80年代TVB当家花旦、廖启智遗孀陈敏儿本月12日因病离世，终年66岁。其大仔廖文哲及次子廖文信，今日（25日）下午为妈妈举行安息礼，二人先后致辞缅怀母亲，文信忆述自己心目中妈妈的形象、珍贵回忆、对方教诲以及两度带妈妈去澳大利亚和蒙古睇星：“我哋喺蒙古上面见到夜空、银河系，清晰到连卫星都见到，我阿妈都好开心，我都好开心，呢件事令到我阿妈同我讲佢已经冇遗憾，因为佢已经睇到佢最想要嘅嘢。”至于大仔文哲发言时则痛哭，表示：“想多谢我妈妈，因为佢话俾我听咩系无条件嘅爱。”他坦言自己长大后，母子关系不及儿时亲近，但庆幸：“佢最后清醒嘅一刻，我有讲到我要讲嘅嘢，所以好多谢你。”之后两兄弟更自弹自唱ONE OK ROCK的《The Pilot </3》送给母亲。

用毕业相因完成人生学习旅程

播道神学院院长文见欢主礼今次安息礼，一开初他先解释为何陈敏儿会选了毕业相作为主题照片，他说：“五年前，智叔（廖启智）安息礼所拣嘅主题系跑步，因为智叔好钟意跑步，人生好似一场赛跑。而敏儿所选择嘅就系一个学习旅程，佢所睇到嘅就系一个人生嘅学习旅程，如今佢毕业喇，佢完成咗上帝要佢所学习嘅，所以今日除咗系一个安息礼，同样系敏儿嘅毕业礼，我哋一齐见证佢毕业。”

二子大赞母亲坚强 强忍哀痛为亡父筹备安息礼

之后二子文信先发言缅怀妈妈，他面带微笑，感谢妈妈的朋友出现，见到有很多人支持妈妈，他非常感动，也感谢筹备过程中有很多陈敏儿的朋友帮忙，之后讲起母子相处的回忆：“我深深感受到，原来要筹备一个安息礼，喺呢个时候去搞，系一啲都唔容易，我发现当初爸爸走𠮶阵，我妈妈真系好tough嘅一个人，佢喺咁悲痛嘅情况下，都可以一个人handle好多嘢。认识我妈妈嘅朋友，应该都会觉得佢系好坚强、好tough嘅一个女子，但系咁当然佢真系一个好tough嘅人，但系同时佢亦都好有依靠人嘅一面。我呢排揾啲相，睇返啲旧相𠮶阵，都有好多回忆返晒嚟，我平时同妈妈嘅相处都好简单，我哋可能会喺屋企一齐喺张梳化度挨住大家，一齐睇电视，睇YouTube，去睇一啲佢睇嘅剧，我哋出街𠮶阵有时佢都会拖住我揽住我，然后我病咗𠮶阵佢都会好照顾我好担心我，揾好多唔同嘅方法去……务求令到我可以好舒适咁度过我嘅病。同埋之前佢都仲精神𠮶阵，会揸车车我返工，我哋会一齐喺架车度倾好多嘢，呢啲都系一啲我哋好平淡，但系好珍贵嘅回忆嚟嘅。”

