HOY选秀节目《我要做主播》将于8月24日播映，昨日（20日）节目举行记者会，主持人方健仪、陈启泰；嘉宾张文采、林小珍、麦诗敏、伍家谦、余琦琪、丘静雯，以及33位首度登场的参赛者齐齐现身。方健仪与陈启泰除了分享不少对心目中理想主播的要求及面试贴士外，接受《01娱乐》访问时亦有回应节目争议及传言。早前网上有自称幕后人员爆料指节目有内定名单，并批评陈启泰工作态度欠佳及背不熟稿，方健仪表示二人没有参与评分，指：“每次比赛𠮶个结果出嚟都可能有唔同嘅讨论，但系我哋都唔好抹煞我哋每一个参赛者嘅努力。”至于陈启泰对于传言并不介意，更感谢有人帮手宣传：“我哋并唔系喺大台做节目，我自己亦唔系咩大节目主持人，有咁多媒体关注你，肯同你做宣传，其实好多时呢啲喺大台先会发生，竟然而家我同Akina合作做呢个节目，咁老正嘅，有人帮我哋炒作新闻，系好难得！”

点击下图看各参赛者照片：

方健仪著重咬字及外表整齐端庄　陈启泰笑言拣主播似拣新抱

谈到挑选参赛者的标准，方健仪表示看重咬字、对新闻行业的热诚，以及整齐端庄的外表，她更自嘲：“外表唔一定要靓，我成日都话睇我就已经知，我唔系一个靓嘅人，但系都做到，所以就唔需要话要好靓好靓，但系我觉得系要整齐，要干净端庄大方。”Ken哥则笑言自己拣主播像拣新抱、拣女婿：“唔系讲笑，观众缘系好紧要，譬如话我哋呢个年纪，如果我有小朋友，都要拣女婿拣新抱，你要真系入到屋，你要见到佢开心、舒服，唔使一定好靓，但系一定要见到佢有一种好舒服嘅感觉，冇压力先至得。”方健仪即打趣问他当年看自己报新闻有冇“新抱感”，Ken哥笑回：“我未到𠮶个年龄可以睇新抱，净系觉得‘哗！劲！呢个新闻女王劲！’”

面试几秒靠自信建立公信力　穿得太随意立即扣分

两人又指面试者的第一印象极为关键，会直接导致加分或减分，方健仪：“成日都讲几秒公信力嘅建立，其实真系行入嚟𠮶吓已经见到腰板挺唔挺直、有冇自信，𠮶吓已经赢咗一半，再加埋一开口嘅时候见到佢哋语文能力好好，英文甚至乎外语，有泰文、日文、韩文，𠮶啲已经好高分。”她说有人以为主播只需坐著报新闻，但如果有特别技能、瓣数够多，其实也随时有机会大派用场。之后Ken哥特别提醒，千万不要以为自己“Overdressed”（衣著过度正式），直言：“好多人第一次嚟面试嘅时候，着得好casual，减分！即刻减分！我哋提咗佢之后，大家着返正装，有返件恤衫，打返呔，女士着返啲裙，着返少少嘅高踭鞋，唔好太高，太高又唔得，永远唔会太过overdressed，你而家嚟面试㖞！”

阎小姐普通话自我介绍惹议　二人指广东话能力仍是必须

HOY在社交平台上播出部份参赛者的面试及参赛片段，其中来自重庆的网络红人“阎小姐”阎佩萱讲普通话自我介绍引起热议，有网民认为“连广东话都未讲好，谈何做主播报新闻？”问到讲广东话是否做主播的基本条件，方健仪说HOY有不同语言的节目，英文、普通话、广东话，每个语言都需要不同人才，建议阎佩萱想在香港发展的话，可考虑普通话新闻报道。她指既然《我要做主播》是香港选秀节目，当然都会注重广东话能力，倘若识得更多语言，例如：日文、泰文、韩文都会加分。Ken哥则表示两文三语在香港是必须，谈到自己自学普通话的经历，鼓励大家多学语言：“我30几岁因为要做主持，被逼要学，喺亚视𠮶阵时，逼我要讲普通话，𠮶时觉得好大压力，后尾逼逼下又觉得OK，终于我喺十几年前，帮央视做过一个‘秋晚’，系全普通话，系有用㗎！唔会话多咗，呢啲嘢永远可以用得返，咁梗系多啲好！”

