COLLAR“IDC小队”Ivy So（苏雅琳）、Day（许轶）、Candy（王家晴）推出以美食为主题的相集《After One More Bite》，于香港不同角落食街头美食。今早3人现身书展举行签名会，数百Fans一早到场，600个筹火速派完。首批写真约印制了数千本，问到若销情理想会否再派福利畀fans，三位即兴表示想邀请fans一齐扫街；至于下次会否推出水著写真，Ivy笑言：“到时可能卖得好贵㖞！”Candy更即时开价$3380！

“灯神”Candy灯死法国 唔敢Tip冠军队伍：俾钱先答

签名会早上11点举行，Ivy、Day、Candy要提前到场做访问，Candy 5点就起身，Ivy更是冇瞓过，凌晨4点半收工回家冲凉就直踩。讲到昨晚的世界杯赛事，事前Candy指法国赢硬，结果0:2输西班牙，她再一次不负“灯神”之名，笑言：“我以为法国一定赢，所以先拣法国，所以呢个世界冇一定！我灯咗三四次，每一次俾人问就拣，二选一，好似每一次都系错。”记者叫她推测今届冠军，她即表示：“哗！唔好再问我呢个问题，我唔会答，俾钱先答。”

Ivy自爆垃圾桶旁低调食卤味 Day被踢爆独吞成底鸡蛋仔

今次写真三位在两日内在香港各处饮饮食食，Candy最爱德国的Pretzel蝴蝶饼：“我试完之后𠮶个礼拜买咗两次啊自己，好好食呀，烟烟韧韧！”Ivy就觉得气氛最重要，所以三个人食粉果、烧卖最开心：“喺条街度拮住支签喺度就咁食，好有街头小食嘅气氛。”问到是否因为平时甚少机会可以扫街，Candy指她会引起“Ivy So（骚）动”，Ivy直言：“少啲啰，或者我真系忍唔住，譬如上个礼拜拍MV之前，我忍唔住食咗旺角嘅橙色卤味，喺街度忍唔住除咗口罩，匿埋垃圾桶隔篱系咁食。” 但Day与队友Gao（沈贞巧）早前被捕获入元朗食鸡蛋仔，她笑说：“系呀！因为弥补下，我哋𠮶时拍嘅时候都有食鸡蛋仔，但系腍咗少少，跟住𠮶日早收工就同咗阿Gao去食即场买嘅鸡蛋仔。（Ivy：我都话佢，𠮶底嘢好肥㗎嘛，点解你哋可以一人一底？）一人一底呀！（Ivy：你哋唔系话请人食嘅咩？）有……有拎去俾朋友食。”

一日食足十几款小食 Ivy透露有绝密肚腩片

Ivy指自己曾想过食“肉饼山”，但因为想要街头味道，所以最终“扫街”，Day就透露自己想食菠萝油，但冇拍到：“我好钟意食菠萝油，但系其实里面其他嘢食大部份都系我哋谂，大概想食啲咩。”高峰期她们一日食了十几种小食，虽然只是每样“一啖”，但Ivy大爆：“最尾拍咗条绝密片段冇公开，亦都唔会公开，就系我哋个肚大咗少少。”三位又直认为食，指若果是Marf的话，可能很早已饱了。问到若销情理想，会否加推福利答谢fans，Day即时想到三位直播扫街，被记者取笑是她“自肥”的福利，之后Candy就扬言：“邀请fans同我哋一齐扫街！”Ivy补充可能三位成员一人开一团，每团带一位超幸运fans，在场即时有围观的fans举手！

被问出水著写真可能 Ivy话大个啲先：到时可能卖好贵

讲到下次会否挑战水著写真，Ivy：“到时可能卖得好贵㖞！（Candy：$3380！）”之后Ivy害羞表示：“大𠮶啲先啦，我哋仲系小朋友嚟㗎。”其实之前Ivy都有在IG分享过泳照，属于健康性感款式，Day表示：“你自己影一本，我会买，$3380都买！”被问有否想过推出COLLAR全员写真，Ivy都好想，Candy表示：“我哋成日话去船P，其实船P就可以影，互相影，而家阿Gao阿Marf影相好劲，佢哋真系可以做摄影师，我哋自己出一本。”

各选出埠写真理想地点 Candy想去芬兰影雪地写真

而谈及会否想出埠影写真，Ivy坦言COLLAR各成员都很忙，相信比较难，但自己很渴望“以公谋私”，顺便七个去旅行，Ivy此时失笑：“其实我哋夹咗四五年都冇夹到。（Ivy：四年嚟都话去船P，但系都冇去过，所以积极安排。）”被问想去哪里影靓相，Ivy答夏威夷，因为可以著草裙；Day就拣意大利，因为意大利美食多；Candy则想去芬兰：“想见圣诞老人，我要喺雪地度影！着泳衣！”

Ivy为《金秘书》再减肥 预告与Anson Lo有亲热戏

Ivy与卢瀚霆（Anson Lo）的新剧《金秘书为何那样》明早即将开拍，目前在围读及前期阶段，Ivy非常期待，问到亲热戏方面，她说未拍到，“不过原版有啲，都会照有嘅。”她透露自己角色要著西装裙，虽然已经有减肥，但因为款式偏贴身，试身时都觉得非常危险，不讳言：“对手身材好好，我都自己要保持吓。”被问亲热戏前会否刷牙，她表示：“𠮶场先啦，一定要嘅，基本礼貌嚟嘅。”问两位拍档会否期待拍亲热戏，Day竟直认：“恨呀！佢有分享有啲动作戏嘅指导，我觉得都好想有呢啲机会可以学习吓，亲密动作戏。”

Day新剧饰潘灿良唐诗咏女儿 已有一家人感觉闲话家常

至于Day主演的《日落下的彩虹》亦开播在即，今次她跟潘灿良、唐诗咏、苏文涛饰演一家人，她大赞：“我觉得呢个家庭嘅vibe好好，同埋佢三个都系好好嘅演员，学到好多嘢。佢哋好Nice，大家等埋位嘅时候其实我哋一家人四个都系咁倾偈，大家倾嘅嘢都系已经变到好日常。”

睇更多Ivy、Day、Candy相集签名会的现场花絮：