邱傲然（Tiger）今晚（27日）在麦花臣举行《Tiger Yau “Where It Continues” Live 2026》，承接3月首个个人演唱会《Where It Begins》。对观众而言，Part 2是顺理成章的延续；对Tiger而言，却是一次由不相信到相信自己的证明。最初收到要开首个Solo Concert的消息时，他不是问自己能否做到，而是直言“应该唔得㗎喇”；但在团队支持与反复练习下，他终于完成一个人唱足二十多首歌的挑战，还能“添食”。
上次演唱会其中两个温馨场面，先是与在MIRROR出道前已支持自己的Fans Club会长拥抱，有粉丝形容当时是“全场泪崩一刻”，访问中Tiger非常真挚感谢歌迷以及剖白与他们的相处之道，最感谢是他们很懂得畀空间：“从来唔令我难做”。而另一个感人瞬间，是Tiger在妹妹伴奏下合唱，妹妹本身样貌标致，亦有翻唱不同歌曲，似乎已很Ready入行。Tiger指对方尚未决定是否要出道，但假若妹妹决定要做艺人，他会寄语对方：“心脏要强大”，并指：“你一定要预咗一啲唔好嘅嘅说话，或者唔一定会顺风顺水。”
服装：MISBHV, Plateau Studio
形象：WANJANSCO 温唯 @THECLOTHESURGEON
化妆：Cori Wong
发型 : Manho Li @ Hair Culture
场地：Mondrian Hong Kong @mondrianhongkong

曾不相信自己能hold台“应该唔得㗎喇” 幸获花姐天衡鼓励

演唱会能开Part 2，对Tiger而言是从未想像过的事，甚至连Part 1，对他而言都是遥不可及的。犹记得最初收到要做Solo Concert的消息时，他根本已直接判定自己“应该唔得”，他坦言：“唔系问自己得唔得，系应该唔得㗎喇！”对一个过去以跳舞见称，连歌也少唱的成员而言，一个人唱足二十多首歌，本身就是技术、体能与心理上的大挑战。

Tiger记得自己曾跟花姐表达过自己的担忧：“因为真系一个show，都唔系人咁品，咁但系去到最尾，天衡（演唱会音乐总监）就喺度，佢系劲Supportive，一路喺度push，一路喺度讨论，一齐帮我，成队band一齐喺度练，慢慢就出咗嚟。”至于花姐当时如何回应他的担心，他说：“都系类似‘到时得㗎啦，你畀心机练啦，仲有啲时间。’”问他是否代表花姐其实也觉得他做得到，他谦虚地说：“希望系！不过佢都睇得好开心，佢都有同我讲。”一个演唱会从来不是一个人完成，Tiger的Part 1背后，是一班人陪他由不相信自己，到慢慢站稳的团队在背后支撑著。

练习冲淡紧张　学会在台上讲多一点自己

回想Part 1第一次正式一个人升上台、面对全场观众的感觉，Tiger第一个反应是兴奋大于紧张，他说：“因为我哋今次都都练咗好多次，系咁练，系咁练，所以去到𠮶下紧张𠮶个比例反而少啲，反而好多系兴奋，同埋一开始知道有呢个show，我就知道一个人要唱廿几首歌，咁技巧上、体能上都系会担心，本身又唔系叻，但系通过慢慢好多好多嘅练习，你就会令到紧张开始慢慢越嚟越少，咁end up完成咗𠮶件事，就会好开心呀，好彩我哋有练咗，好彩我哋完成到喇！”

在不少观众印象中，Tiger过往MIRROR中较沉默寡言的一位，予人安静、内敛的感觉，但在Part 1演唱会上，他明显话多了，也让观众看见他更愿意表达的一面。Tiger也同意：“我觉得系讲多咗嘢嘅确实！但系都系𠮶句啦，我觉得谂法就一路都有嘅，只不过可能时间过耐咗，更加熟习我嘅工作环境呀，熟习好多人听我讲嘢呀，咁所以就会有呢个机会同埋有呢个勇气，慢慢讲多啲、讲多啲、讲多啲咁样，所以都可以话我系外放咗嘅。”

新歌《呼吸一世》赶及Part 2推出　笑言再玩新技能要变魔术

来到Part 2，Tiger赶及在演唱会推出了新歌《呼吸一世》，他不特别定义它是否“主题曲”，但若观众觉得它是，亦未尝不可。歌曲主题与缘分有关，他认为缘分与烟相似，会有一霎温暖，但最终亦会烟消云散、走向尽头。虽然听来伤感，不过Tiger希望透过歌曲传递大爱与释怀：“无论缘分带我哋去到边度、去到最后完结，我哋都系祝福对方系好嘅。”他认为这亦是一首适合现场大合唱的歌。

