第四季《人人和音 School Tour》第四弹，邀来李骏杰（Jeremy）、曾乐彤、Teller（王伟俊）、女团 IdG Bubbles及再次参与School Tour的男团 ZPOT，分别走访天主教母佑会萧明中学及何明华会督银禧中学担任嘉宾，与同学们分享追梦的经历之余，当然不少得献唱及台下互动的环节，让师生们齐齐共渡愉快下午。《人人和音 School Tour》由文化艺术生活平台【电笠】举办，今年分别邀得23个音乐单位及不同领域的专业人士到访全港10间中学，以“梦想中的另一个我”为主题，透过音乐与分享，让同学们在面对学业与人生规划的压力下打打气。

出道八年拒绝盲目比较

Jeremy笑谓自己已经梦想成真，当然亦有曾经想过放弃的时候：“出咗道8年，我发现所有唔开心或者失败都好，其实都系养份，因为有呢份唔开心同失败，你先会知道成功有几开心。自己都一定有同人比较过，但系后来学识，与其比较不如认清楚自己先，由自己出发，再揾自己嘅形象、自己嘅节奏，无论人哋点都好，我唔会被𠮶啲比较影响，所以爱自己好紧要。”

回想读书时期，Jeremy坦言自己的成绩属中等，所以读书时不算太大压力：“屋企人又唔会要我一定考到咩成绩，所以我对成绩冇咩压力，有时仲会Surprise自己竟然可以有咁嘅成绩，就算真系有压力都系同同学疯狂打机。出道后的压力反而更难处理，因为每个人都你都有佢哋嘅期望，反而压力更大，所以我愈来愈只系关注返自己，总之，每次做我最靓、最好嘅表演畀大家已经够。”初初很多人不认同自己的歌手梦，尤其是家人，Jeremy感恩有好朋友支持：“𠮶阵十几岁，未成年㖞，瞒住屋企买车飞，同好朋友偷偷去广州遴选。因为你唔知系咪真系有呢样嘢，又或者佢系咪呃人㗎嘛，𠮶时都真系癫。”

曾乐彤中五拍片无惧质疑

曾乐彤从小已梦想做演员，中学时亦曾修读表演艺术，中五已开始拍YouTube片的她说：“𠮶时都未有YouTuber呢个称呼，但系我好钟意睇特技化妆，又钟意睇丧尸片，咁就自己试吓化𠮶啲妆拍低佢。当然𠮶阵身边有人会质疑，但我系‘我觉得正’就会做嘅人，呢个心态系印证咗没有错，因为人最紧要都系为开心，人生有太唔可控嘅事情发生，未毕业就入咗唱片公司，都唔系我计划之中，系个天畀我嘅机会。”曾乐彤劝勉同学们不用太担心何时确立梦想：“大家仲系好年轻，你对梦想有压力，可能系因为个教育制度话畀你听，应该要为咩紧张，系要有呢个意识，但系作为过来人，我想话畀你哋听，真系几时都可以重新开始！”她指千万别因为别人的意见，勉强自己做不喜欢的事。

Teller自言学业成绩不算好，自己亦很难集中，于是坚持每日为自己制订日程：“自己好多嘢谂、唔集中，咁就畀个Schedule自己每日跟，而家都系咁㗎。我最记得因为成绩唔好，老师同我讲‘你Daddy、妈咪好辛苦，唔好浪费咗佢哋嘅努力’，真系每次谂起都想喊，呢句说话对我嚟讲好Deep。”

IdG Bubbles鼓励同学们享受追逐梦想的过程，千万不要让自己后悔：“其实有冇梦想都好，喺呢个寻找嘅过程都会学到好多嘢，好似我哋参加遴选咁，都未必一定出到道，但系可以喺当中学习唱歌、跳舞、面对唔同嘅人。可能中途会发现自己，未必真系咁想做呢刻你想做嘅，所以都唔使急住决定终点喺边。”她们坦言入行后的压力比读书时大很多，因为不再只是为自己负责，而是为整个团队负责，更没有了“新手保护期”，所以特别鼓励同学们在读书时期尽情试错。