“我谂我都系适合惨㗎。”陈瑞辉（Frankie）这句话听起来像玩笑，更似是《IT狗2.0》中Never会讲的对白，然而也是他近年慢慢找到自己的答案。相隔两年推出新歌《是日恋爱》，他决定做一首彻底的惨情歌，不是因为想刻意悲伤，而是在《W.T.F.》唱过《生还者》和《绝》后他慢慢确立到自己定位，直言：“两首嘅Feedback我都觉得好好，咁不如自己真系做一首试下。以前嘅我好想令到大家好开心，但系有心就无力嘅，做唔到真系好令到大家开心𠮶样嘢，但系反而《W.T.F.》唱一啲惨情歌，大家又好有共鸣。咁我又觉得，令到大家有情绪嘅抒发，或者一个思想上嘅同温层，都系一件好事。”我们从小到大都听过太多“要开心啲”、“唔好谂咁多”，但现实里，悲伤很多时并不会因为一句安慰就即时消失。比起急著要把人逗笑，有时有人愿意温柔地陪你度过悲伤、告诉你绝非一个人，反而是一种更贴地实际的安慰。
除了讲到对悲伤的理解，访问中亦延伸到Frankie的恋爱观。MV中的男主角觉得自己配不上女生，于是选择离开；Frankie坦言，若现实中遇到同样情况，他也可能会走。问到为何不选择努力令自己变得更好，继而配得上对方，Frankie就说：“我自己变得更好去配得上佢，如果系我变得更好嘅，咁𠮶个系咪仲系我呢？”
服装：@bothparis @i.t_too @musium
形象：WAN JANSCO @THECLOTHESURGEON
发型：Seiko Sin @ Hair Culture
化妆：Cori Wong, Yumi Cheung

《W.T.F.》后找到惨情定位　由想令人开心到陪人度过悲伤

陈瑞辉（Frankie）相隔两年推出个人第二首单曲《是日恋爱》，讲到在首支Solo作品《皮思苦》后，是否需要再三争取才有机会出歌，他指自己一边争取、一边增值自己：“去揾下究竟自己真系想出乜嘢题材嘅歌，所以都差唔多，争取争取又揾下揾下，又争取又揾下，咁就差唔多，我觉得而家出歌系一个好好嘅时候。”

《是日恋爱》是首惨情歌，某程度上亦是Frankie近年经历舞台、演唱会与自我探索后得出的答案。过去他未必清楚自己要唱甚么，也未遇到一首“我系要出呢首喇！”的歌，直到两次《W.T.F.》演唱会中演绎《生还者》与《绝》获得正面回响后，才慢慢坚定地确定自己想走的方向：“两首嘅Feedback我都觉得好好，咁不如自己真系做一首试下，大家系咪真系钟意我走呢个路线，我又觉得呢个路线我唔抗拒，我觉得都几啱我自己嘅。”

这种“适合惨”的发现，对Frankie来说不只是音乐方向，也是他重新理解自己的过程。以前的他，很想令大家开心，但有时会觉得有心无力，但慢慢地他发现，原来悲伤也可以是一种陪伴，比刻意要令人开心引发更大共鸣。他形容：“以前嘅我好想令到大家好开心，但系有心就无力嘅，做唔到真系好令到大家开心𠮶样嘢，但系反而《W.T.F.》唱一啲惨情歌，大家又好有共鸣。咁我又觉得，令到大家有情绪嘅抒发，或者一个思想上嘅同温层，都系一件好事。”他更笑言，拍完MV第一Take后，见到自己呼天抢地发脾气，已马上跟经理人阿Yu说：“我谂我都系适合惨㗎。”对方也回应：“系呀，你适合惨㗎。”于是他便决定以惨情歌为自己定位。

