玄学家陈定帮（帮帮师傅）最近为TVB玄学竞赛节目《玄战》担任顾问主持，昨日（6日）他连同三位主持拍档洪永城、陈懿德及甄敏芳一齐于电视城为节目宣传。节目日前请来13位“黑先知”及“白先知”玄学家预测9月5日晚的六合彩金多宝搅珠结果，成功引起话题，不少网民跟跟随玄学家们的心水下注，可惜命中率未如理想，最准反而是陈懿德选中三个，引起网民热议。

中六合彩属极低概率　高手同场或互相干扰

对此，陈定帮接受《香港01》访问时为众玄学家参赛者发声：“大家又唔需要咁认真，术数本身就包含‘术’同‘数’，系有数学成分喺入面。真正嘅数学概率，要中晒可能都系六千万分之一，唔可以期望大家咁容易算到。术数只系帮我哋提高机会率，比普通人可能只系高啲啲，同埋排除颜色等。我问过AI，如果估中所有颜色，都系得5至8%概率左右。”被问到多位高手同场发功会否互相抵消或影响？陈定帮认为确实有机会：“好似阿岚（吕尚聪）呢类高感人士，佢有自己独特嘅一套，Solo可能仲准，身边冇人干扰佢就可以发挥得更好。”

曾中六合彩三奖　教睇“两大卦象”投注

陈定帮亦分享了自己买六合彩的经历，坦承自己曾中过5个字（三奖），但他强调当时并非靠计算，纯粹靠运气：“不过有啲迹象可以教大家，𠮶次我系去马会做嘢，咁啱就系士丹利街投注站，第一个卦象就系最容易中𠮶间啦；第二个卦象就系喺投注窗口，好似见到有个人望出来，笑住叫我过去，我就觉得唔洗谂，即刻去（买）啦，啲数字都系电脑飞。我发觉我中过几次四个字，都系类似咁嘅情况，啱过去𠮶期我都中咗1200蚊。”他提醒大家买六合彩时，可以留意特别热情、好似“送钱”给自己的六合彩售卖员。

回应节目造假质疑护航参赛者

对于有网民质疑节目“造假”或有剧本，陈定帮坦然面对：“点样都会有质疑嘅声音，我哋控制唔到。但我觉得可以对啲参赛者公平少少。佢哋都落咗好多苦工，付出咗好多努力。要讲一句嘢系好容易，但人哋可能系用咗几年，甚至十几年心血去学一门手艺，唔可以一笔抹杀人哋嘅努力。”问到会否建议节目组邀请质疑的网民上节目现场即刻测试？他表示：“都可以呀！”

不怕被AI取替

作为节目顾问，陈定帮表示其角色就是帮参赛者放大自己本身优势：“我觉得自己好似补习老师咁，教佢哋答题唔好写咁多嘢，写核心重点就得，唔好谂咁多。”谈到节目加入AI元素，拥有IT背景的陈定帮坦言深受震撼：“我都觉得好劲，因为我本身都系一个IT人，平时嘅赛博算命我试很多，但我觉得都麻麻哋，不过今次AI讲嘅嘢非常精准，我走过去电脑睇，佢真系讲埋宫位、星宿同奇门遁甲嘅门路，完全唔系乱吹。”

不过，陈定帮并不担心AI会取代玄学家：“我觉得迟早术数师都系要融入少少AI功能嚟提升准绳度。AI强喺读书、记忆同海量数据分析，但人类始终有直觉同灵感。将AI嘅数据同人类嘅直觉结合，反而系一个很好嘅组合。”