男团ZPOT出道至今各大半年，七位成员在音乐与舞台上不断尝试新可能性。最近团队迎来首次“小组企划”，由Bosco、Ian Hannz以及Marcus三人组成舞蹈组小组，推出全新单曲《Bang》。今次三人抛开全团时的喧闹气氛，以极致的跳舞力量与型格曲风震撼乐迷。早前三人接受《香港01》专访，大谈排舞过程的艰辛、小组成立的契机，以及入行至今的心态转变。Ian Hannz更首度正面回应与家人的比较及标签，展现出成熟而坚定的演艺态度。

日本排舞师Ako亲授极限舞步 三人磨合展现“和而不同”

提到新歌《Bang》，Ian Hannz形容这首歌就像是一曲“青春的敲击乐”：“我哋啱啱出嚟，我哋好多嘢都未尝试过，所以我哋会透过自己去开发一条路。去尽量尝试唔跟随人哋嘅步伐，而去自己Explore，跟住可能过程中会碰板，撞出嚟嘅𠮶个声，但系我哋就用呢首歌同大家讲，我哋唔怕碰板，而系我哋觉得咁样先系青春，咁样先撞得痛快学习。”

作为ZPOT首个以跳舞为核心的小组，今次《Bang》在舞蹈上难度极高。Bosco透露公司特意邀请了日本著名排舞师Ako远道而来香港，为他们进行为期三天的特训：“佢特登嚟香港同我哋一齐排咗三日舞，我哋都好Intense（紧密）咁样进行咗一个训练，就学我哋今次《Bang》嘅编舞。”学了初步的舞步后，他们还找到舞蹈师继续协助他们：“我哋都有揾阿耀老师帮我哋去执整下，继续可能令我哋齐啲。”

Marcus坦言今次的舞蹈难度绝对超越过往全团的作品，甚至一度令他脑袋空白：“我记得个日本排舞老师上咗一日之后，我系完全记唔到啲step嘅！𠮶啲step系喺我个脑飞嚟飞去，根本就拼唔返埋落个音乐度。同埋我觉得有一样嘢好劲嘅位，就系𠮶个日本排舞老师，佢听呢只歌唔系听佢表面𠮶个1234咁。佢哋听埋好底层好底层𠮶啲嘭嘭嘭𠮶啲音响，所以要需要少少时间先捉摸得到𠮶个感觉。”

谈到三人在跳舞上的强项，Bosco指三人风格各有千秋：“Ian Hannz偏向Underground同Breaking，Marcus亦有All Style同Freestyle，而我可能偏向K-pop少少。我哋三个其实第一次跳呢只舞嘅时候，都畀咗好多唔同嘅感觉出嚟。我哋就经过慢慢磨合，就磨合到一个大家比较中间位，大家比较一致或者一致得嚟，都会保留住大家嘅特色，所以有少少和而不同嘅感觉。”

七人喧闹变三人专注 化妆间安静如图书馆

过往ZPOT七人同行，化妆间总是吵吵闹闹，今次缩减至三人，Bosco笑言极唔习惯：“因为始终我哋平时七个会有种柴娃娃嘅感觉，而我觉得我哋今次三个本身都系比较认真嘅人，所以我哋喺做《Bang》嘅呢个小组歌嘅时候都系偏一个专注同埋认真，我哋都系好想所有嘢都做到好好嘅一个方向。少咗一啲平时会有啲气氛嘅，我觉得Alvin呢，就好识喺团队里面做啲气氛嘅担当。而我哋今次就少咗佢哋，就我哋三个都比较专注同埋安静去完成我哋嘅目标。”

拍MV获队友力撑

虽然今次只有三人出歌，但ZPOT其余四位队友（Gordon、Alvin、牛牛、Dave）却展现出满满的团队爱。Ian Hannz感性地分享拍摄MV当天的暖心细节：“我觉得佢哋好好！𠮶一日呢其实𠮶个地方都唔系咁方便，我哋喺葵涌嘅一个货柜场拍，但系佢哋都特登过嚟搭的士过嚟啦夜晚。跟住𠮶阵，Gordon仲要有买啲饮品畀我哋啦，然后佢哋又畀好多情绪价值啦。可能我哋喺火圈度跳段舞，可能𠮶一幕未必咁型嘅，但系佢畀我嘅情绪，系令到我觉得自己型，我哋三个就perform得更加有自信喺镜头面前。”

