而是一种理所当然的大局观：“都会有时候会好自动自觉地将个视觉放咗喺个Big picture度，因为有时候以演戏为例，你唔系一个人嘅事情，咁你一定系睇一个团队嘅工作，有时候你一定系睇完个团队嘅工作，了解自己嘅角色岗位，你先至再去睇下我应该点样去做，点样去演绎。咁我觉得除咗做戏之外，本身生活都已经系咁。”

湘湘剖析马素付出型人格　照顾别人中寻找自己

而许月湘（湘湘）剧中饰演“马素”，与陈汉娜（Hanna）饰演的姐姐马凡有不少对手戏，一开始她之所以出现，完全是为了照顾身心面对不同问题、生活一度无法自理的姐姐。湘湘表示虽然表面看来是马素在付出，但实际上，在照料他人的全过程中，她反而拼凑出更完整的自我：“呢套剧好似讲紧三子追梦，其实我觉得喺呢个阶段，马素，佢自己嘅人生入面都有啲迷茫，佢都谂紧佢人生嘅目标系要做啲乜嘢，佢生存嘅意义系啲乜嘢，但系去照顾人哋同埋去接触其他嘢嘅时候，可能你慢慢揾到自己嘅价值，同埋你钟意啲咩，所以我觉得呢个都系一个几有趣嘅过程入面。”

观众大抵都会被这个默默付出、总想带给别人快乐的角色所打动，不过从另一个角看，马素的价值似乎完全建立在别人身上，湘湘也很同意：“呢个女仔好伟大，煮个意粉都会将上面𠮶啲酱畀晒人哋食，自己净系食意粉咁样，总之佢见到人哋开心佢就开心，但系喺做嘅时候，我都有谂紧点解会有呢啲行为，或者系代入多啲去谂，其实可能因为我揾唔到自己嘅价值？我入面𠮶样嘢唔系好揾到嘅时候，我就可能见到其他人开心，我就会开心。呢样嘢系好重要，好似成日听人哋讲话施比受更为有福……” 听到这里，身旁的千渟忍不住笑著插嘴：“我想你帮我，下次揾你帮。”

对于这个默默付出的角色，Alton亦补上了细致的注脚，认为这正是香港版最能引起共鸣的地方：“因为我觉得呢个剧本呢，以我哋三个咁明确地话‘我哋三个想做剧团，喜剧’，就好似以我哋呢一个光环去包装，但其实我觉得呢套剧最好，我觉得最细致𠮶样嘢就系，佢身边嘅角色其实都好细致，然后就反映出其实我哋自己日常生活都有好多其实呢一种角色，好似细妹咁嘅角色，其实都喺现实生活每分每秒都存在住，所以你未必一定有一个做伟大演员嘅鸿图伟略喺个心度，但系你都可以喺个故事入面，揾到属于自己嘅共鸣。”

无悔三兄弟曾与友人合租工厦“窦口”：齐人时发现唔够位

在原著中，三子每逢完成大事，总会聚在一起吃一碗拉面作为仪式感。谈到现实生活中的仪式感，Lokman 透露在入行前，他们的舞蹈生活不止三兄弟，还有其他人：“系有我哋三个再加N个嘅，我哋有自己团，通常都系如果有啲大节日比赛，完咗都会一齐食饭，食个饭先至再散，有啲咁嘅习惯啰。咁你问我而家……有一排就好密嘅同佢（Alton），通常一个大project之后就会去旅行，一齐去一个地方，玩下放松下咁。”

剧集记者会当日，阿Dee强调“趁后生有个窦”，又表示相信这套剧会引起不少住工厦的追梦者共鸣，Alton透露过往都曾跟“3+N”的好友租过工厦做“窦”，坦言美好背后往往夹杂著香港特有的寸金尺土悲哀：“𠮶时好参差地有一个窦，因为我觉得大家一定会觉得，如果有一个属于自己嘅地方，揸住条锁匙，入到去就系自己嘅空间，咁就好幸福。但其实都系有困难嘅，首先香港就寸金尺土，一分钱一分货，以前都试过，真系一啲齐人嘅时候发现原来系唔够位，好窄好逼！又要听住隔篱𠮶啲房，其他单位都会有哋嘅声音，可能有打牌嘅声，可能有打鼓嘅声，咁所以都……佢有佢嘅梦幻嘅美好，但系都有佢嘅痛苦。”

