王君馨、江若琳、赖慰玲同岑杏贤早前齐齐出席配方奶活动。4位星级靓妈平时做惯女神，但一讲起“凑仔经”即刻跌晒偶像包袱，大爆屋企只“化骨龙”嘅搞笑秘闻，当中各位星级爸爸嘅“悲惨待遇”更系超级爆笑，尽显妈妈们有血有肉嘅育儿日常！

爸爸地位大挑战：江若琳囝囝嗌“熄咗佢” 王君馨老公惨被“笃鼻窿”

小朋友慢慢长大，绝对系人细鬼大！江若琳笑指3岁仔仔最近已经由“一旧饭”进化，甚至会点名要求搞生日会：“佢会同我讲：‘妈妈，我想要一个面包超人主题生日会，想请边个同学去边度搞。’见到佢终于有自己想法，真系好安慰。”不过讲到老公萧唯展喺囝囝心目中嘅地位，江若琳就疯狂爆料，指囝囝极度嫌弃爸爸：“佢好钟意睇我唱歌跳舞啲片，但一见到系爸爸，佢就话：‘妈妈，你不如熄咗佢，我要睇妈妈𠮶啲。’”场面爆笑。

至于另一位搞笑担当王君馨，就对1岁囡囡嘅“武打潜能”感到啧啧称奇。王君馨笑指囡囡坐低起身完全唔使用手，甚至会喺张床度“无端端打啲白鹤拳出嚟”。而囡囡对屋企人更有唔同嘅“打招呼”方式，老公首当其冲成为受害者：“佢好钟意搣我，又会咬工人姐姐。跟住爸爸就最犀利啦，成只手指塞入去个鼻窿度！即系爸爸你个鼻要通下咁样。”

除咗“坑爹”日常，王君馨仲大爆囡囡有独特嘅分享欲，会强迫喂妈咪食“二手饭”：“佢喺口度𡁻完再𦧲出嚟畀我：‘嗯！妈咪都要啦，你自己食返’，有时真系有少少核突！”

赖慰玲获大仔疯狂“催生” 拒绝传统呷醋概念

相比起激心日常，赖慰玲嘅大仔就绝对系神仙级“暖男”，甚至反过来疯狂催阿妈再生BB！赖慰玲笑言大仔极度钟意热闹：“佢知道有细佬之后系最开心𠮶个，同我讲：‘其实你可以继续生㗎，我好钟意热闹㗎！’”

对于好多家庭会面临“大争细”嘅问题，赖慰玲就有一套相当破格嘅佛系育儿观。佢坚持唔会将照顾细佬嘅责任推落大仔身上，亦拒绝灌输“呷醋”概念。“有次我揽住哥哥，细佬行埋嚟，我问哥哥做咩呷醋？佢竟然问返我：‘咩叫呷醋呀？’我先好大感受，原来小朋友根本无呢个concept。如果大人成日问‘生咗细佬妈妈会唔会少理你’，小朋友先会开始咁谂。”

岑杏贤道出全职妈咪心声：You are not alone

凑仔充满欢乐，但背后亦有唔少辛酸。岑杏贤就深情剖白新手全职妈妈嘅猛伥时刻，讲中晒唔少阿妈心声：“全职照顾小朋友好多时会无咗耐性，会好猛伥。自己想做好，但发挥唔好嘅时候就会质疑自己。”

岑杏贤最后以过来人身份为一众妈咪打气，相当窝心：“想鼓励返啲妈咪，其实 You are not alone，因为大家都系第一次做妈咪！最紧要系保持正面态度，一边学习一边了解小朋友需要，妈妈有正面情绪，先会培育到健康嘅小朋友。”