近年备受公司力捧的TVB小花何沛珈（Roxanne）昨日（4日）出席剧集《非份之罪》晚宴，她接受《香港01》访问时坦言剧中与前男友阮浩棕的亲吻及床戏均是她的第一次。面对初次挑战大尺度的亲密戏份，何沛珈直认当时心情非常紧张，但大赞对手阮浩棕极具绅士风度，让她倍感安心。

首拍脱衣戏不知所措

提到今次接拍的角色，何沛珈坦言难度极高且层次丰富，对她来说是一大挑战：“因为系一个五集嘅单元剧，所以有好多背景资料都未必可以写到晒出嚟，就好多时要靠演员自己去脑补。咁我好感恩我拍到呢套剧之余，之后大家都同我讲话觉得我做得几好，所以系我今年最大嘅一份生日礼物。”剧中她与阮浩棕有不少亲密接触，她笑言自己是首次拍摄这类戏份，心情难免忐忑：“其实浩棕每一场亲吻戏都拍得好自然，因为佢都系一个好专业嘅演员，我都好开心，因为𠮶次系我第一次拍亲吻或者同男仔有咁亲密接触嘅戏，所以我当时嘅心情系非常之紧张，加上有好多镜头好多人望住，所以系更加惊嘅。当时我冇太多嘅谂法，就系希望可以好好地完成呢一场戏。”

何沛珈透露，为了避免拍摄时出现误会或尴尬，两人与导演在事前进行了充分的沟通：“我记得有一幕，系会除咗我件褛，𠮶度都有浩棕，同埋导演。我哋三个倾过，就系个动作会系点啦，只手应该系点摆啦，因为我真系好紧张，只手又唔知摆喺边度好。除咗我件褛嘅时候，佢哋都有再同浩棕讲话，你除到边一个位就ok啦，所有事前我哋都有沟通。”被问到在众目睽睽之下拍床戏会否尴尬，她笑称：“拍嘅时候都会尴尬㗎，因为咁多人望住，拍一啲咁亲密嘅戏都会紧张㗎。不过有呢次经验之后，我之后喺其他剧集拍一啲亲密啲嘅镜头，我就唔知点解开始冇哂包袱，就可以即刻嚟啦。”

何沛珈直言未听过咸猪手名单

对于娱乐圈有传“咸猪手名单”一事，何沛珈就直言“未听过”，她亦觉得自己非常幸运，从未遇过类似情况：“我合作过嘅男演员又好，女演员又好，其实都系好好，冇试过咸猪手。女演员嘅话，就最多系我揽，成日揽住阿Moon！”

新节目《女神2》大爆男参加者“靓仔到爆”

除了剧集，何沛珈最近亦正忙于拍摄综艺节目《女神配对计划2》。提到节目中的男参加者，她即时双眼发光，大赞质素极高：“Mandy（阮嘉敏）直接话有一个系‘靓仔到爆’，我哋都好认同！因为一开始𠮶个男仔其实差啲畀我哋淘汰咗。”她透露节目预计将于9月初播出，目前仍在初期拍摄阶段。

面对一众圈外的素人帅哥，何沛珈表示会努力发挥自己“E人本色”去与他们打开话题匣子：“因为始终啲男仔系圈外人，咁佢哋未系好熟识镜头或者都会有少少怕丑，所以我都尽量发挥E人本性去撩佢哋。”被问到当中有多少个男仔“合眼缘”，何沛珈甜笑表示：“合眼缘好多时都系由样出发嘅，所以都几靓仔嘅，我觉得大家都会觉得靓仔！”至于叫她形容一下她觉得靓仔的男生年龄及职业以缩小范围时，她笑指：“呢个未必透露到，但系大家可以对佢哋嘅外形或者系性格上都可以有啲期待，系正嘅！有两三个都好好㗎。”