“星洲广东歌后”丽莎日前于荃湾大会堂演奏厅举行《丽莎相思泪飞越半世情演唱会》。歌手方俊盛装现身，为合作多年的丽莎姐担任表演嘉宾。在后台接受《香港01》访问时，方俊除了分享自己今晚颇具心思的舞台造型外，更首度开腔回应了外界非常关注的“老友”张伟文之最新健康及经济状况。

与丽莎相识十载 爆选歌要互相妥协

方俊与丽莎姐相识十多年，过去曾合作无间。谈到今晚再次同台演出，方俊坦言两人已极具默契，不过在选歌方面有时仍需要互相妥协。

方俊表示：“我都唱咗几十年，同丽莎都合作过好多次，其实都好多年。同佢认识咗都有十几年，大家舞台上都有啲互相刁难，例如我想咁，佢又想咁做。好似形象上或者唱咩歌，佢呢就唔想唱啲好伤感嘅歌，钟意唱啲轻快啲嘅，但你知啦，丽莎姐以前我哋细个听佢嘅歌，都系啲情歌、伤感啲嘅歌，好似《相思泪》个类都比较伤感。佢就唔系好钟意，钟意快歌，又想跳吓舞，所以有时拣歌就要平衡一下大家。”

自置私伙闪亮登场 自嘲“台上夸张，台下正经”

今晚方俊以一身重金属感的闪亮服饰登场，造型相当吸睛。原来，这套极具视觉效果的战衣是他本人的私伙收藏。

方俊表示：“系呀，因为我每一次都希望出到嚟有唔同嘅效果，畀人一啲新鲜嘅形象。呢啲全部都系我嘅私伙嘢，因为我自己本身都系做舞台设计、服装设计师，所以我自己好多呢啲顶顶揼揼嘅嘢，对我嚟讲好普通。我哋平时接触可能觉得我好正经，但做表演唔同，喺台上面做得好夸张都得，但平时出街就唔会花到咁样出嚟，所以我觉得几好玩、几轻松同放松。”

亲自回应张伟文最新近况：中风中过好多次，目前有失智情况

除了个人演出外，外界最关心的莫过于由方俊一直照顾、现居住于养老院的知名歌手张伟文。方俊透露，自己因为目前常住深圳工作并照顾93岁的母亲，能回港探望张伟文的时间有所减少，但每次一回港，必定第一时间去探望对方。

方俊无奈表示：“我就少咗返嚟探佢，因为我依家喺深圳住，要自己做直播节目，我又带咗我妈妈上去住。我妈妈都93岁啦，我都尽量希望陪得佢一日得一日，变咗同佢一齐喺深圳住，我就少咗返嚟。但我一返到嚟，第一时间一定会去买嘢畀佢食，去探下佢，你知道一个人喺护老院都好闷。”

当被问到张伟文是否如传闻般开始出现认知障碍症状、甚至认不出人时，方俊无奈地证实了这个消息。

方俊痛心表示：“一时时啦，睇佢状态点。有时就认得，有时状态差，可能佢又冇出声，都唔知佢认唔认得。但佢见到我呢，就会依牙带笑，一定会笑。其实见到我佢都会笑嘅。虽然外界之前都有啲声音质疑我，但谂深一层，老实讲咩人都有，每个人有唔同谂法好正常。因为佢哋唔知道我哋个交情有几深厚，我认识咗伟文30几年，大家就好似家人咁，唔系朋友咁简单。加上佢自细都冇亲人，又冇人照顾，我觉得佢都几惨。喺朋友角度，我觉得帮得几多就几多啦。所以外间啲人点样揣测、点样谂，我都不以为然，亦都唔会怪佢哋。”

护老院开支庞大 方俊仗义分担部分费用

张伟文近年因健康问题无法登台，基本没有稳定收入，其入住养老院的庞大开支亦成为外界焦点。方俊直言，政府虽然有提供部分津贴，但其余的费用仍需靠张伟文以前的积蓄以及他个人的仗义协助。

方俊坦言：“你知道做歌星就唔系日日有得唱，你有演唱会、人哋有揾你，你个段期间先有收入，收入系唔稳定嘅。佢现时住嘅开支，政府都有啲津贴，有几千蚊津贴。其余嘅，佢自己起初都有少少积蓄，但时间耐咗，积蓄都会用晒。我就帮佢分担一部分啦。”

方俊续说：“佢年轻嘅时候系有过一个物业，但佢就卖咗个物业，之后移居去深圳住。跟住你知啦，佢条腰又做咗好多次手术，都用咗好多钱。用咗好多钱之后，个收入又唔稳定，到后期都冇咩收入，但每个月都要有开支，所以佢啲积蓄都用晒。见到佢呢年半都喺张床度过，我其实自己都好心酸。我觉得一个基本嘅生活质素都冇，每次探佢，表面上同佢笑下、玩下，但我探完之后自己都有点难过，喺健康上我又帮唔到啲咩，真系好无助。”

被问到张伟文健康情况会否有好转？方俊直言：“其实呢年半就进展得好慢。系有改善，但改善得好慢。我自己见佢呢年几都系喺张床度过，其实我自己都好心酸。我觉得一个基本嘅生活质素都无，每次探佢表面上同佢笑下、玩下，但我探完之后自己都有啲难过。喺健康上我又帮唔到啲咩，真系好无助。”

方俊续说：“我感觉到佢，都唔会越来越好。因为你谂下，就算一个健康嘅人，你放喺张床度瞓咁耐、无落过床，你谂下你自己都会硬晒啦，啲筋骨，系咪先？好简单嘅事。你要真系活动返，你先至会身体好啲。依家所以……我都唔系话觉得佢会有啲咩好转，暂时嚟讲。”

已立授权书作“平安纸” 防日后有争端

提到张伟文健康每况愈下，有否在失智前立下平安纸？方俊透露，在圈中好友的见证下，张伟文早已签署了一份授权书，以便方俊在未来为他处理后事及余下的开支。

方俊表示：“有立到。但又冇正式去律师楼做平安纸，因为佢又唔系话好多资产。我哋有见证嘅圈中朋友睇住佢写咗个授权书畀我。个授权书就系讲紧佢有朝一日百年归老，由我帮佢处理佢之后嘅事，剩低嘅钱会点样用，我都会写住用返喺佢自己身上，或者佢之后嘅后事。你知道免得费事突然间唔知弹啲咩人出嚟会变到好麻烦，所以写清楚就会好好多。当时都有见证人，会稳阵好多。”