“一蚊Joe”游莨维近日因工作态度问题引发热议，有指其工作时没礼貌，甚至不准备 Cue Card，随即遭到不少网民及业界公审。今日（27/7）曾与游莨维多次合作的赖彦妤出席活动时接受《香港01》访问，主动提及对这位昔日伙伴的看法，大爆对方真实为人与工作态度。

入行初期获师兄照顾 赞性格爽快直率

赖彦妤透露，自己刚入行时便加入娱乐组，与游莨维时有接触，对方算是自己的师兄。谈及游莨维的工作态度，她表示对方性格向来直率爽朗：“我都有留意到呢新闻，因为刚刚入行𠮶阵时，佢系我师兄嚟㗎嘛。我好钟意捉住啲师兄师姐前辈问问题，佢都系比较爽快直率嘅性格，一语中的咁答中我嘅问题。加埋佢系《东张》其中一位男主持，呢种性格反而帮到手，去追击追访受访者会更加有帮助。喺佢身上我都学到嘢，知道要一语中的，唔好咁多废话。”

赞私下暖心无架子

对于外界指游莨维在开工前“挂住玩手机”、准备不足等指控，赖彦妤指大家开工前都会用手机睇稿：“有时喺文件、纸本，有时喺手机。大家其实都好勤力咁睇紧啲稿，唔系喺度玩电话。以前同佢合作做 MC 或者请教佢𠮶阵，我都冇听过佢用外界所讲𠮶种语气。一开始见到佢大只，以为会比较有威严、行过去有少少压力，但倾完偈就发觉呢个师兄好 nice，好钟意笑。”

面对公审力挺：每个人方法不同

被问到游莨维工作时会否要求过高或讲话太简短，赖彦妤认为司仪工作节奏紧凑，沟通自然较为直接：“要求就系做好𠮶件事啰！司仪嘅工作比较急促，要醒目，所以可能好急促咁话‘呢度呢度要去做啲咩’，一句讲完就去下一个 ，我真系冇感觉到佢冇礼貌，反而觉得佢好似大哥哥咁。”

至于面对近日的公审风波，赖彦妤则抱持包容态度，表示每个人处理工作的方式不同，但也会将外界意见视为改进的动力：“未接触过或者未合作过嘅人，可能会由唔同角度去诠释一个artist。我自己觉得，为咗做好件事，用自己或者对方嘅方法去做好就得，真系未必要顾及晒所有唔同角度嘅声音。当然，唔同嘅意见都好紧要，我都会睇晒大家嘅意见去改进自己。”