主动向恒仔提出改MV结局　舞台剧令他变得从容敢话事

《是日恋爱》MV由恒仔@ToNick执导，讲述一段无疾而终的感情，男主角因为视力问题，觉得自己配不上女友，选择悄然离开，最初恒仔构想的结局，是男女主角在斑马线越过后便完结，交代男主角知道女生过得好便足够；但Frankie希望在这份悲伤中加入少许留白，遂主动提出自己对结局的想法：“最尾倾完之后呢，女主角就一个回头，究竟佢系见到我吖？定系觉得有啲嘢喺度吖？定系佢会唔会跑返转头吖？咁样呢个就交畀观众嘅留白。”他坦言因为这首歌太惨了，他不想“惨到尽”，所以想留点美好的幻想空间予观众：“观众自己消化，佢觉得系美好嘅，咁佢就系美好㗎喇。”

过往Frankie曾形容自己不太够胆话事，但今次他能够主动提出对MV的想法，与近年演舞台剧的经历也不无关系，从《大象的告别式》到《小男人周记》，舞台剧的明快节奏、低容错率和即场反应，使他一步一步打开自己，慢慢学会与观众交流、在众人面前表达和打开自己。而《W.T.F.》对他而言也是一次很重要的改变：“我觉得我个人表达到自己嘅时候，系最从容、最自在嘅时候，可能就系人哋想睇到最系我嘅时候。我觉得《W.T.F.》都可以帮我，经过𠮶次嘅经历，揾到何谓自己可以从容。”

MV崩溃发人生最大脾气　现实中善忘很少动怒

MV中Frankie哭得撕心裂肺，其中一场更要由甜蜜视像对话，瞬间转到下一秒的崩溃发脾气，对平日甚少表露愤怒的他来说，是一次极大挑战，因为他从未试过发这么大的脾气：“一来我未试过发咁大脾气，二来就系个情绪要无啦啦好开心、好开心，跟住下一个shot就要拍你好唔开心、发脾气，仲要系真系发脾气𠮶只发脾气，掉哂嘢呀，揈开哂啲嘢呀，咁样发脾气！咁真系要成队Crew停一停，我谂停半首歌嘅时间，俾我酝酿下个情绪先至可以继续拍摄。”

现实中的Frankie也不是一个习惯发脾气的人。问到若有愤怒或不开心时如何抒发，他的答案很简单：“冇呀，打下机㗎咋都系。我最多就系喺屋企，喺屋企最多做抒发呢个活动嘅呢，通常都系睇下片呀，或者成日都开啲日本动画睇，差唔多而家App上面嘅每一套我都有睇过下，通常都系放工，返到屋企好攰，冇嘢做要回气，跟住就求其揿啲嘢睇下，睇睇下之后个人就返咗嚟。”出名记性差的他笑言，自己记性有限其实也是一种幸福，善忘反而帮他度过很多情绪关口：“我成日都会唔记得嘢嘅，咁我嘅善忘系帮到我喺呢个位争取咗唔少嘅力量，做少好多嘢。”

当下当然会有愤怒，但对Frankie来说，那些情绪往往来得快，散得也快，所以他会先深呼吸，让自己冷静，暂时不去想那件事，过了一会便能用客观角度去看同一件事，之后再打阵机已忘记了。

从小习惯自己搞掂　不轻易向人求救

Frankie自言由细到大都是“乜都自己搞掂”的人，很少主动找人倾诉或求救：“但系如果真系做到呢一步呢，我就觉得件事真系好严重，同埋自己都搞唔掂，先至会做呢一步。”这种性格，与他的成长经历大概也有关系，Frankie初中时父亲离世，自此以后，他更不想令人担心自己：“好多事都自己搞得掂就自己搞掂啦，有啲咩问题就自己搞掂先，真系搞唔掂喇，先至揾人，但系揾都未必系揾最亲嘅，都唔想佢地担心。”

