伍咏薇（伍姑娘）今日（18日）出席遵理学校元朗新据点开幕典礼，力撑“补习名师”兄长伍经衡博士（Richard Eng），期间透露她与李凯贤（Brian）主持的《九运会客室》添食，目前正为第二季录影中，她更大爆将有一位消失多时、极少受访的嘉宾畀面现身！对于早前主持因在节目中爆出“杨思琦欺凌风波”获封为“花生制造机”，伍姑娘则否认自己惹火，对于拍档Brian狂讲粗口，伍姑娘笑言自己私下都不少助语词，并表示：“Brian有佢风格同市场价值，钟意又好、批评又好，呢啲先系收视。”

否认《九运》刻意爆料制造花生　强调只分享亲身经历

讲到之前节目内容非常惹火，伍姑娘强调自己并非传统主持，节目任嘉宾自由发挥，亦非为了“爆料”：“我唔系爆嘢，你谂清楚成件事，其实我同思琦妹合作过同一套剧，我系有份参与，既然我有份参与套剧咪讲返我哋大家一齐合作嘅过程，一啲开心嘅嘢，或者唔开心嘅事情，我觉得唔系是非㖞，唔系俾你剥花生㖞。你话如果我，系一个节目主持，我问杨思琦或者唔知边个艺人，‘你套剧听讲你同阿边个咁咁咁㖞’，咁就系爆料，咁就系一单娱乐新闻，就好似你哋做嘅嘢啦，我冇参与你哋做嘅嘢，我参与系关我事嘅嘢，系一件真实嘅个案，大家分享咗喺个节目度，大家就觉得好真实去听，就变咗你喺度剥，咩花生制造机，其实系嘅，唔使惊个节目，都系分享。”

分享内地拍剧女星上人酒店房　伍姑娘：八婆仔分享下但唔会开名

而讲到其中请简慕华与梁嘉琪的一集，节目上二人透露内地酒店隔音比较差，因此听到隔壁单人房有两位演员的声音，简慕华直指那间房里面不应该是那个人：“其实𠮶间房开门唔应该系呢个人嘅，我记得！”讲到这件事，伍姑娘笑言：“我哋比较幼稚少少，六壮士个名就系咁嚟，我哋好friend嘅，有啲事大家见到面忍唔住，八婆仔分享吓，但系我哋梗系唔会开名，一份尊重嚟嘅，你哋有你哋估，剥花生咪剥餐死，我有我做我哋嘅嘢，亦都系我哋好开心分享我哋嘅事，所以唔使惊我哋呢个节目，呢个节目个个都好开心。”

第二季邀得久未露面重量级嘉宾　伍姑娘感动获对方信任

她同时喜讯宣布《九运会客室》第二季已正式开拍，今次更请到多位重量级、甚至早已隐退或极少接受访问的神秘嘉宾。她透露其中一位嘉宾让她极为感动：“佢应该唔多接受访问嘅，亦都唔想嘅，唔系我邀请，但系我哋个制作团队揾佢，佢谂咗好耐，之后答团队，佢哋话其实同我唔系好熟，不过好信任我，如果交俾我做访问，佢会觉得好安心，我系有少少感动咗。我头先讲过，作为一个唔系咁专业嘅主持，你对我嘅感觉系觉得伍姑娘好有义气同埋佢好好，同埋好放心交俾佢做访问，我听到系好感恩嘅，我会更加做好个节目，同埋会俾心机做好个访问，因为好难请到佢。”被问能否剧透对方属于影视还是音乐界，她表示：“你哋会想睇嘅！你哋咁八卦！”

本辑新增情侣嘉宾　直言唔会请练海棠：唔够钱我唔会出卖老公

上一辑清一色以女嘉宾为主，很多人都敲碗想要男嘉宾，七师傅透露：“今次有Couple，夫妻，会有啲夫妻。”至于被问到会否邀请老公练海棠上节目放闪，伍姑娘即场拒绝：“唔会啰，唔够钱呀！因为我好钟意钱㗎，我阿哥系孔子，佢净系教书，但系我好钟意钱，所以唔够钱，我系唔会出卖我老公。”

撑Brian讲粗口有市场　伍姑娘：批评赞美都系收视

提到节目拍档 Brian（李凯贤）在节目中频频讲粗口，伍姑娘认为与对方合作很舒服、很有火花，指Brian受某一类人欢迎是有原因的：“每一个艺人，你喜欢佢边样嘢，佢个风格就由你去选择， Brian佢嘅出现，廿四味，𠮶时你又唔讲，系咪？Brian写蝴蝶，好㖞，咁大家都喜欢佢嘅风格，佢自己都有个YouTube嘅节目，都好好收视吖，系咪？佢有市场价值喺度，我同佢合作好开心，虽然佢助语词好多，但助语词佢又讲得好好听，我又唔介意。”她又笑说自己私下都多助语词，但碍于家中办教育所以不宜多讲：“但系我嘅助语词不下于他，但系我有啲咩就摆喺心里面，我唔会讲嘅，有口业。Brian有佢风格同市场价值，我觉得有得我哋两个主持嘅风格走出嚟，你有批评又好赞美又好，钟意又好，唔紧要，呢啲先系收视。”

否认七师傅与Brian录影有火药味：我趴咗喺地下度笑

至于早前伍姑娘、Brian与玄学师傅唐碧霞开直播，唐碧霞问到镜头后会否有嘉宾有火药味、气氛不太愉快，当时伍姑娘做了个“七”字嘅手势，又提到“数字人”，似暗示七师傅与Brian间“有啲嘢”；Brian当时指当下确实有少少冲突，但知道对方“个心都唔系衰”，所以觉得可接受，过了就不想多谈。伍姑娘对此表示：“冇冇冇，你问我，我又唔觉，真心，冇火药味！七师傅好好笑，我趴咗喺地下度笑，佢可以同UFO联络，我觉得劲揪㖞呢单嘢！”

年初约满英皇回复自由身　指与旧东家关系仍良好

另外，2023年宣布签约英皇娱乐的伍姑娘，其社交平台联络方式已改为私讯，被问是否已离巢，伍姑娘大方证实已于今年年初正式约满英皇娱乐：“我哋大家合作得好开心呢几年，约满咗，自己出嚟跑，好多谢！好感恩，都有工作做，嗱！我同英皇娱乐系好好关系㗎！”谈到要单打独斗会否有压力，她坦言：“担心嘅，始终觉得大树好遮荫，约满咗，自己都谂吓我呢个年纪，每个人有唔同嘅心情心态状况，会唔会呢个年纪想做啲乜嘢呢？所以都……英皇都好好，分开咗都会问‘点呀？想要啲咩公司都可以俾意见。’所以我都好感恩，我自己而家so far我离开咗公司之后，我都接到好多工作，好感恩，好多谢客户，同公司同事有联络，所以我都会继续努力，你哋都要继续支持我。”