回应Threads内定造马指控　方健仪：我哋冇份畀分

早前有自称节目幕后人员在Threads爆料，指节目有内定名单、参赛者答题时公然作弊、陈启泰摆款背唔熟稿等等，方健仪坦言自己很早已看到该帖文，第一时间向幕后求证：“我话‘喂，系咪宣传伎俩，你曲定直？’佢话‘我哋都唔知’，所以我第一下以为系宣传嘅手法，但系似乎问过佢哋就唔系。”她表示二人只是主持，根本没有评分权力，有时参赛者被淘汰了她和Ken哥都是后来才知道，又谓：“第一我冇份去评分，第二有时我都会觉得，我哋都要尊重或者欣赏返各个参赛者嘅努力。当然我哋每个电视台好多嘅选秀，好多比赛，每次比赛𠮶个结果出嚟都可能有唔同嘅讨论，但系我哋都唔好抹煞我哋每一个参赛者嘅努力，但系最终你话有冇一啲内幕嘅嘢，我哋两个好肯定咁讲我哋冇份参与，我哋冇份比分！”

陈启泰感谢对方帮手宣传　笑言：唔系大台都有咁多媒体关注你

至于针对Ken哥工作态度的部份，他说自己没有Threads帐户，接到记者查询时才知道此事，但他完全不介意，也向记者表示没什么需要澄清，更感谢对方免费宣传：“我话我唔知㖞，冇㖞，我真系唔知同埋冇，但系我真系好多谢嘅就系，因为我哋并唔系喺大台做节目，我自己亦唔系咩大节目主持人，有咁多媒体关注你，肯同你做宣传，其实好多时呢啲喺大台先会发生，竟然而家我同Akina合作做呢个节目，咁老正嘅，有人帮我哋炒作新闻，系好难得！喺咁多个节目当中要跑出嚟，并唔容易，有啲咁嘅宣传，我真系唔系太介意，亦都好感谢。”他更搞笑补充：“但系如果开续集嘅话，我哋一定会控制啲参赛者嘅生死存亡，一定会有造马！一定态度更差！”

方健仪力证陈启泰背稿一字不漏　Ken哥自豪从不依赖提字机

对于Ken哥被指态度不佳、背不熟稿，方健仪用“离谱”形容，大赞：“佢唔使点准备都可以好流畅咁样讲啲好复杂嘅稿。”她透露自己在节目主力陪参赛者训练、实习，Ken哥则负责控制大局：“好多规则𠮶啲嘢，好复杂𠮶啲游戏边个筛边个、畀咩分，佢完全可以一字不漏咁样讲晒出嚟，其实伍家谦都喺度、潘蔚林都喺度，佢话‘哗！阿Ken真系好坚！’”方健仪说自己视Ken哥为学习对像，Ken哥先是笑说：“你冇留意我AI眼镜入面有投射嘅咩？”之后再解释因为自己是主持出身，背稿背了几十年，一直都冇依赖提字机：“我系近年出街拍嘢先有导演话‘睇唔睇提字机？’我话‘有提字机咁好！你早啲同我讲！’所以咁多年我哋仲未睇过提字机，最多都系间唔中有两句大字报提一提我哋，做主播有个好处，佢哋有提字机，但系我觉得两样嘢都要配合，有啲好正经，好多嘢记𠮶啲咪需要。”

七位主播梦幻同框　方健仪：我年资少过张文采林小珍㗎

此外，谈到早前林小珍在社交平台分享七位主播拍摄节目时的合照，包括丘静雯、余琦琪、张文采、林小珍、黄洁慧、麦诗敏以及方健仪，被指是“跨时代世纪合照”，在网络上回响甚大。方健仪则澄清：“其实我哋同一个世代㗎！我哋同一个Generation！我系年资最浅㗎，我嘅年资系少过张文采同埋林小珍㗎，我报得五年新闻咋嘛，但系佢哋都系十年或以上，所以啲网友我见到都好笑，啲人话唔同世代，论年纪当然系我最老，但系论年资我系最Green嘅。”她感叹主播因为轮更及外访，过往即使效力同一公司也极难碰面，上次大规模聚会已是她离职Farewell当晚，与十多位同事去旺角食宵夜，今次难得有机会在同一空间聚头，实在是美好回忆。然而，回忆再好也难以打动方健仪重出江湖再坐主播台，她笑说试过就算：“冇啦，我太老喇！佢哋（参赛者）咁后生，好现实嘅，喺香港系好难容纳到好似一啲我呢个年纪嘅新闻报道员，喺外国CNN、BBC𠮶啲系得，但系香港始终文化唔同，所以如果去到我呢一个嘅年纪或者呢个阶段，应该都系做幕后比较适合。”Ken哥随即在旁总结：“而家佢嘅舞台唔系主播台，系江湖！”