不过，他强调这不代表最亲密的人进不了他的世界，尽管他未必会第一时间向家人或伴侣求救，但仍然会让对方知道自己的状态，只是总会选择讲一个修饰过的版本，以免对方过分担心：“唔揾佢求救啫，但系唔会唔揾佢讲嘅。咁但系……讲𠮶阵就梗系讲个好少少嘅Version畀佢地听啦，就冇咁担心啦，‘我搞得掂㗎喇。’跟住转头可能就揾个Friend，‘哎呀，搞唔掂呀！’”

越大件事越学识冷静　世界观格格不入自觉可贵

Frankie其中一个代表作，是拍《全民造星》时落泪的黄金画面，获花姐、宝姐等幕后大赞靓仔，ERROR出道作《404》都提到“Frankie得滴眼泪100分”。虽然他随便哭一哭已是靓仔如MV级数，但现实中他却很少哭，因为在他看来，哭除了抒发情绪之外，并不能解决问题：“有问题嘅时候就要解决咗佢㗎嘛，但系你又喊，咁即系将𠮶个问题留咗喺度冇解决啰。你喊，你情绪又牵引咗唔知去边，又创造咗另一个问题，所以通常我觉得越大件事发生，我就越会冷静。”

若要他回想现实生活中上一次喊得很厉害，答案竟然要追溯到小学六年级！这件事影响大到至今记忆犹新，他忆述：“𠮶个Image好大呀𠮶件事真系，小学我记得𠮶阵六年班，𠮶阵我系一个搭校车嘅，我系一个车长嘅身份嚟㗎，咁我梗系要做啲好嘅品行畀人睇啦，但系我有一日呢，就冲落去放学喇，喺班房出嚟喇，冲落去搭校车𠮶阵呢，唔小心跳咗级，跟住就畀𠮶一层嘅Prefect罚咗，唔知写手册定乜嘢，𠮶下我系觉得‘佢又有跳，我又有跳……净系搞我？’跟住就好唔开心啰，小学嘅思想系咁，真系好唔开心，𠮶日我记得我返到屋企冚埋个被窦自己喺度喊，‘哎呀，好惨呀，好惨呀！’但又冇同阿妈讲。”

MIRROR兄弟常说Frankie看世界的角度与别不同，他自己也认同，有时大家的想法未必能完全融合，例如别人给出“鸡”与“鸭”两个选项，很多人会自然走向鸡的一边，但他却会说自己选择“鹅”，十分“跳tone”，幸好队友都明白，也懂得把他拉回来，又能继续对话。不过他又不会因此觉得自己与旁人格格不入，并说：“我觉得几好㖞呢样嘢，因为我睇到啲佢哋个个人都睇唔到嘅嘢，咁我觉得呢个系我可贵嘅地方。”

舒文为他找到最好听声音　赞对方有耐性冇审美疲劳

《是日恋爱》由舒文监制，Frankie曾形容，经舒文调教后，他从未听过自己唱歌可以如此好听，原来对方在正式录音前，已不断试他的声线、音调，让他用不同感觉演绎同一段歌词，直至找到最适合他的声音：“我觉得舒老板好犀利，佢无审美疲劳，佢好知道自己喺我身上要揾到一把咩嘅声音，我自己都唔知做咩嘢嘅时候，佢就揾到！𠮶一下都系‘啊，好听㖞！’”

外界或会好奇，舒文会否很严厉？Frankie却毫不觉得那是责骂，更说：“对于我嚟讲舒老板𠮶只唔系严厉，我觉得舒老板佢好畀个心出嚟，好耐性咁去教我，因为如果舒老板脾气上容忍唔到我，我觉得佢唔会肯同我讲咁多，你要做啲乜嘢、你个方向系啲乜嘢、你仲争啲乜嘢……‘你冇咗啲乜嘢㖞，你冇咗条女㖞！语气唔得呀、语气你要再惨啲，或者再挂住多啲……’我觉得既然舒老板都咁有心，同我讲好多呢啲嘢，我真系冇take过任何呢啲嘢成为一个责骂。”