小组合作非“弹出”纯属轮流展强项 未来不限组合无限可能

对于首度以小组形式出道，会否担心被指是团队中的“幸运儿”或“优先弹出”？Ian Hannz非常清晰地否定：“我哋其实都系视今次为一个Project咁去做，所以我哋唔会话因为我哋头一队出嚟咁样而觉得自己stand up咗。因为我觉得我哋只不过分紧唔同风格去出，咁一定有个出先出后㗎啦，唔同两首一齐出咩。即系都要分先后，所以就纯粹系大家轮流去show自己嘅强项。”

谈到今次做跳舞小组，之后会否有不同的组合时，Ian Hannz表示“我哋三个一齐大家会联想到跳舞”，但不排除之后会有更多不同的组合出现。例如Bosco同牛牛及Gorden可以组成“Cute爆校园风”，而Ian Hannz同Alvin则可以推出Rock & Roll的“爆喊歌曲”，Marcus同Dave就可以推出Urban R&B的组合，总之就有无限的可能：“我哋之前都有特登问我哋Fans，我哋都有民意调查想我哋有咩组合，而我哋都会听佢哋嘅意见。”

Marcus揾到型格定位 Bosco满足但不安逸 Ian Hannz如蛹化蝶

入行至今大半年，三位成员在个人成长及心理素质上均有显著改变。Marcus逐渐清晰自我定位：“我个感觉系我开始揾到自己嘅定位，应该慢慢清楚自己应该行啲咩嘅路，咩嘅路系啱我自己多啲，咁因为一开头我自己系比较迷茫啲。我自己唔知道应该系行可爱、应该系笑多啲、应该系Nice啲、定系型啲？而家开始慢慢捉到个风格套路，咁我就想喺呢个方面，show得更加多嘅呢方面比观众睇。”

Bosco满足现状但不忘突破： “我自己经历咗而家短短七个月，其实调返转头睇，其实我自己系好感恩，其实呢七个月我哋都做咗好多唔同嘅风格，或者做咗好多唔同嘅事情。例如拍团综，同埋我哋都攞咗新人奖，而呢啲每一个回忆都系我哋Zpot成长路上好重要嘅。而我自己都满足得嚟，我哋都唔想安逸，都好期待我哋之后可以发生啲咩事。因为我觉得我哋《Bang》呢个就系一个好好嘅证明或者一个Experience。”

Ian Hannz如蚕蛹吸收营养等待破茧：“其实我入行𠮶阵时我畀自己嘅一个时间系大概一年，去畀自己去慢慢裔变。所以我觉得我依家仲系处于一个好似蝴蝶喺个蚕里面𠮶个状态，即系吸收紧唔同嘅营养，但系未形成一个完全体。呢八个月对我嚟讲，就系我唔会话好Lock死咗就系边啲体验系我想多啲或者唔想多啲，当然你都会有啲嘢你知道你自己钟意嘅，但系我会将所有经验都攞佢嘅营养、佢嘅精华出嚟多啲。”

Ian Hannz“明星弟弟”标签 苹果同橙比唔到 标签系自己畀自己

身为圈中人的亲属，Ian Hannz由参加《造星》至今，难免经常被外界拿来与哥哥比较，甚至被贴上“某某弟弟”的标签。面对会否感到压力或想急于甩掉标签，Ian Hannz展现出超越年龄的成熟与豁达：“呢种压力喺《造星》最初期会有，啱啱啲人未去睇到太多我嘅表演，但系其实当我表演多啲，我自己感觉上又唔觉得，我觉得话个Industry好多比较，因为真系比唔到嘅好多嘢。”无论在电影风格、音乐风格还是个人特质方面，Ian Hannz与哥哥都很不同：“攞唔到个苹果同个橙比。”

至于会否介意标签，Ian Hannz直言：“我觉得呢个Label，我唔畀自己就冇人可以畀我。”他亦很清晰地表示：“如果佢觉得你系咁样，咁佢就会可能用一个唔适合对待你嘅方式去对待你。”但当他感受到这种能量时，自己可以选择这个人是否继续存在自己的世界里面：“我冇选择到Keep任何呢啲人喺我世界里面。”他展现出专注个人音乐路向，不被外界噪音影响的强大气场。

Credit:

Make up:
Jenny Kaho @powderclub_hk

Hair:
Him Ng
Veron Chan

Styling:
Lok Fong
Carmen Yeung

Wardrobe:
Barbour Hong Kong, D-Mop, Deopuz, Missing Pieces, 90Ninety's, Both Paris

场地：@partyroom_lazyhouse @partyroom_cozy