日前吕方与司机争执一事成为全城热话，兼职做Uber司机的沈震轩都有在社交平台为事件发声，他认为作为服务性行业、司机，应行多一步帮助客人，更直言：“将呢一条片摆上网公审佢嘅乘客（唔理系明星或者普通市民都好），呢一个行为就绝对唔应该。”今日（13日）沈震轩出席电影《复仇的人》活动时，就再发表看法，重申极不同意公审行为：“而家越来越多公审嘅意思就系咩？其实就系报仇咋嘛，我现场拗唔过你，最尾摆上网等啲人话返你，咁其实依一个行为好唔啱。”他指网上很多偏激资讯，不希望见到小朋友因校园欺凌、网上欺凌等而自杀，因此极力阻止公审风气蔓延。他坦言公众人物确实蚀底，行为容易被放大，不过食得咸鱼抵得渴，只能尽力去约束自己行为，因为公众人物同时是很多人的榜样，必须做好自己。

新戏饰牙尖嘴利律师 入行前当特约演员做跟班曾与刘青云同场

沈震轩今日现身邱礼涛执导电影《复仇的人》探班活动，透露自己将饰演一个牙尖嘴利的律师，最大挑战是不要让观众觉得自己是奸角：“但系你知做律师，有时就系你要对住好多坏嘅人你都要唔可以懦弱，但系你又唔可以变成一个奸人，你知我好容易一做戏，多少少就俾人觉得我奸，我唔想俾人咁嘅感觉。”他将与青云有对手戏，并回忆起入行前做特约演员，拍摄《扑克王》时有跟对方同场，饰演古天乐身后的跟班，不过他没有跟青云提起此事，因相信对方一定不会记得。

痛斥网络公审等同报仇 忧心偏激文化殃及下一代

讲到日前他发文抒发自己对吕方及网约车司机口角事件的看法，他解释因为觉得网络风气极不健康，而自己又到了“讲经”年纪，觉得每个人都有自己的观点去讨论事情：“今次点解我会post呢件事，我个point系我唔系好钟意公审呢一个行为，公审就系凡事做完一啲嘢摆上网、摆落个大海度，俾任何唔同观念嘅人……你知好多好偏激嘅人，我觉得呢个行为好影响而家小朋友，你见而家好多咩校园欺凌、自杀，而家越来越多公审嘅意思就系咩？其实就系报仇咋嘛，我现场拗唔过你，最尾摆上网等啲人话返你，咁其实依一个行为好唔啱。如果你鼓吹呢件事，嚟紧新一代慢慢就会觉得我要打赢你，我唔系要打赢你，甚至闹交都唔系同你闹，我直程系揾人去欺凌你，其实呢个先系最大嘅问题，所以我好唔钟意。姑勿论今次条片系司机摆上去，定系乘客摆上去，我觉得都唔啱，因为其实系两个人嘅事咋嘛，我哋以前闹完咪算，点解要后尾覆桌呢？覆桌得到嘅结果系乜嘢呢？我觉得呢个系我成日想探讨嘅问题。”

感恩揸Uber少遇到西客 强调服务业人士应保持专业

被问揸车时有否遇过“西客”，是否会死忍应对，沈震轩提到“吸引力法则”，指自己是甚么人就会遇到同类人，感恩自己冇遇过太过份的客人，加上自己偏向理性、不易被惹怒，又或者当感觉到对方对人不对事时，他根本已不会再讲落去。沈震轩又强调，做服务业其实应该提供更专业的服务，以茶餐厅伙计为例子，指现时很多餐厅改用QR Code落单，有时有问题想问侍应，对方说“唔知㖞，你落apps啦”，他也会觉得很不负责任和不专业，他说：“服务系咪可以做好啲呢？点解要个态度咁呢？其实所有嘅争执都系来自于大家嘅态度，我觉得有时真系大家互相态度好啲，或者互相帮手多啲，咁就冇呢件事。”

直言公众人物行为被放大的确蚀底 惟食得咸鱼抵得渴

至于会否戥吕方前辈惨，沈震轩直言发生同一情况的话，都可能会有脾气，但自己不是对方，不能对事件有太多假设，只是他希望大家想多一点：“除咗大家成日睇啲冇脑嘅嘢，其实系咪可以喺网上面做多啲，大家有少少智慧去思考啲嘅嘢呢？”他理解大家当食花生，但至少希望网民多角度思考，并不应把网络公审风气带给下一代，因为后果可以很严重。谈及公众人物会否蚀底，稍有争执或行为不当都随时被投诉或放上榜公审，他不讳言：“其实绝对系蚀底！等如你系Spider-Man，等如你系Batman，你做咩都俾人放大。我觉得做公众人物系要再restricted啲嘅自己，我都系人嚟嘅啫，我会发脾气，去到想讲粗口我就……我……顶你呀。冇办法，你系要咁样，用返最老土嘅说话咪‘食得咸鱼抵得渴。’”他认为现今世代公众人物定义模糊，任何人都可以成名、有很多网络追随者，但既然有影响力，就更有责任以身作则教好fans：“你嘅行为直接影响佢，因为佢会听晒你讲，我觉得我哋反而要谂多啲呢一方面嘅嘢。”