由伍健雄监制、吴家伟执导的电影《欲望寄生》今日（22日）举行开镜拜神仪式，今次阵容有双影后袁咏仪（靓靓）、余香凝（Jennifer），以及视后李佳芯等。靓靓及Jennifer一同受访，靓靓指感觉梦幻，而Jennifer就相当崇拜靓靓，指与对方拍戏是自己最大收获，最爱靓靓的《新不了情》及《国产凌凌漆》：“拍嘅时候我都唔够胆同靓靓示爱，我惊吓亲佢，我成日望吓佢，我哋好多对手戏嘅时候，我都系咁望佢，‘哗！系靓靓呀！’心入面有个咁嘅OS。”她又说：“陆骏光都有问我，你觉得我好唔好走过去示爱？我话你唔好啦。”而靓靓亦赞Jennifer：“我觉得而家……你都唔系upcoming，已经系up紧𠮶啲，辨识度同埋演技，都系觉得有机会合作都系好嘅。”

今次电影中，二人是银行中的上司下属，同时是朋友，靓靓指过往未做过这类性格的人物，亦是她觉得剧本吸引之处。问到有什么难度，靓靓表示：“导演话你唔够狗，要再衰啲。”而Jennifer也透露：“之前未演过，之前比较正义一啲，今次有少少唔同。”问到她是否都被要求“狗啲”，靓靓说：“总之冇个好人啦！”讲到首次合作，靓靓再赞余香凝：“我第一日开工我就返去同我老公讲，佢真系有料到！我觉得佢好好，我老公话‘点呀？’我话佢好好，好入到个角色，同埋好有心机，睇佢对眼就睇到，呃唔到人。”

问到老公张智霖有否来探班，靓靓大爆：“佢路经过，嚟过一次，食咗我哋一个饭，跟住就走咗，都唔明点解佢可以咁厚颜！”早前靓靓与郭富城的太太方媛参加国内真人骚《五十公里桃花坞6》，靓靓表示，尽管自己与张智霖和郭富城是相识数十年的好友，两家也时常会在香港聚会，但她与方媛“一年仅见面几次，并不熟悉”，并观察到方媛在聚会中总是独自坐在角落局促不安，难以融入众人话题。节目其中一集，众人需要把著毛线球递给在节目中自己最想了解的人，靓靓把毛线球递给了方媛。

问靓靓觉得方媛后来可有越来越投入，她说：“其实佢越嚟越好，好顺利，佢好习惯呀后面已经，初初有啲唔惯，后面已经好好、好顺利，大家亦都好开心，啱啱录晒四期。”靓靓指后来也了解方媛多了，并谓：“佢都系一个比较偏向内向嘅人，要多啲时间，放松啲，始终佢第一次录综艺，都系叫佢放松啲。”被问会否叫郭富城多带她出来，靓靓直言：“其实都有嘅，不过始终每个人性格唔一样，我亦都好明好难话好似我咁多嘢讲，佢比较内向啲，都要习惯。”

最后，讲到施可莹（Lillian）昨日因卵巢癌离世，过往她多次主持电影谢票，Jennifer亦有发文悼念。Jennifer在访问中哽咽表示：“寻日知道呢个消息嘅时候都好心痛，都叫做战友，我哋由《死尸死时四十四》、《白日之下》到最后《双囍》，都好多谢佢喺我生命中出现，我哋跑过好多谢票场，多谢佢为电影界嘅付出。佢系一个好开心、好坚强、好乐观、做嘢态度好好好好好嘅女仔，佢留下嘅回忆系俾大家永远嘅回忆，大家会永远记得佢，希望佢喺第二个国度可以冇病冇痛，开开心心继续做佢自己。”而靓靓都希望施可莹能去到冇病冇痛的净土。