录音时当然有压力，但那份压力不是来自舒文，而是来自自己，Frankie说录音前A&R同事都有问他对住舒老板会否很大压力，他说压力很大，因为好像怎样做都无法达到舒老板要求，但他不断提醒自己必须虚心学习，也感谢舒老板的耐性。他又补充：“𠮶个压力系一个好恒常会出现嘅感觉，我觉得唔系坏事，呢个压力系帮到自己去做更好嘅一个压力，我觉得唔系负面嘅嘢。”

与舒文合作是天意　最大得著竟是中文理解开窍

整个录音过程中，Frankie觉得自己最大得著，竟然是对中文理解开窍了，这个答案听起来一贯另类，却很符合他的人设。他解释：“舒老板同好多前辈合作过，容祖儿、陈奕迅，佢哋都对用字𠮶个字系咩感觉、用咩语气都好执著，同埋亦都好有见解，所以我喺呢啲位其实个得著系最大嘅。一直以嚟我对中文字嘅根基都唔算系特别深厚，我唔知道原来一个字可以有几个唱法，真系好似做戏咁，有几个做法去令到𠮶件事有唔同嘅层次，咁我呢个真系今次非常受教。”

原来舒文今次是首次跟MIRROR成员合作，而Frankie选择找他监制惨情歌也并非偶然，似乎是天意：“我之前𠮶首系比较轻快嘅跳舞歌，而一啲慢啲嘅惨情歌，喺我嘅音乐世界认知上嚟讲，舒老板都真系好老行尊，好适合同埋好有知识去做一首咁嘅歌。咁所以我自己个心入面，都系Top嚟㗎喇舒老板，跟住再同A&R嘅同事倾，再畀咗个Demo Lokman（杨乐文）听啦，Lokman同埋A&R同事竟然都有讲到舒老板呢个名！咁就不如真系试下啦。”

恋爱中爱Deep talk　倘若觉得配不上对方会离开

《是日恋爱》MV中，男主角觉得自己配不上女生，最终选择离开。Frankie表示现实中未试过类似情况，但若真的发生在自己身上，他认为自己大概也会走，问他是否说得上不拖泥带水的人，他再次表示自己“好跳tone”：“可能无啦啦就同佢‘走喇，bye！’”如此断崖式分手，似乎会伤透对方的心，问到为何不选择努力令自己变得更好，继而配得上对方，Frankie就说：“我自己变得更好去配得上佢，如果系我变得更好嘅，咁𠮶个系咪仲系我呢？如果系真系要变得更好，咁不如我再变得更好先继续啦，我自己会系咁谂。其实男女嘅关系睇下适唔适合㗎啫，咁呢个阶段，我哋系适合嘅，咁如果我step up咗，你又step up咗，咁𠮶个阶段适唔适合呢？咁都系唔知㗎嘛，都系一个问号嚟㗎嘛，你冇得话我哋一齐成长，一定系啱㗎嘛段关系。”

其实他也并非完全不沟通的人，他笑言如果是自己，至少会留下很多hints，可能写张纸仔，让对方知道一点端倪，这种听起来像是随时会“人间蒸发”的做法，令记者都不禁惊一惊，Frankie随即补充，若只是日常相处中步伐不一致、性格不太合，他其实会Deep Talk沟通解决：“我系好钟意Deep Talk嘅人！”并重申：“唔会咁跳tone嘅！”

未敢谂开个唱　渴望把歌曲送给悲伤的每一位

最后，讲到Solo Concert会否成为下一个目标，他坦言暂时未会，毕竟现时只有两首Solo歌，所以距离个人演唱会还是一段很长的路，然而他感谢大家听完他唱《绝》的鼓励，也给了他很大信心，并想跟支持自己的朋友说：“上次好似唱完一首歌就释怀咗好多咁样，所以都希望可以藉住今次嘅新歌《是日恋爱》，大家听完之后，将大家嘅唔开心同埋悲伤都‘hur’哂出嚟就好。呢首歌主要系送畀皮宝宝，亦都系送畀悲伤嘅每一位，希望大家早日康复，开心啲！”