昔日有“最前卫港姐”之称的郑文雅，今日（10/9）出席慈善义卖月饼活动。提及本届出炉港姐冠军袁丝珩遭网民狠批颜值为“史前最丑”，以及季军李泽欣因合照时“趷脚”而被指心胸狭窄、言行好胜等争议，郑文雅接受《香港01》访问时大方分享了其个人看法。

郑文雅坦言自己近期因忙于准备个人展览，并未特别留意娱乐新闻：“真系好唔意思，因为我呢个月份有三个展览我要准备，一个系书法，一个系画，一个系瓷画。所以我呢九个月呢我系忙到不得了，啱啱今朝早呢我先去大会堂，摆咗个展览我先再过嚟。其实因为而家我嘅生活方式呢，已经脱离咗个娱乐圈太多年，你明白呀？你哋𠮶啲新闻我‘扫吓扫吓’咁啰，但我冇去特别留意。因为点解呢？如果佢哋系赢咗呢，佢哋将来系会加入慧妍雅集㗎嘛，咁我哋到时咪识啰，唔使特登去了解知道系边个啰。”

以过来人开解后辈：选美“各花入各眼”

作为港姐前辈，被问及佳丽们面临铺天盖地的负评时，郑文雅以过来人身份给予客观而睿智的建议。她认为选美与运动不同，根本没有绝对的客观标准：“我觉得喺人生嘅道路入面呢，不如咁讲，因为呢个始终系人嘅社会，会系好多唔同嘅声音嘅。咁但系你自己做你自己钟意做嘅嘢，或者你系集中做自己嘅嘢，根本系唔需要去理人哋点样讲。我自己觉得最紧要，尤其系选美呢啲嘢啦，唔系运动嘛。唔系运动嘅意思即系话，运动你系好清楚，你跑得快你就系赢，或者你跳得高，我系跳高运动员出身嘛，咁我跳得高过人，咁我就赢。但系选美系一个好……点讲呢，‘各花入各眼’，同埋系好客观……即系大家睇嘅眼光都唔一样。好简单，你拣个女朋友同佢拣个女朋友，个样都唔一样啦，系唔系先？所以我觉得唔需要咁样去评论人啰，每一个人呢都系有佢嘅长处、有佢嘅短处，冇需要去将人哋啲短处去放大啰。”

活出自我　奉劝网民勿将时间花于批评

现年66岁的郑文雅保养得宜，心态亦非常豁达。她直言将时间放在自己身上更为重要，无须过分在意外界的非议，亦不必耗费精力去评论他人。

她感叹道：“我今年66岁喇，我活咗66年，呢个就系我嘅睇法，即系唔需要去理会，因为自己用喺自己身上嘅时间基本上都唔够，所以你根本唔会想要去理人哋嘅，唔需要啰。”