阮嘉敏（Mandy）有份拍摄的节目《女神配对计划2》日前播出第二集，Mandy揾嚟邓伊婷做“闺蜜花生团”，虽然节目上未出手帮好姊妹求偶畀意见，不过阮嘉敏就对好友非常信任，任对方随时爆料：“我同伊婷完全冇夹过，佢系我入嚟公司第一个朋友，过去十年我哋互相扶持，咁多年以来佢成日都介绍啲男仔畀我识，可惜真系唔合眼缘，喺嚟紧未播出嘅节目度，佢会比我更加激动！”

提到日前节目中，有19岁参赛者发表“回春”言论时，Mandy表现激动：“始终佢出场只系20分钟左右，未必可以好完善咁沟通，佢呢个后生仔谂到咩就讲咩，我纯粹系当佢搞笑啰。咁佢本来叫所有女仔‘回春’，都唔系净系指我一个嘅，只系咁啱啲女神撩我互动，特登玩吓！我一向心境开朗系事实，绝对唔需要回春。（介意姊弟恋？）正常我钟意大过自己嘅男仔，因为我觉得会有安全感多啲！如果佢真系好细个，就睇佢系咪真系好有诚意，因为我觉得爱情唔应该系受住规限，应该要睇吓自己当时当刻嘅感受，我觉得咁先系爱情。（你哋咁多个当中边个需要‘回春’？）冇人需要回春！一个成功嘅女人系要令到自己生活得开心，保持心境年轻开朗，呢啲我绝对可以做到！”

节目中Mandy被问及参加者曾出轨时，首要担心“卫生”问题，被网民戏言“好包容”男友。Mandy表示每个人都有过去，重提旧事没意义，最紧要拍拖时“乖乖”就可以。