前港姐冠军陈庭欣（Toby）今日（10/9）以星级大使身份，到湾仔出席一个慈善跑活动记者会。自早前结束与彩丰行老板杨振源长达8年的恋情后，陈庭欣的感情动向一直备受外界关注，而她近期的桃花运可谓相当旺，继早排与嫩口“东张男神”曾锦燊（Charles） 传出姊弟恋绯闻后，近日又获谢东闵（闵大人）包场为她庆生，因而爆出被男方力追的传闻。

谢东闵埋单生日饭 陈庭欣坦言：系好开心

陈庭欣接受访问时，被取笑生日饭当晚谢东闵和曾锦燊如左右“护花使者”般站在她两旁，陈庭欣笑道：“其实我都唔知点解咁啱𠮶个企位，其实纯粹系因为佢两个高，站喺后面，而谭嘉仪就想企喺小鲜肉隔离，所以就企埋一齐。”

生日饭最后由谢东闵主动埋单。陈庭欣自言都是后来才知道：“其实我系被安排！系Charles同邓凯文等一班东张师弟、师妹帮我搞生日饭，我都唔知点解佢会咁好买咗张单！（感唔感动？）系好开心，多谢佢请食饭。（东张男神先输一仗？）佢不知几开心，可以悭返啲钱，佢只系同我食茶餐厅㗎咋！”

不介意与谢东闵组情侣档揾钱

陈庭欣坦言与谢东闵相识已久，应该都有15、16年：“我哋系同期入TVB嘅，但其实过往一直以嚟，佢都好似冇请我食过饭，今次餐饭除返15年，都Make Sense嘅！”追问其实谢东闵是否暗恋了她 15、16 年？陈庭欣即笑著否认：“点会啊？唔会啦！（会唔会之前唔敢同妳讲咋？）不如你哋问佢。”

不过，陈庭欣坦言不介意与谢东闵组情侣档揾钱，“如果下次有啲比赛叫我哋一齐去打，一啲商演可以叫我哋一齐去，我做MC，佢唱歌，咁咪可以一齐揾钱。（组成‘情侣档’？）点话点好喇。”

偏爱成熟男

对于两位男士在心中谁更占优势，陈庭欣笑说：“冇啊，冇乜谂啊！完全冇考虑过！我返去谂谂先！呢个问题仲难过今年港姐𠮶啲。（对闵大人印象点？）高啰，但最近同佢打波真系见密咗。佢系好认真打波，亦都好沉迷打波。（定系沉迷妳咋？）唔关事，佢系因为金刚学嘅。（有冇打友谊赛？）都有打，分到胜负嘅。不过佢一打就话关节痛，所以我之前都畀咗啲健骨骼佢食。”

陈庭欣大方表示自己现时单身，亦没有特别“拣择”。择偶条件偏好年长男性还是小鲜肉？她表示：“根据过往嘅纪录，全部都系年纪比我大嘅。因为我嘅思想比我实际年龄都成熟十年。小鲜肉真系唔敢谂。（下年踏入40岁了㖞，唔心急咩？）唔好畀个年龄框住自己。”

之前林盛斌曾拍心口说帮她觅得如意郎君？陈庭欣笑指没有“新进展”，体谅对方现在忙于拍摄《女神配对计划2》，相信对方也会从求爱者中帮她物色，“我有睇到整冷气𠮶个，我即刻check屋企部冷气有冇事，但又无漏水。”陈庭欣笑言错过了参加《女神配对计划2》，希望有机会去踢馆。

中秋同谢东闵搞场友谊波

谈到中秋佳节人月两团圆，陈庭欣自嘲：“咪食灯笼玩月饼啰。每年都话安排我喺《东张西望》直播时候表演食灯笼玩月饼，因为讲咗好多年我都未找数，暂时我都未揾到个灯笼系可以食嘅！我希望今年有人设计到个灯笼可以食，我就可以表演食畀大家睇！（可能闵大人又畀惊喜妳呢？）好啦，我哋搞个中秋友谊波啦，礼物就送我人形1:1揽枕。”

陈庭欣为备战匹克球赛到越南特训

另外，谈及这天的活动，陈庭欣自问跑步不擅长，所以只报了3K赛事。她笑言比起跑步，自己更喜欢打球，并透露将于十月参加在香港举办的匹克球大满贯，赛事总奖金高达过百万美元。她坦言：“当然我无可能会赢到金牌，但我今次能够参加，系因为有个朋友嘅女Partner受咗伤，所以我系补上嘅，希望唔好辜负佢哋。”为了以最佳状态迎战，陈庭欣计划抽空前往越南特训，因为当地场地选择多且教练水平高、价格划算，而她为了备战也要努力练体能，到时亦欢迎谢东闵和曾锦燊前来观赏赛事。