袁文杰近日人气急升，除了日前出书讲爱队阿仙奴外，世界杯期间他在自己网台直播旁述，吸引了不少新fans，网民大赞他的讲波水平已是专业级数，直播观看数屡创高峰，即使西班牙对阿根廷决赛，电视台有免费转播，但袁文杰直播旁述高达14,000人收看！今届决赛引起不少争议，有人认为柏利迪斯（Leandro Paredes）、安素费南迪斯（Enzo Fernandez）等阿根廷球员输球品及行为粗野，而袁文杰亦拍片表达对阿根廷赛后表现之不满，尤其是他们在西班牙领奖时背向颁奖台，绝对是缺乏体育精神。他又特别指出，在阿根廷与西班牙球员发生冲突期间，美斯完全没试图劝阻，只自顾怜悯望镜头，完全没领袖风范：“阿根廷可以话系自己丢架，球王美斯，根本唔系一个领袖。”

指阿根廷如获FIFA“保送”入四强 但晋级路仍吃力狼狈

袁文杰指自己一向以波论波，但体育精神还是要有，做得不好确实会令人诟病。他先从技术层面去讲，指阿根廷在决赛留下最大遗憾予球迷，无法提供一场与对手势均力敌的决赛演出，令人失望，坦言他们由32强一路走入决赛，五场有三场都要战至加时部份：“未去到决赛之前𠮶四场波，阿根廷原来每一关都系过得相当相当辛苦。”他相信这与阿根廷球员平均年龄超过29岁有关，体能上会较吃力，但又认为相较于西班牙，阿根廷遇上的对手其实已算易打：“阿根廷一路晋级过程，你都唔好话， FIFA编排赛程一早已经有人喺度垢病，系保送阿根廷起码去四强。呢个赛程晋级嘅球队，你睇返其实已经系帮到一把，都踢得咁狼狈，每一关都过得咁辛苦，阿根廷喺晋级过程嚟讲，系自己造成。”

最不满西班牙获奖时阿根廷全体背向颁奖台：缺乏体育精神

不过之所以令文杰如此不满，是他赛后从网上见到一张照片，就是当西班牙捧杯时，另一侧的阿根廷球员却全体背向颁奖台，他狠批：“呢一个举动可以话系唔单止缺乏体育精神，道德嘅层面上面都系缺德嘅。 堂堂一支上届世界杯冠军国家队，输咗场比赛，我哋见到赛后，首先摩连拿（Nahuel Molina）同埋洛迪嘅顶嘴，亦都有奥达文迪对住洛迪同埋呢个拉朴达，点样话佢哋哭哭啼啼成场波，你谂吓奥达文迪、拉朴达同埋洛迪三个人之间有冇交集？有！”

批阿根廷输波唔忿气 美斯更全无领袖风范

他指三人在19-20年球季是同队，但奥达文迪对住前队友都忘记了昔日情谊；而讲到柏利迪斯对西班牙球员艾利加西亚及加维动粗，他形容行为凶暴，“呢啲行径我哋大体上面睇得到，阿根廷已经系失控，𠮶个输波唔忿气嘅状态，去到另一啲片段，美斯只系自顾怜悯，佢𠮶下面对嘅唔系球迷，面对嘅最主要系你哋部摄影机，OK，美斯畀晒你。场中间发生呢啲争执，双方都有曾经劝开嘅时候，马天尼斯呢个门将都叫做有走返入人堆，佢唔系撩交打，佢系劝嘅啫，美斯做紧啲咩呢？呢个球王完全冇领袖风范，一个领袖唔系话睇住大家喺度拨火而坐视不理，去到西班牙真系隔咗一段时间，高举奖杯嘅时候，喂！俾啲风度吖，输咪输啰，系咪先？喺呢个过程入面，佢哋好团结地背向身，𠮶张图片我睇到觉得好心噏，今时今日都仲有啲咁野蛮嘅行为，去到依个已经系举世瞩目，你斟杯水，全世界都知嘅一个网络资讯爆炸嘅年代，你竟然咁样？”

直斥输打赢要“教坏细路” 缺乏对冠军球队基本尊重

袁文杰认为足球背后有教育本义，虽然美斯没有责任，但其实也应该做好一个榜样去传承予下一代：“你畀下一代嘅人或者新接触足球嘅人睇到，如果佢哋当正呢一种输打赢要嘅凶暴行为，或者好缺德、欠缺体育精神嘅表态，系一个正常嘅事情嚟讲，你咪即系教坏细路？”他指阿根廷攞银牌时，西班牙球员都夹道欢呼，当然因为他们是赢家，心情好冇嘢输，但续说：“最后我睇返评论，话柏利迪斯就话因为西班牙球员好唔尊重佢哋，要出手嘅原因就系佢哋喺面前庆祝，好唔尊重，庆祝都唔俾？有冇咁霸道呀？你美斯做紧咩？史卡朗尼又做紧咩？有冇劝喻你嘅子弟兵，做返个正常嘅行径，向冠军球队鼓掌，望向颁奖台，有冇呢啲嘅举动？或者你唔系喺𠮶个侧边嘅位置，有冇其他位置系可以显示出你对冠军球队嘅尊重？”

以利物浦社区盾展风度为例 痛心阿根廷扫清王者气质难获尊重

袁文杰以2020年“社区盾”为喻，指阿仙奴击败利物浦后，高普亦有领导一众利物浦球员在场边球员通道望住阿仙奴攞奖、领受完锦标，拍完掌才保持住风度走入更衣室。当然，世界杯比社区盾重要很多，但体育精神无分大小，“你唔尊重人人哋点会尊重你？呢种极之令人讨厌嘅行径，甚至乎系将你过往呢几年所谓储落嚟𠮶个王者嘅气质，可能有啲人认为冇㗎，一场波输咗唔会扫清，但系一场输咗波，之后嘅行为，可以话系扫清晒。美斯可以话系球王，但系佢唔系一个领袖，一个领袖呢个时间要做嘅嘢佢完全冇做到！冇劝止队友冷静，冇企图上前劝阻，亦都系冇领导球队最后拎返出应该有嘅风度，呢个风度其实系你自己嘅尊严，呢个尊严系你唔俾你自己，咁你点叫人尊重你呢？阿根廷！”

举谢拉特东尼亚当斯作对比：呢个时间我哋需要领袖多过球王

此外，他也提及美斯举手向球证投诉古古尼亚掩嘴行为“小家”：“人哋撞一撞亲个嘴，揞吓啫，古古尼亚都好无辜！虽然古古尼亚某程度佢嘅踢法都系相对系西班牙阵中比较惹火嘅一位，美斯真系……令我哋知道，或者可以直视一件事情，球王唔代表领袖。我哋见过球坛上面有好多领袖，佢哋都唔系球王，谢拉特唔系球王，谢拉特绝对系一个好好嘅领袖！东尼亚当斯都唔系一个好好嘅球王，一个中坚，但系佢喺阿仙奴当年阵中，佢都系个大佬，佢都系个领袖。好多球霸，唔系球王，但系都系一个领袖！呢个时间我哋需要领袖多过球王，但系佢就……系啰，都无谓再讲太多。”最后，他总结指阿根廷神坛随著美斯最后一舞落幕，未来就要再看没有美斯的阿根廷如何发展下去。而袁文杰的这一番话，理所当然引起支持及反阿根廷两边球迷热议，YouTube出片未够一日，已有逾千个留言，他亦有回复部份不同意自己的评论。