Lokman与Alton想像没参加《造星》的另一人生

如果当初历史没有给予他们《全民造星》这个改写命运的转捩点，站在2026年的今天，Lokman和Alton会过著怎样的生活？Lokman坦言完全想像不到，他透露入行前，跳舞生涯早已走到了一个全职教学或纯粹从事舞蹈都难以维生的关口：“有谂过好多唔同嘅出路，有谂过可能去片场做下PA呀，去剧场做下啲ASM呀，咁样啰。咁所以，仲跳唔跳舞呢？可能都会跳，但系会唔会多呢？我答你唔到嘅真系，我真系幻想唔到，我都唔知道。”

Alton则指若非碰上这个机遇，跳舞最终只会退居成一项有闲暇或者要抽时间才会做的业余兴趣，毕竟体力有限，动力也会被现实慢慢消磨掉：“我自己估呀，我会觉得系你抽时间做，但系你仲系咪咁好体力呢？当你原来好多嘢要兼顾，你有好多嘢要负责嘅时候，有时候个动力系会不自觉地减少咗。”

湘湘不甘心放弃　千渟深知自己坐唔定难适应刻板上班族生活

至于两位女演员，如果没有入行又会否继续坚持？湘湘听完这条问题都“哗”了一声，透露自己当初是读会计，机缘巧合下才Quit U去读演艺学院，Lokman听罢笑言：“会计妹？” 湘湘解释这半途出家的缘由：“突然间我觉得好似想试下其他嘢，咁跟住就真系试下考APA，咁就入咗，跟住好似慢慢就顺理成章咁样，又好幸运地有唔同嘅演出机会咁样咁，但系我又真系冇谂到。不过因为啱啱真系读完四年，咁突然间叫我放弃呢，我都会唔甘心嘅，会想再试。但系你话我可唔可以坚持去到一直落去呢？如果真系未必有好多嘢发生嘅时候，可能我都唔可以话好肯定，但at least呢一刻，我知道我好热爱呢份工作，我好想继续落去，未来嘅嘢我都唔系好敢谂。”

而一向果敢的千渟，则坚信自己绝对无法忍受朝九晚五的刻板生活，因为她极度贪玩，什么都想玩、什么都想试：“我系好声需要每一日都喺唔同嘅地方度工作，又或者接触唔同嘅人，唔同嘅环境，所以你问我我一定系会继续。同埋点解我咁钟意而家嘅工作，就系我每一日都可以接触唔同嘅人，同人真系有好多唔同嘅connection，但系反而你可能喺间公司入面，你识𠮶啲人永远都……唔系永远嘅，大部分都系佢哋。”

红不起不等于失败　Alton：细个睇结果，大个睇过程

剧中的搞笑组合最终走向了无奈解散的结局，在大众约定俗成、成王败寇的目光中，这三位奋斗多年仍未能达到预期目标的年轻人，可能会被界定为“失败者”、“红唔起”等等。然而，千渟却对此表达了强烈的反对：“我又唔会咁睇㖞，因为我觉得呢个系佢哋嘅一个选择，咁同埋……失败其实点样系定义失败呢？我会建构喺呢一行点样为之成功呢？可能去到某啲位，你系要全世界识你先代表成功？你系要有奖项先代表成功？呢样嘢好难界定，我反而系会想知道，你自己想喺呢一个行业度你想要啲乜嘢啰，又或者𠮶个行业畀到啲乜嘢比你自己，我觉得丰富自己个心系反而紧要啰，咁所以我觉得呢个唔系失败。”一旁的 Lokman 亦零补充，仅说：“一样！”

