徐蓉蓉（徐姐）近日推出新马师曾（邓永祥）纪念文集《千面伶王新马师曾》，而新马师曾的几位子女邓兆尊、邓小艾（邓翠玉）及邓兆荣除了出席书展活动外，近日亦有接受徐姐节目访问，她分享了祥哥、祥嫂（洪金梅）的教仔方式分别，透露被祥嫂打到18岁，指母亲更曾在片场当住众人面前追打她；不过小艾因为祥哥的一句话，从小到大对祥嫂都是“企定定俾佢打”。此外，她又剖白在父亲离世后无法抽离，去父亲坟前哭了一年多，并表示：“我争啲自杀死，我接受唔到。”虽然有一位好友陪伴她走出伤痛，但她坦言至今也未能完全放下。

邓小艾分享与父亲祥哥相处的点滴，坦言儿时与爸爸相处时间不多，但对方是非常疼锡子女：“从来唔会打嘅，有啲乜嘢呢，佢只会提点你，譬如前面有个窿，佢会话俾你听前面有个窿，你行多10步就跌，佢会话俾你听，但系你自己都要跌落去呢，佢会俾你试，你跌咗之后上返嚟喊，佢就会呵返你，话俾你听一早讲咗你又唔听。”不过都试过一次，因为几兄弟姊妹贪玩在家里踢波，踢到扫烂了神台香炉，祥哥追到他们上天台，他们吓到躲在水箱几小时才敢出来。

而母亲洪金梅相比之下就是做“黑脸”一方，会打仔女，但小艾都是母亲说一就一、说二就二，非常听话，她说：“因为我爸爸同我讲过一句，阿妈几唔啱，几唔好你都唔好出声，因为我，你就忍咗佢啦！我由细到大都系执住呢句说话，阿妈做错……唔好话做错啦，恶过头，我都唔出声，就算打，我哋三个都企定俾佢打，唔郁㗎，打到18岁，我俾阿妈打到18岁。”

小艾忆述18岁时去拍戏，拍梁李少霞的电影，因为凌晨4点开工，所以她提早就驾著家里的Benz溜出去玩，“看更返嚟话俾阿妈听‘邓太，架车唔见咗！’𠮶时未有电话，得Call机，我又冇覆机，差唔多四点就去片场，化紧妆，我阿妈一冲入嚟就打！打得好劲！啲人全部呆晒，导演、乜人都唔够胆出声，佢打完就走，打俾梁李少霞话‘唔拍喇。’后尾拍埋都要我舅父跟住，因为惊我再去玩。”

不过小艾后来就明白母亲的苦心，其实因为她是家中第一个女儿，如果出事，祥哥会“诈型”和怪罪：“老窦唔喺我面前讲，私底下喺我阿妈面前讲，话‘有咩事你赔返个女俾我’，咁我阿妈咪好大压力啰，呢啲压力我哋唔知，到后期阿妈话点解佢咁恶、点解要咁，我哋先知。”此外，她说祥嫂确实是专注于照顾祥哥而曾忽略子女，但如果她不是把父亲照顾得这么好，祥哥绝对没有今时今日的成就。

小艾一向都是祥哥的掌上明珠，甚至祥哥不准她出国留学，要她留在自己身边，两父女感情深厚，因此祥哥离世时，小艾一度因为不能接受而想过轻生，她表示：“当日……我抽离唔到，其实喺𠮶段时间系有一位朋友真系救咗我、帮我。我争啲自杀死，我接受唔到，系𠮶个朋友陪咗我个几月，陪我瞓、陪我食，起居饮食陪住我，帮助我好多，可以抽离啲。跟住我都有年几不停上山，喺爸爸个坟前喊，好多嘢其实你问我，到今日我都唔抽离得到，但系只不过系摆低啲。”最后，小艾又说，尽管当年曾有一些不好的新闻、盖过了祥哥的努力，但如今出书纪念，至少可以表扬爸爸的成就、贡献：“佢嘅所有嘢都都系佢自己一步一步累积返嚟。以前嘅嘢过去咗，大家有误会又好乜都好，过咗去，始终喺𠮶段时间佢系靠自己。”