由伍健雄监制、吴家伟执导的电影《欲望寄生》今日（22日）举行开镜拜神仪式，关嘉敏都是演员之一，更指今次是第一次拍戏！日前她在活动上透露，拍剧时曾被男演员在冇沟通情况下临时加咀戏，当时不敢出声，但事后哭了很久，传媒及网民纷纷竞猜嫌疑人，有指涉事对手为邓英敏，不过关嘉敏受访时就否认，指邓英敏是很好的前辈，并澄清：“唔系！唔系唔系唔系，大家唔好乱估，放心，唔系，我费事搞到前辈。”讲到过往就连搭地铁屡遇露体狂，以及有人做出猥窃行为，关嘉敏鼓励女生们一定要勇敢发声：“真系要讲出嚟，唔可以怕㗎！”

首次拍电影尚在适应 与李佳芯饰演女警

关嘉敏以一身青春及带夏日气息的打扮现身开镜拜神仪式，透露与戏中造型不同，因为於戏内做型格及男仔头的警察，与李佳芯（Ali）有大量对手戏，而今次亦是二人首次合作。能与视后Ali及双影后袁咏仪余香凝一同拍戏，关嘉敏形容开工“星光熠熠”，对拍戏初哥来说是很好的学习机会，她表示：“因为我自己第一次接触电影，我自己都喺度平衡紧电影同电视剧𠮶个感觉，系点样去拿捏，我觉得呢个亦都系佢哋做咗一个好好嘅示范俾我睇。”她指电视与电影节奏完全不同，自己也在适应当中。

靠自己开榴梿 自爆择偶必须识杀曱甴：惊嘅千祈唔好追我

关嘉敏透露今次冇感情戏，笑言想下次拍戏时可以“玩弄感情”，讲到早前她自己开榴梿，是否已叠埋心水靠自己不靠男人，她笑说：“冇错，果然觉得靠自己系最好，因为本身我都谂住靠男人，就系靠我老豆，然后我谂谂吓都系唔好，因为我惊啲榴梿会坏，我就话不如自己上网睇，咁啱见到郑融有开榴梿，我就喺佢条片度学，多谢，多谢郑融！”讲到开榴梿、换灯胆都可以靠自己，还有什么要靠男人，记者提到“杀曱甴”，她激动和应：“系！我真系好惊曱甴！我好惊昆虫，如果有个男人喺度就可以帮我杀昆虫，多谢你！呢个好重要！边个惊嘅就千祈唔好追求我，如果喺我面前杀曱甴，我觉得好有魅力。”

自爆遭男星加亲热戏后惹揣测 澄清非邓英敏：佢非常好

早前关嘉敏被问起拍剧时有否遇过“加亲热戏”的男艺人，她透露曾有位对手在冇沟通过的情况下临时加咀戏，虽然未去到伸脷，但都吓亲她，事后在家里哭了很久。而曾跟关嘉敏在《奔跑吧！勇敢的女人们》拍激咀戏的邓英敏成为嫌疑人，不过关嘉敏就连讲九次“唔系”：“吓！唔系，唔系唔系唔系唔系，大家唔好乱估，唔系唔系唔系，放心唔系。我费事搞到前辈，虽然之前已经过咗去咁耐，我觉得呢个系一个经历，同埋都系教识我一样嘢，就系唔系一件坏事嚟嘅。（记者：即系帮佢平反？）冇呀，唔系英敏哥。”问到与邓英敏的合作经验如何，她表示：“佢系一个都非常之好嘅前辈，同埋都细心嘅，同埋佢系一个几Nice嘅人。”

后悔怕阻人收工事发后不敢出声 强调女仔唔舒服必须表达

关嘉敏在事发时未有即时出声，问到是否因为对方的资历或自己太新而不敢开声，她坦言：“两样都有，因为我自己觉得我作为一个新人，加上有前辈喺度，我会唔够胆讲咁多嘢。同埋我唔够胆阻住人哋收工，我惊讲完之后好似好劳师动众，我又好怕，又唔知点样讲，但系我觉得作为女仔，遇到咁嘅事系需要讲出嚟。”至于该次经历是否对她影响很大，关嘉敏认真思索后，苦笑说：“系！我自己觉得要调节个心理状况，因为多数唔净止演员，我觉得如果系女仔遇到一啲事情系觉得唔舒服嘅话，真系要记得开声讲，𠮶次经历我系觉得，我系需要即时、立刻讲俾人哋知我唔舒服，咁样就唔会令到自己咁唔开心咗一段时间。”

搭港铁屡遇露体狂毛手毛脚：真系要讲出嚟 唔可以怕

此外，谈到近年港铁或公众场所常有偷拍事件发生，问关嘉敏曾否有过类似经历，或会否出声制止，她不讳言：“我遇过好多，但系我都系冇一次够胆讲，因为𠮶时仲细，我𠮶时仲着紧校服读紧书，搭紧地铁嘅时候，对面有男人对住我做猥琐嘅行为，直接系猥琐！所以我𠮶吓系吓亲，同埋我真系……我谂一两年，间唔时都遇到露体狂，或者摸手摸脚嘅人，但系好彩隔篱都有朋友都会帮我出声，令到我冇咁惊。但系我觉得如果真系自己一个去承受嘅话，就真系太Heavy，所以真系要讲出嚟，唔可以怕㗎！”