两度带母亲睇星：佢话已经冇遗憾

文信续说两度同家人去睇星的回忆，又指智叔离世后，自己更珍惜与母亲相处的时间，希望能制造多些回忆：“当年爸爸离去令到我发现世事真系难料，我爸爸本身好似好健康，但系喺好短嘅时间就离开，俾我知道原来亲人唔会话可以一世陪住你，系会有离开嘅时间。因为唔想有遗憾，所以我喺爸爸走咗之后，尽量揾时间陪妈妈，制造多啲回忆。之前我喺澳大利亚读书，我毕业全家嚟咗探我，我哋去咗个Road trip，有一晚我阿妈突然间话好想去睇星，我就车咗佢出去睇，喺湖边𠮶度望住，真系好多星，睇到好清楚嘅银河系，呢件事对我哋嚟讲都系一个好深刻嘅一件事。我记得𠮶时我阿爸好唔满意，佢瞓咗，我哋冇叫佢，我哋自私去睇，佢都提咗好多次，但系都冇办法啦，之后喺香港再补返啦，但系之后都冇机会同佢睇返。由于我阿妈讲过好挂住当日嘅星空，好想睇多次咁靓嘅夜空，我哋喺上年落实去蒙古，我之前去蒙古真系见到好多星，我带佢去，虽然当中遇到啲问题，就系佢要做一个手术，我哋都唔知去唔去得成，但系好感恩最后我哋都成功去到！我哋喺蒙古上面见到夜空、银河系，清晰到连卫星都见到，我阿妈都好开心，我都好开心，呢件事令到我阿妈同我讲佢已经冇遗憾，因为佢已经睇到佢最想要嘅嘢。”

铭记母亲曾教自己“五道”

她又分享母亲教了她“五道”，使他铭记于心：“五道分别就系道谢、道爱、道歉、道量，同埋道别，我哋在世嘅时候一定要多啲同至亲嘅人分享呢啲说话，你唔讲人哋系唔会知道，当佢走咗嘅时候你就冇机会再讲，咁就会好多遗憾，就会好辛苦。所以妈妈病𠮶阵，我哋都不断咁同佢讲，我而家都可以喺呢度实践一波俾大家去睇吓。我首先多谢我妈妈喺我病同埋有困难𠮶阵，佢好无微不至咁照顾同埋开导我，我好爱佢，可以做到佢个仔。我会想同佢道歉，我有时会冇耐性，我亦都会原谅佢，细个可能冇乜时间陪我，最后就系，再见喇，妈妈！我同哥哥会学习妈妈嘅爱，将佢嘅爱延续落去，继续帮助有需要嘅人，所以接下落嚟，都想拜托咁多位妈妈嘅亲朋好友，多多去关照我哋。虽然我哋而家已经好大个，但系我仲觉得自己系一个低级大人，拜托咁多位高级大人睇住我哋，虽然我而家慢慢升紧级，因为处理好多嘢，有好多嘢细个都唔知道要处理，我分享到依度。”

大仔痛哭感谢母亲无条件的爱

而大仔文哲则非常哀伤，全程痛哭发言，他指自己的分享不及弟弟详尽，但说：“纯粹想多谢我妈妈，因为佢话俾我听咩系无条件嘅爱。佢细个𠮶阵教我，其实做人唔需要fulfil任何期望，只要过一个开心嘅人生，唔系一个狂喜嘅人生，系一个开心、幸福嘅人生，呢样嘢我慢慢学紧。我细个𠮶阵，我同佢无所不谈，我有咩都同佢分享，但系大个之后各种原因、生活习惯，唔系太过合适，所以发现我喺Distance上面同佢有距离，但系都好多谢喺佢入院之前𠮶个礼拜，我同John（弟弟）有keep contact，多番陪佢，佢最后清醒嘅一刻，我有讲到我要讲嘅嘢，所以好多谢你，同埋多谢所有睇住我哋嘅朋友、亲戚。我冇咁多嘢讲，我净系想多谢同埋好好道别，佢毕业喇！我就仲有一段时间，所以，准备咗首歌，我同细佬，我会唱俾佢听。”

两子自弹自唱ONE OK ROCK的《The Pilot </3》送陈敏儿

之后文信弹结他，文哲唱歌，二人演奏ONE OK ROCK的《The Pilot </3》送给母亲，并表示：“唔讲太多意思，大家睇到咩、感觉到系咩，就系啲咩。”歌词中包括：“But i'm not broken down, that's how we growth. If i break your heart, forgive my broken heart, don’t let me go...”唱完后，文哲说：“多谢妈妈！对唔住，亦都多谢你，多谢我话我系你老师，你都系我老师！”

其后，文哲在其乐队Taste of blue的IG上分享这首歌的歌词，透露是自己改编过歌词的版本，但因技术问题无法在安息礼上播出。此外，他又配上一张与陈敏儿相拥的照片。