上次演唱会施尽浑身解数，既然Part 2承接Part 1，外界自然会好奇，Tiger还有甚么板斧可以拿出来。他笑言：“你话技能上呢，就其实真系难啲谂啲新嘢啦，再嚟真系变魔术㗎喇。咁但系你话，谂法上都仲有啲item都想做，有啲歌系想唱，譬如同阿妹有冇啲咩新嘅搞作呀，演奏上，咁呢啲都有机会可以摆喺Part 2𠮶个Rundown上面，所以我哋喺选曲，一啲特别嘅item上都几有心思，大家可以期待下。”原本团队也曾担心，如果Part 2要改动太多，几乎等于重新制作一个新show，但时间未必容许。不过最后出来的版本，比Tiger起初想像中多了不同之处，既会在沿用部份中加入小变化，亦会有全新曲目。

老灵魂选曲源自父母　儿时连唱K都未必开口

Tiger一直被形容有个“老灵魂”，他翻唱的选曲亦不时反映出这一点，例如在演唱会上翻唱过张国荣的《大热》、陈百强《深爱著你》等等，这份音乐品味，其实很大程度来自父母的薰陶：“细个可能佢哋听歌或者揸车播歌，就系呢啲年代嘅歌，或者佢哋都会分享，佢哋细个嘅时候听返𠮶首歌系点样，会有呢啲嘢，所以就导致我可能听得太多呢啲歌，就钟意呢啲歌。”中学时期他也有听当时流行的歌，但若说到自己唱歌的习惯，他反而不是从小爱唱K的人，甚至去唱K也未必怎样开口。

正因如此，他亦估不到自己有一天可以开一个个人演唱会，直言：“系呀！我都唔系由细唱到大，但我跳舞系由细跳到大，所以我跳舞就觉得OK吖，但唱歌会有啲咁嘅反差。”他续说：“欸！咪有啲酒楼有啲房，佢有部K喺度，我通常都系会𠮶啲moment先会唱。”

若妹妹想入行　建议心脏要强大：预咗唔好嘅说话

Part 1中，Tiger的妹妹弹琴伴奏并合唱《Fields of Gold》，获得不少好评，他透露妹妹会于Part 2再度上台带来新的表演。提到妹妹本身外形亮眼，亦有出show和翻唱不同歌曲，会否有意入行，Tiger表示妹妹确实喜欢表演和音乐，但暂时未有具体地说要入行正式成为艺人：“系咪咁specific话要入行，要签边间经理人公司呢？我又未听过佢咁样讲住，佢冇好肯定同我讲‘我想签公司’，但我知佢好想表演，好钟意表演。冇呀，因为佢仲读紧书，而佢亦都系一个好有谂法嘅人，所以就由得佢go with the flow，到佢决定咗会同我讲，我帮到啲咩就会帮手。”

如果妹妹真的想成为艺人，Tiger会给她甚么建议呢？他的答案很直接——心脏要强大一点，这不只是哥哥对妹妹的提醒，也是他自己入行以来的经验之谈：“如果要做一个艺人，心脏要强大啲，你一定要预咗一啲唔好嘅嘅说话，或者唔一定会顺风顺水，呢啲嘢佢都明。”问到要如何训练心脏，他的答案更加简单：“唔睇！”对Tiger而言，既然知道某些言论会令自己不开心，那就不要看，也是一种保护自己的方法。而那些他选择不看的，主要是恶意批评与人身攻击：“呢啲睇嚟都罢。”

Tiger不觉得一定是受过伤才学会过滤留言，但他很清楚自己害怕负能量，故不想被波及：“我又唔可以话自己受过伤，但系因为我知道自己好怕负能量，即系我一feel到𠮶个空间里面有啲……好大情绪𠮶啲，我都会受到波及，所以我就会知道自己，嗯，唔得喇咁样。”

深情道谢Fans Club会长：未有MIRROR已第一个攞灯牌俾我签

Part 1演唱会其中一幕在网上洗板的，就是Encore部份Tiger与Fans Club会长拥抱的画面，即使没有入场的观众，光看片段也觉得感动。Tiger回想，当时他近观众唱《Alright》，全场灯也打开了，他很清楚看见台下的人，其中一位正是一路陪伴他的Fans Club会长。那一刻，Tiger脑海中闪过很多画面：“我好清楚见到佢，就企喺𠮶度，然后我人生第一个Solo Concert嘅最后一首歌，唱返我人生第一首Solo歌，然后我见到呢一个人，呢一个人，就系𠮶阵时都未有MIRROR嘅，都系《全民造星》，佢系第一个会攞住个灯牌行埋嚟畀我签名嘅𠮶个人，我觉得呢啲所有嘢好似就连埋咗，就系咁样发生咗。”

