徐蓉蓉（徐姐）所著的新马师曾纪念文集《千面伶王新马师曾》近日推出，今日（19日）在香港书展举行讲座，新马师曾（邓永祥）的几个子女邓兆尊、邓小艾（邓翠玉）及邓兆荣齐齐现身，兆尊的女友Carmen亦低调撑场。谈到父亲的回忆及教诲，小艾就忆述父亲教他们不要怕被骗，指曾有人攞一袋真假夹杂的钻石上门，新马师曾二话不说就掏出40万，明知对方不老实也表示：“算啦，你咪当帮人啰。”又有一次有贼爬入永祥大厦打劫，新马师曾原本已举枪威吓，得悉对方原来需要几万蚊应急医治家人后，就马上俾钱对方，不负“慈善伶王”美誉。

新马师曾多张珍贵旧照曝光

三位在讲座上分享与新马师曾相处的点滴，此书主力由徐姐及小艾筹备，刊登多张珍贵旧照，但小艾透露过往已遗失多箱照片：“有啲好细个同爸爸嘅相我都唔见咗两箱，揾咗十年都揾唔到，剩返𠮶啲好珍贵，得返100张都冇。俾人偷咗，𠮶时屋企上面有个好老嘅工人，可能偷咗出去卖。”今次封面相是由小艾及徐姐所选，她说：“徐姐想揾爸爸做光绪王𠮶套衫，原装全金色，𠮶时我哋畀爸爸陪葬用，局住要依一个啰，呢个又靓。”小艾指自己最爱父亲的“乞儿仔”角色，问到是否曾有人以高价收购该戏服，兆荣就说：“讲笑啫，唔会卖，无价。”

小艾翻看旧照至今仍未释怀

讲到准备书籍、翻看旧照的过程会否很感触，小艾坦言至今仍未释怀，想起很多美好回忆，例如父亲在晚上练功、练戏的情境，但现时已比之前坚强，不会轻易在人前哭。她续说：“感触就一定系细个同爸爸相处，因为我哋细个好难得先同爸爸相处到，所以每一次都好珍惜，每一个记忆都喺心里面。”早前三位在访问中讲到新马师曾拍十日戏就买到一个单位，兆尊就回应：“𠮶啲系佢讲返俾我哋听，至于系咪真，就有待查证。（记者：会唔会考证？）你阿爸同你讲嘢你都唔会考证，你点敢考证？”

新马师曾闻贼人医病母即掏钱救急

讲到最难忘父亲的优点及教诲，兆尊说：“太多太多，尤其是出咗社会之后，好多唔同嘅嘢，话呢啲嘢讲定俾你听先。”兆荣就表示学习到身教、礼貌：“个个人都欢喜佢，个个人都嗌佢，佢去上巴士、上的士都会话‘司机大哥你好’，有呢啲礼貌。”而小艾更忆述两个事例，父亲叫他们不用怕被人呃：“佢话如果俾人呃唔系唔好，你系攞经验，如果人哋呃你，你系有嘢俾人呃，喺我阿爸嘅立场。以前都遇到好多咁嘅人，一个实例就好笑，有一晚我见有人揾佢，攞住一个红色胶袋，一袋嘢，我都唔知咩嚟，跟住我老窦就俾咗40万佢，跟住我话‘咩嚟㗎 ？呢袋嘢40万？’ 佢话钻石嚟㗎，打开，真系钻石㖞！但系有几多系假嘅，冇人知，可能里面𠮶袋嘢得10粒系真，我阿爸EQ高，佢话‘算啦你咪当帮人啰。’”

邓小艾忆新马师曾遇劫即举枪

而另一个例子更是惊心动魄，就是有的士司机爬上永祥大厦意图打劫：“我老窦𠮶时有支枪，因为佢有枪柜、有枪牌，指住佢，我老窦就问佢‘你咩事？做咩入嚟？’佢话‘冇，我唔知系你，我江湖救急，争几万蚊要俾阿妈睇医生。’我老窦就话‘得，你喺吕祖面前叩三个头，再讲多次呢件事。’真系讲咗，我老窦就攞咗钱俾佢。后尾呢个贼就同我老窦讲‘我会喺三个月之后还返钱俾你。’呢个人真系有诚信，三个月自己入返嚟永祥大厦攞钱还返俾佢，呢啲又系我哋应该学习。”当时三位都只得8至10岁，但兆尊未惊过，认定新马师曾不敢开枪，只是纯粹吓唬对方。小艾再补充：“做人嘅道理就系唔好呃人，唔好偷呃拐骗，佢话你做唔到一个回馈社会嘅人，都唔好做一个呃社会嘅人。”