谭俊彦、陈晓华、林秀怡、梁凯晴主持的《重症解密》昨日（20日）举行记者会，四位将在节目中化身“重症调查科”调查员，以侦缉案件形式调查重症，适逢7月是谭俊彦、秀怡及凯晴7月生日，节目组也为他们安排了蛋糕庆生，秀怡和凯晴受访时表示希望《重症解密》收视爆灯，原班人马开续集。凯晴透露日前跟朋友食饭庆祝，之后睇世界杯决赛，问到会否希望生日有猛男陪伴，秀怡即爆：“佢唔钟意猛男类型。”凯晴笑说：“我钟意斯文啲。”又指秀怡常常有男友陪伴拍摄，觉得好闪好Sweet。

讲到健康习惯，秀怡坦言自己是个讳疾忌医的人，现时35岁都未做过任何身体检查：“所以我喺呢度喺镜头前要做呢件事，就系希望一定要……啱啱过咗35岁，一定要喺呢一年做到身体检查，呢个系我畀自己一个……承诺！”她又透露拍节目时访问过一位教授，对方完全不吃午餐肉、肠仔、火腿：“佢话真系好伤身体，我哋大家都尽量食少啲，都好难戒，因为公仔面一定配𠮶啲，但系原来医生本人自己都戒得咁清，就知道呢样嘢对身体好大伤害。”秀怡被问会否等到结婚才做详细检查，她说：“我由25岁开始做访问，就话希望30岁前可以结婚啦，跟住28岁就话30岁前结婚， 30岁做访问就话希望32岁前结婚，跟住32岁做访问就话35岁前结婚……而家35岁，已经冇咗呢个冲动，因为长久对住咗，已经变咗一个好长期陪伴，变咗家人咁。”

秀怡主演《非份之罪》其中一个单元，近日回响甚大，网民洗版赞秀怡好戏，她坦言非常感恩，也感激对手、传媒和网民支持，表示全部留言都有睇：“因为真系每一个都系动力！有人睇到、有人认同，𠮶个感觉系好感动啰真系，好多谢咁多位留言嘅朋友。”问到最喜欢哪一场戏，她说：“都系最钟意同阿嫲雨中𠮶一幕，同埋同嫲嫲喺天桥相拥，好似有个释怀，因为一路同嫲嫲嘅关系都好差，去到最后𠮶集，同嫲嫲解开咗所有心结，相拥𠮶一幕，我自己都几钟意。”戏中有一幕秀怡要揹起卢宛茵，两位都冇用替身，秀怡不讳言起初很大压力：“系呀！你明唔明，就系唔好跌呀Madam！但系好彩Madam信任我，多谢Madam！其实我本身都大力嘅，但系𠮶一日开始去到尾嘅时候都发现要用意志力，因为原来都真系攰攰地，但系好彩Madam其实唔重，放心！全靠Madam都安心俾我揹，因为佢自己都好惊。”此外，她也大赞陈炜：“真系好劲，无论呢个角色所有心路历程佢都解构晒出嚟，炜哥平时好好人，你未见过佢咁邪恶，所以系超级劲！”

秀怡的导演男友政哥是陈奕迅（Eason）超级fans，日前二人抽中出席Eason的生日fans meeting名额，政哥上台玩听前奏估歌手游戏，比Eason更早估中，获偶像亲口赞好劲。秀怡就表示：“好开心真系抽到！跟住真系同佢去，最开心嘅系陈奕迅自己tag，佢话见过上网有条片，有个男仔好劲，估歌，唔知佢今日喺唔喺度呢？我话‘喺度呀！’即刻拎佢起身，帮佢上台圆咗呢个梦，多谢陈奕迅，多谢呢个fans meeting！”讲到男友会否常常唱Eason的歌轰炸她，秀怡说：“真系轰炸！我本身都钟意陈奕迅，都钟意听佢啲歌，有一排听到有少少憎陈奕迅！点解日日夜夜听到陈奕迅？同埋陈奕迅红嘅程度，系你去到边度都好容易听到佢啲歌，又系陈奕迅又系陈奕迅，有啲崩溃啰个人，仲要你谂吓我唔系听陈奕迅本人唱，我系听男朋友唱，𠮶个落差有几大？（记者：男朋友歌艺有佢几多成？）有一半啦，俾下面佢。”