李龙基今日（10日）出席一个长者慈善歌唱比赛活动，讲到早前与一位女伴齐齐观赏《中年好声音4》决赛，他再次澄清对方是吴大强朋友，当日去到现场才首次见面，但不知吴大强是否刻意想介绍女仔俾自己识。不过，早前TVB节目《玄战》预测李龙基2027、2028有桃花，现时心如止水的他就坦言：“我而家呢个环境，我觉得，唉，过返自己自由嘅生活好啲嘅。”他不讳言有女士埋身或示好，但自己经过之前的阴影，已不自觉筑起围墙。

支持长者歌唱比赛　基哥对唱歌永不言休：有人听就唱

讲到出席今次长者慈善歌唱比赛，基哥表示绝对支持：“有少年嘅、青年嘅、中年嘅、梗要有耆英！我听完之后觉得佢哋水准好高，应该佢哋平时都系训练有素。”他透露自己刚去完澳大利亚表演，Encore又Encore，唱足三个钟，非常开心，基哥指对于唱歌的心态是永不言休：“有人听我咪继续唱，唱到自己真系唱唔出，就开始要休。”

《玄战》预测2027有桃花劫　基哥会警剔：将歪嘅路走返正

早前李龙基现身TVB节目《玄战》，节目中一众玄学师傅都认为2027年李龙基会有新桃花，陈定帮师傅亦判断他2027年至2028年会有突如其来的桃花运，不过要留意的是，2027年受孤神星影响，遇见的人或关系会有瑕疵。基哥对此表示睇得好淡，因为上天一早有安排，对于好师傅所讲的桃花，他说：“心态冇乜开心与唔开心，所以我其实觉得所有嘢都系上天安排，要嚟嘅嚟，要走嘅走。（话你2027年有劫，会唔会有戒心？）都啱嘅，自己小心啲啰，有时虽然冇错，我成日都咁谂，上天安排，但系有时有好多嘢，你系需要自己掌握好多嘢、纠正啲嘢，若然上天安排一个唔好嘅嘢，你自己当阵时要小心啲，将自己走歪嘅路走返正，所以都好嘅呢个节目，上咗之后就有啲警惕！”

有异性接近　惟上段情留阴影宁愿单身：自己筑起一道围墙

谈及最近有没有桃花，基哥先表示没有，后来就自爆：“都唔怕讲，事实系有好多女士们都知道我而家系单身，有意无意咁样，我自己感觉得到，不过喺我而家呢个环境，我觉得，唉，过返自己自由嘅生活好啲嘅，所以暂时都未有呢个打算。（记者：就算情投意合都唔打算？）冇啦，如果唔系好刻意去了解佢，都唔知道佢会唔会情投意合，但系你问我而家，我就唔会用一个好刻意了解对方嘅心情，系，我感觉到佢好似系接近我，但系点讲呢，我自己好似筑起一道围墙。”问到是否因为上一段恋情而蒙上阴影，基哥苦笑谓：“都……都应该系有些少，有所警惕啦。”至于有否与王青霞联络，基哥透露对方久不久都会传来讯息，例如近日陈观泰离世，王青霞都有转发过往陈观泰与基哥饮茶的照片给他，但他未有回复：“唉，let it be啦，由得佢啦，过咗去就过咗去。”

再解释《中年好声音4》女伴身份　称不知是否被撮合

不过，早前李龙基被指与一名女伴结伴去观赏《中年好声音4》决赛，他事后已即时澄清：“我暂时未有新欢，今晚坐喺我旁边的女士是吴大强先生的朋友😂😂😂😂😂”他受访时再解说：“系吴大强（阿Bill）同我讲，问我去唔去，我话好呀，得闲就去，我以为佢同我一齐坐，点知𠮶日上午佢同我讲，‘我同你唔系同一齐坐，我有个朋友，你介唔介意同佢一齐坐？’我话唔介意，朋友，大家一齐坐埋一齐睇，我亦都唔知道佢系男抑或女，去到现场我先知道原来系一位女士，后来倾吓倾吓，原来呢位女士就同大强好好朋友，大强畀咗张飞佢，同我一齐坐，都有啲人问我，‘系咪阿Bill有意撮合你呀？’呢层我就唔敢肯定，唔知，我相信唔系嘅，可能咁桥啫。”

称交换联络方式属礼貌　完骚后已没再联络

基哥表示当晚有跟对方交换联络方式，不过只是属于礼貌，完骚后二人已没再联络，问到是否因为被报道吓亲，基哥直言：“我觉得都系需要厘清呢样嘢，因为最近真系好多女士们，喺我身边嘅女士都有啲防范，真系嘅，有啲防范，惊俾人影到或者俾人讲，唉，唔知啦。”不过他自己的心态，就暂时未有意跟任何人发展关系。

谈梅启明事件　对别人家事不评论：希望佢做得好好睇睇

此外，早前梅艳芳母亲梅覃美金离世，其子梅启明闹出不少风波，更开记招高调宣布与以儿子身份争赢姪仔的治丧权，基哥对此仅表示：“呢啲系人哋嘅家事，有时见到啲唔开心嘅嘢都有啲心悒，希望佢哋尽快将呢啲唔好嘅嘢抹晒佢。人哋嘅家事对我嚟讲冇乜大心情起落，希望佢能够做得好好睇睇，令到阿梅在天上面都好过啲。”谈到昔日与梅艳芳的回忆，他说：“梅姐一得到奖𠮶晚，我好记得佢带埋成班人落嚟我唱歌嘅地方，我记得系彩云邨𠮶间lounge，成班人落咗嚟捧我场。好开心呀𠮶时，我就恭祝佢，大家倾吓偈，因为大家都系钟意唱歌嘅人，之后喺TVB好多时都有合作嘅情况，我好记得有次圣诞节，有一间lounge又系，我同佢一齐系当晚差不多主角咁滞，又系𠮶晚几高兴，圣诞节嚟，好耐噜，眨吓眼。”虽然之后二人未有再深交，但讲到梅姐的侠义、爱助人精神，基哥表示：“冇人当佢系女士，直程当佢一个大丈夫！”