歌手许廷铿（Alfred）刚推出新歌《自尊歌》，由自己曲词包办，并邀请合作无间的黄兆铭及陈考威为新歌编曲及监制。相隔一年才推出全新作品，Alfred坦然遇上了音乐事业的迷茫期：“我觉得自己算系勤力嘅人，自组公司四年几，其实都出过两张大碟，开过两个个人演唱会，一直亦都有出新歌，呢4年其实都做咗超过二十首全新作品，当然亦都继续兼顾牙医事业。但就系有时好矛盾，返到诊所，有人会问‘你几时出新歌啊？’然后出席活动又有人会问：‘你无做牙医喇？’其实两样都有做，仲要都几勤力㖭。或者大家好似成日都关心啲同音乐无关嘅事情，例如‘你瘦咗啲’‘你肥咗啲’，所以上年开始真系有点迷茫，感觉系进退两难。”

经历事业迷茫期，Alfred决定放慢脚步沉淀寻找一些新的养分，甚至接触一些自己完全没有想过会接触的事物：“年头嘅时候去咗跟KB滑雪，以前我系无可能会俾自己滑雪，因为觉得自己又系歌手又系牙齿，绝对唔可以整伤。但有一刻突然觉得，其实whynot?结果因为KB嘅教导下，我先知道自己之前太多误解，其实滑雪系可以好安全。我甚至同KB、MikeOrange成为咗生死之交，因为我地一齐晌山上遇到暴风雪，亦因为KB嘅专业，令到我安全落山亦都入咗滑雪呢个坑。”

遇上暴风雪安全回港，却不幸遇上意外跌落楼梯需要做手术，手术前更要参与一个慈善演唱会演出，是次演出反而令Alfred对自己的使命开始有新的转向：“我真系要多谢呢个慈善演唱会𠮶一晚嘅观众，我记得当晚有几位歌手一齐演出，然后晌我表演𠮶part，几位歌手嘅乐迷都同时俾咗好多好真心嘅掌声我，然后我晌台上得到好大嘅力量，𠮶一刻令到我明白咗，只要我用心去表演，大家系真系会感受到，好感动！”

落台后感觉仍然涌动，然后灵感终于出现，令Alfred相隔十年多再次决定自己尝试为新歌包办作曲填词：“《自尊歌》想表达系，唔系净系我，系我地，我地可能都太习惯想尽量迎合最多嘅人，成为别人眼中最好嘅自己，结果自己就burnout，但系我呢一年学到嘅系，以上嘅谂法，都系我地自己谂出嚟，自己俾自己嘅压力嚟。所以我想借呢首歌话俾大家知，其实自我认同系可以无条件㗎，只要你做一个你自己都钟意嘅自己就可以。”

沉淀一年，终于不再迷茫，重新出发，新歌MV选择潜入大海，首次以“湿身性感”造型示人，Alfred表示自己都系第一次潜水：“潜水都系我人生其中一样觉得绝对唔会做嘅事情，但就系呢一年嘅经历话俾我知，其实我俾得太多规矩自己，有时真系会限制咗想像，所以今次好快就决定MV要做啲未做过嘅嘢。”结果潜入深海，因为没有其他杂音去探索另一个世界，令Alfred灵感再次浮现，出新歌前夕已经开始进行下一首歌的录音！