艺人肥妈（Maria Cordero）今日（5日）出席代言美容院活动，受访时回应有关《中年好声音4》的传闻及争议。对于日前网上流传《中年好声音4》的七强名单，肥妈表示有听闻，但自言并不清楚名单真伪，“其实我哋𠮶日（录影）已经系叫啲观众走㗎啦，因为我哋都唔知边个，后尾就话个名单流咗出去。（即系名单系真？）Er……我就唔知啦。”对于有传名单中“香港参赛者全军覆没”，她表示：“其实你睇落去先会知有咩感觉，因为个个都追个节目，而家唔系分咩人，系歌唱比赛，佢哋唱成点，当时嘅环境唱成点，咁先至公平。”

回应吴亦伟争议

提到有不少网民闹爆参赛者吴亦伟表现不佳，甚至“唔知唱乜”但依然拿到高分，连带她们一班评判都受质疑造马？肥妈直言：“边有得造马吖，年年都话造马，如果有得造马，我造俾我识𠮶个啦。比赛系靠你每一场嘅表现，每个人唱歌都有高低，陈旭培我够tip佢一定入𠻹喇，喉咙唔系机器嘛。”

网民不明周国丰为何在过去一集给予吴亦伟95分高分？肥妈“解释”：“周国丰最近观音开库嘛，你唔知咩？咁佢又唔系净系开库俾佢（吴亦伟），好多个都有，呢个事实。”肥妈也力撑吴亦伟：“咁佢系讲广东话唔清楚啫，事实佢系一个难得嘅音乐人，呢个是事实。同埋能行到嚟十强，个个都唔容易，同埋我觉得入到十强已经红咗啦，唔使个个都做冠军嘅。”

爆内地曾收“纸仔”即落闸拒做

但吴亦伟唔得民心被围插？肥妈认为：“有咩节目做得好，都有hater㗎啦，总有人赞你或唱你。（反而尹景顺获大赞？）我参加过佢哋啲活动，每个人都好多Fans。”她亦补充指，节目评审过程公平公正，绝无收到节目组或高层的压力，“边度俾到压力我？你睇下我个口几臭！”

至于过去担任评审时有否遇到“造假”或被要求给予特定参赛者高分？肥妈坦言曾在内地节目遇到类似情况：“我有次喺内地收过张纸仔，话要俾呢个人过，咁我即刻话唔做啦！因为违背自己要嘅嘢嘛。”

提到张佳添亲证《中年好声音》第五季阵容洗牌，有传无线已Mark定肥妈一定要继续坐镇，肥妈表示未收到通知，“最好啦！我对呢个节目好有感情，但每间公司嘅决策唔系我哋去讲，有得做我一定做，执到，𦧲饭应啊。”