镜粉之间偶然会爆出争端，但Tiger的Fans Club会长却被形容为“受万人景仰”，其他成员的粉丝都替她开心。Tiger认为这是对方个人能力与待人处事很厉害的地方，也令Fans Club平日举办的活动非常有组织：“一路以嚟，大大小小Fans Club嘅事务，佢都好关心、好上心，帮咗我好多，我谂佢喺我呢个生涯里面，系一个好紧要嘅齿轮，所以系一个感谢。”

他继续称赞Fans：“其实佢哋全部有正职，而佢哋搞𠮶啲活动，系完整到我觉得‘其实你哋搞活动都得啦！’系呢个感觉。佢哋真系一班好犀利嘅人，又有啲影相好叻呀、画画又好靓呀，剪片又好叻呀，即系好多能人异士喺𠮶个圈里面，所以系帮咗我好多我觉得佢哋。”

与粉丝相处之道　互相畀空间：唔会令到我难做

问Tiger平日如何与粉丝相处，是否有甚么方法可以“教”到一班fans这样好，他立即谦虚地说不敢讲教，只是觉得最重要是给彼此空间，而这份空间是双向的：“因为佢哋畀空间我，好有礼貌，唔会令到我难做，咁呢个我觉得系佢哋好可爱嘅地方，而呢个我都觉得系好紧要嘅一样嘢。”每次应援、出歌、落广告、展览安排，粉丝都花了很多心思，不只是简单摆几张相，而是会构思与他不同阶段相关的内容，例如借用他以前跳舞的物品、拍戏留下的戏服，让展览更有故事，他坦言：“呢啲位其实系一定要相当有爱先至会做到，同埋有啲感动，就系佢哋本身好团结，佢哋唔系一种好自私嘅……我要占有，要点样点样，佢哋一班人系一个团队，佢哋好互相、好礼让，呢个我觉得系好难得。”

粉丝因自己获得力量　相信作品真的会影响人

粉丝令Tiger感动的事，不一定是大型应援，还有可能是面对面一句真诚的话，他回忆起：“有一次系Fan meet，然后佢真系好真心、好诚恳咁同你讲，我因为你嘅边一首歌影响到我有返力量，多谢MIRROR，真系俾到力量我，佢真系好诚恳、好真心咁样讲。然后又有啲人同我讲，我真系因为你所以我去学结他，呢啲系我估唔到系真真实实会发生嘅一啲事。”

这些说话，以前他可能只会在电影、剧集或故事里听见，但当真的有人坐在面前亲口说出来，他才感受到作品的影响力不是空泛的概念，而是真实存在于某些人的生活里：“你要相信你嘅作品系真系影响到人！”

不想被歌手演员框死　Tiger：只想做这个行业的人

近年外界不时揣测MIRROR未来发展，甚至讨论合约完结后会否解散，这刻当然未有定案，但假如有一天Tiger成为一个独立发展的艺人，他希望自己行甚么路线呢？他不想被单一身份框住，表示：“其实我冇话特定我一定要系一个演员或者我系一个歌手，我系觉得真系好大空间去并存㗎呢啲嘢，只要系有呢个机会做到就OK！呢个都系我一直以嚟嘅谂法，我想做呢一个行业嘅人啰，乜都做。”问他是否觉得有得做已经很好，他立即笑言：“系呀系呀！点解唔咁样呢？多啲瓣数唔系仲好咩？”

至于接下来想挑战甚么范畴，Tiger透露最先要“找数”与AK出歌，“因为讲咗好耐，要同AK同天衡搞一样嘢出嚟。”

30岁前不设硬性目标　Keep住做想做的事已很幸福

Tiger是1999年7月出生，也是MIRROR最年轻成员，队友们陆续踏入30岁，他早前笑言很快整队MIRROR都30岁了。虽然他常有三年时间，但对于30岁前会否有什么目标，他并没有为自己设定很硬性、很实质的目标，他说：“我觉得我系朝住我想做嘅嘢𠮶个方向发展紧㗎喇，但我冇一啲好实质，我30岁前一定要出几多只碟、我要去边度开演唱会、tour，我冇呢样嘢喺我心里面，但总之就系Keep住做到一啲我想做嘅嘢，我就已经觉得好开心。”

正如演唱会Part 1，对他来说已经是一件很开心、很幸福的事：“因为我已经做到一啲我自己好开心嘅嘢，Part 1已经系一样，我成日同人讲我玩得好开心，我已经好幸福，其实Keep住有呢啲咁想做嘅嘢，就自然而然慢慢会做得好。”