无线歌唱选秀节目《声秀》出身、现年23岁的甄敏芳（Jenny），凭著甜美外貌与温柔内敛的文青气质，在比赛期间已被封“颜值担当”。最近，她更伙拍洪永城和陈懿德，一齐为全新直播玄学竞赛节目《玄战》担任主持。

首次挑战直播主持

甄敏芳昨日（20日）出席节目宣传活动接受《香港01》访问时，表示首次挑战直播主持玄学节目，心情既紧张又不安：“因为我真系第一次面对呢种直播，同埋玄学类嘅嘢我本身唔太了解，真系为咗节目特登去学，睇帮帮（陈定帮）师傅嘅《玄学BB班》，尽我能力去学多啲。”

甄敏芳更自爆最初拍摄时，曾频频“NG”陷入慌乱：“开头拍一个opening嘅tag，其实系一个好简单嘅句子，我唔知点解讲咗四、五次都讲唔顺，好似发台瘟咁！明明我私下已经背咗几百次，去厕所、临瞓前都不停背，所以𠮶下真系觉得好恐怖，之后就开始心慌喇，点算呀？一开始已经搞成咁！”好在有监制及身边的前辈包容，给予她许多信心，令她逐渐平复状态。

理科生变玄学信徒：原来风水同地理有关

本身修读理科的甄敏芳，坦言原本不太相信玄学，但这次节目颠覆了她的认知：“我系非常相信科学嘅人，但做咗呢个节目之后发现，玄学其实都系科学嘅一种，例如风水同地理学系有关，真系有根据！同埋睇到咁多咁厉害嘅高手们，我担保绝对冇造假，真系吓亲我，如果大家唔信一定要睇直播！”

主持节目之余，甄敏芳亦把握机会“自肥”向陈定帮师傅请教事业，对方指其命盘与音乐极有渊源，认同她是适合做这行，令她非常开心，原来自己选择是对的，并期盼未来有机会出歌。此外，师傅更算出她有“外地运”：“师傅话我拍外地嘅旅游节目会爆红！我都好想好似洪永城咁，有多啲机会出去旅游拍节目。（妳想取代黄翠如？）千祈唔好咁讲，做到佢哋嘅小跟班都好呀！”

澄清与苏永康绯闻：绝无爱情成分

早前甄敏芳因与恩师苏永康一张合照，加上一句“Love youuu”而传出绯闻。对此，她抱持轻松态度看待：“唔开心又还好嘅，成件事我觉得都几搞笑，认识我嘅人都知‘love you’呢句系我口头禅。（网民觉得好露骨？）我知啊，可能佢哋身边好少人同佢哋讲‘love you’？所以就觉得系一件好荒谬、好唔应该嘅事咁样。我身边朋友都安慰我，‘傻啦？唔通妳同店员讲句‘love you’，就钟意佢咩？’我都觉得好合理，希望𠮶班网民将来会有人同佢哋讲‘love you’啦！”

甄敏芳补充指，绯闻传出后，反而是苏永康主动联络并关心她：“阿公（苏永康）问我点呀，话‘知妳一定唔开心啦，有人将白嘅讲成黑嘅，换著我都一定唔好受’。我觉得阿公讲得好啱，但我自己就唔会太理会，因为我知自己唔系，阿公对我嚟讲系一位恩师，绝对无任何爱情嘅成分，系有心人夹硬去捏造。”

喜欢成熟男

被问到感情观，甄敏芳坦言喜欢成熟、有领导才能及能带领自己进步的男仔。至于是否介意对象年长10年？她直言：“年龄唔系问题，最紧要系钟意！”对于曾有师傅提醒她要小心“有妇之夫”，她斩钉截铁笑言：“我肯定我一定唔会！不过师傅提醒咗我，以后拍拖我一定会仔细查清楚对方底世，确定佢冇妇先会一齐！”