Alton则借用了Lokman在其他访问中的智慧，解构了从追求结果变成著重过程的心态转变，直言年轻时看成败很简单，大个了才知道过程是由无数个结果建构出来的：“话细个呢就睇结果多啲嘅，细个对于成功同失败呢，睇得简单啲嘅咁，但系我觉得大咗呢，就系会觉得系过程，但其实过程都由好多个结果建构出嚟嘅，所以我觉得你谂得通，唔系叫你去盲目地去相信呢个道理，但系当你经历过若干嘅事情之后，你就会觉得呢个睇法其实系会……唔系叫说服到自己，但你会明白啰。我谂我哋四个从事紧呢个行业，都会好明白过程系好重要嘅一件事。”

湘湘指放弃比追梦需要更大勇气　选择放弃或代表为人生负责

湘湘则感性地指出，追梦固然需要莫大的勇气，但当来到一个阶段，能清醒地选择放弃梦想，实情比追梦需要更大的勇气：“其实呢个系一个选择，我觉得呢个系作为一个成年人，可能真系长大，喺唔同阶段。你20岁开始追梦，30岁开始你决定继唔继续行落去，呢个可能系一个你对自己未来人生负责任嘅一个选择，同埋我觉得……可能系某一个瞬间你就觉得你长大喇，即系其实而家虽然我都已经廿几岁，成年咗好耐，但系我成日都觉得自己好似好低B咁样啰，好似仲系一个小朋友咁，但系可能你去到一个位，你就觉得好似自己真系大个喇，为自己嘅选择去负责任，我就觉得呢个系一个，我都好欣赏‘红白蓝’佢哋喺𠮶个时刻做出呢个决定，其实系一个对自己负责任嘅一个行为，同埋都系成功㗎我自己觉得系，因为佢哋进入人生嘅下一个阶段。”

与梦想的距离　Lokman：著重内在多啲

访问尾声，记者好奇四位觉得现阶段距离真正达成梦想还有多远距离，Lokman 听后不讳言这些问题很难答，还追问“何谓梦想？”、“梦想是否只得一个？”，他认为真的很难：“嗱，有啲人就系话，我要五年之后揾到一百万，咁系咪梦想吖？可以系嘅；我听日要食个叉烧饭，咁系咪梦想吖？咁佢分别只不过系一年后同埋听日，叉烧饭同一百万咋嘛。咁所以我会觉得好难答嘅就系，咁边一个先系呀？系咪净系可以得一个呢？所以成日呢啲问题就会好难，即系我又唔想特登塞一个……‘我要攞金像奖！呢个就系我嘅梦想喇！’好虚无㗎嘛，你好难好难话‘我一定要十年之后攞！一定！’唔会㗎，咁所以就会觉得，好难答啰，咁当然一定有好多唔同嘅曾经拥有过嘅梦想，或者系曾经拥有过自己想做嘅事情啦啰。”不过他其后又再补充，近年自己悄然把想得到的事物，从外在的荣誉回归到了内在的修炼，Lokman说：“有阵时反而唔会系外在嘅嘢，而家嘅梦想，反而系内在嘅嘢多啲，我会希望自己乜嘢乜嘢，可以自在啲、可以智慧高啲，反而系呢啲方向啰，咁你外边嘅梦想呢，就相对可能会容易啲达成喇。”

千渟则自言已经梦想成真，因为她就是想做演员、拍戏、拍剧，她表示：“我唔会谂到好远，但系喺当下呢一刻，我就会好enjoy所有嘢啰，同埋我会好放开啰，俾所有嘢入嚟咁样啰。” 而Alton的解读则像一句踏实的座右铭，为所有在路上的人打气：“你话争几远吖嘛？我自己觉得咁你冇放弃，同埋你有开始，就已经系一半啰。”

最后，湘湘把梦想喻为“天国的阶梯”，并以此总结访问：“我嘅梦想，我会话好似天国嘅阶梯咁样，系见唔到。人喺呢个世界上有好多无限嘅可能性，我唔想将呢样嘢定义为一样嘢啰，可能好似啱啱讲，唔同嘅阶段，你可能会有唔同嘅嘢发生，我都唔知，但系我会话我希望可以尝试更多唔同嘅可能性，我会想睇到更多唔同面向嘅自己，同埋我个Limit系可以去到几远呢？”《喜剧开场》的短剧会完结，但四位的人生长剧，才刚迎来精彩的章节。