无线剧《飞常日志II》今日（21日）在中环码头举行Busking活动宣传，适逢今日是父亲节，主演之一的钟柔美就唱出讲父子情的《单车》（原唱：陈奕迅），歌颂父爱。剧集主角马国明一向是圈中一等一孝顺仔，然而去年底父亲离世，马国明与刘颖旋接受《01娱乐》访问时，都坦言听到《单车》会感触，他说：“我哋今朝喺化妆间嘅时候先提起呢样嘢，话好似父亲节永远都冇乜人重视咁样，好似大家都重视母亲节，我就回想返以前细个其实我都系，因为你好细个嘅时候，keep住每一日都系妈咪照顾你，爸爸出咗去揾钱，你唔知，你见佢唔到，尤其是我以前我爹哋系轮班，因为佢做煤气，可能有漏煤气，佢凌晨两三点都要出去做嘢，𠮶时我都瞓咗觉，你唔知㗎嘛。到我而家大个先发觉，原来爹哋出去揾钱真系好辛苦，以前细个唔知，每日24小时对住我妈咪，大大下就知道，爹哋揾钱系好辛苦，大家真系要孝顺爹哋。”他透露明天会回去陪母亲，稍后会与太太汤洛雯及其家人食饭：“嚟紧都要同阿汤嘅爹哋妈咪食餐饭，因为父亲节，亦都系阿汤个妈咪就嚟生日，我哋都会再食餐饭庆祝。”

刘颖旋大骚语言能力 被问能否接受姊弟恋：个样唔似细好多都冇所谓

讲到剧集中，刘颖旋一出场已大晒超强语言能力，包括英文、普通话和日文，她说：“𠮶阵时都难㗎，同埋都好惊，但系因为我哋剧组监制好好，已经预早揾咗啲同事，录咗啲音俾我，我就有标准嘅录音可以不停跟住佢嚟背，帮咗我好多。（记者：日文系完全听唔出你本身唔识。）真㗎？多谢你呀！”马明亦表示：“我以为你识日文添㖞，𠮶场戏真系。”问到现时是否还记得那段日文对白，她笑说：“我净系记得wareware wa（我々は）。”并已忘记其意思，只记得大概是些客套话。剧中她被周嘉洛猛烈追求，但刘颖旋只当对方弟弟，更叫对方“小朋友”，马明就说：“都唔系㗎，睇你钟唔钟意啦，睇你戏入面钟唔钟意，有啲女仔可能钟意啲，唔介意男仔细过佢少少，都得嘅，睇你介唔介意。”现实中刘颖旋未试过被“弟弟”追求，马明问她能否接受，她说：“如果个样唔似细好多，都冇乜所谓。”马明即谓：“即系最紧要系外表！”

曹永廉开骚失声 马国明局住顶上：要衰咪三个一齐衰

日前马明、萧正楠、曹永廉去美国洛杉矶开骚，但阿廉竟突然在开场前失声，马明要临时顶上，他表示：“系呀，佢无啦啦失咗声！好大镬！成个show开始之前佢失咗声。冇改rundown呀，我同阿萧帮佢顶啰，估唔到我都要帮佢顶，我唱歌唔系叻㗎嘛。”他透露事前冇彩排过对方solo的部份，幸好自己有听过相关曲目，他忆述：“我当时嘅心态就系，三个人一齐嚟开show，要衰咪三个一齐衰，又估唔到反应咁好！𠮶part突然间好有兄弟情，因为阿廉唱唔到，阿萧同佢一齐唱，我后尾再走埋出去同佢一齐唱，之后全场一齐同佢一齐唱。突然间……而家反而成个show最好气氛喺𠮶度，所以有时真系塞翁失马焉知非福，而家阿廉又红咗！”他指阿廉出发前已经抱恙，彩排时还能出声，但正式演出时却失声，不过现时已痊愈七、八成。

刘颖旋参加明星篮球赛 兴奋与前国家队队长杨力维组队

三位人夫又一起拍片，指冇太太陪伴很不开心，但网民就笑言唔相信，马明解释：“我嘅表情就系真嘅，阿萧嘅表情呢……我就唔知系咪啦，阿萧同阿廉我都唔知系唔系，我就系真嘅。”不过他认为无论如何，三个好朋友一同去海外出show，都是很开心的事，又可以揾真银，舒服过拍戏，三个合拍又好倾，所以整个旅程都很开心。

至于刘颖旋，她日前去茂名参加明星篮球赛，表示很兴奋，能跟前国家队队长杨力维组队，她说：“我好开心呀，今次有第一次去茂名，去到好多现场观众、好热闹，我哋好庆幸可以有中国国家队嘅其中一个成员杨力维同我哋一齐打，所以𠮶件事系好开心，同埋大家都好合拍！”马明更表示：“我听讲你打得叻过啲男同事！”刘颖旋则谦称是大家礼让而已，而她亦未发挥到100%水准。问马明有否打开波，他说：“我净系对踢波有兴趣，篮球我真系唔识打。小学一年班嘅时候掂过，因为我小学一、二年班就开始接触篮球同足球，但我好快就拣咗足球，小学一年班之后就冇掂过篮球。”