小仪今日（17日）为吕爵安（Edan）、许轶（Day）及黄梓侨（Elvin）做嘉宾的活动担任司仪，自爆为Edan以“抵得谂价”接job。受访时她讲到森美早前自爆当年曾对容祖儿心动，问小仪：“呢个女仔得㖞！如果追佢，你估我得唔得吖喇？”小仪回忆起当时情景，直言睇死森美唔够胆：“我咪敷衍佢话‘系啰，去追啰。’因为我知佢永远唔够胆。我话‘去追啰’，佢永远得个讲字，好渣㗎佢，佢永远都唔会做。”小仪又大爆森美好“大贪”，以前有本画簿贴满不同女明星的靓相，指森美最爱曾华倩、钟楚红：“𠮶本簿仲有好多女artist，唔知佢仲有冇keep，因为可能老婆要佢抌咗，你知佢几惊老婆！”此外，小仪确认将参与由刘德华投资、改编自《关于那只龟回魂的故事》的2027贺岁片，更再次表示希望召唤到张栢芝出山！

小仪“抵得谂价”接Edan Job　心痛对方瘦晒

讲到再次因偶像Edan带挈而有Job，小仪公开呼吁：“有佢有我、有我有佢！都唔系个个job，佢前排有个job都冇揾我，但系唔关佢事嘅。而家做吓宣传先，各大品牌，当然Edan好抢手大家都知，有佢帮手嘅工作，不妨可以谂吓阮小仪我嘅！因为我都好抵得谂㗎！我好爱Edan，我好抵得谂，你揾我就明白‘抵得谂价’是什么。”活动上她影相时，Edan从后搭住她膊头，之后小仪揽揽对方，心表痛谓：“你瘦晒呀而家！”她于访问中解释：“心痛呀，佢一拍剧同拍电影就瘦晒，佢话肥咗，但系我觉得系瘦咗嘅，睇佢都系，成个人瘦咗啲，但系都好吖，即系佢落力工作，每一个男人落力工作就系最吸引最迷人。”她更笑言相信现在自己可以抱得起对方。

分享婚后幸福人妻下厨生活　老公最爱豉椒蒸排骨

小仪去年宣布婚讯后，至今享受住幸福人妻的生活，她因为工作忙未必晚晚煮饭，但幸好自己与老公都偏好食得清淡，所以在家煮饭都是吃烚菜、蒸肉饼、蒸水蛋居多，而且两人都爱饮汤，小仪指自己有很多汤水食谱未及放上网跟大家分享，问到老公最爱她煮的哪一道菜，小仪说：“呢句说话好深㖞！佢……如果我有听过佢讲，佢钟意我整豉椒蒸排骨，蒜蓉蒸排骨𠮶啲佢都钟意，但系煲汤佢就普遍都喜欢，佢同我都咁啱都钟意饮章鱼汤，譬如节瓜煲章鱼，真系好好饮！香到癫！呢个零技巧，只要只章鱼处理得到，你烘一烘佢，跟住再摆落个煲度，煲汤点都好味，我讲嘅，点都好味！”被问有冇其他男人饮过她煲的汤，小仪说就连Edan和森美都冇饮过：“我做咩要俾森美饮？佢有姐姐煲俾佢饮，老婆都唔会煲㗎，佢姐姐煲㗎咋，佢冇咁幸福，姐姐煲。”

森美自爆曾想追祖儿　小仪取笑：佢永远得个讲字

讲起森美，早前他在电台开咪时，自爆多年前看祖儿第一次做Live show时已被深深吸引：“第一次见你做live show，第一次见到个咁嘅女仔喺台上面表演。我睇完，‘哗’，好正㖞！好靓！𠮶时我同小仪一齐做司仪，我话，呢个女仔得㖞！如果追佢，你估我得唔得吖喇？”小仪事后都记起有关画面，她在访问中取笑森美根本冇胆追、得把口：“系嘅，佢有讲过，佢净系话‘呢个女仔得㖞！我觉得佢Charm得嚟又可爱。’因为容祖儿𠮶时真系几可爱，而家都可爱啦当然，但系我哋认识嘅祖儿系喺后台嘅时候佢好得意，所以森美𠮶时，我印象记得佢未结婚㗎，所以咪讲呢一句，但系佢自己又唔敢同容祖儿讲，同我讲有鬼用？（记者：你当时点答佢？）我咪敷衍佢话‘系啰，去追啰。’因为我知佢永远唔够胆。我话‘去追啰’，佢永远得个讲字，好渣㗎佢，我话‘去追啰’，佢永远都唔会做。”之后她更扮森美平时“𥄫”女的模样，大爆有时甚至入神到要小仪叫“喂！我哋喺呢边呀！”

爆森美珍藏“女神簿”　曾华倩钟楚红都上榜

问到除了祖儿外，森美曾否透露自己对哪位女明星心动过，小仪直言有很多，更大爆：“佢细个有储一啲明星嘅相，佢觉得靓嘅，就会有一本Sketchbook贴住𠮶个artist，佢真系好大贪！好多经典靓女佢都有贴到，曾华倩系其中一个，佢有同曾华倩讲嘅，佢真系同曾华倩讲，我哋一做亲嘢佢就话‘你知唔知我好钟意你㗎？’钟楚红𠮶啲佢更加喜欢，因为我记得𠮶时钟楚红有一个牛仔裤广告，佢话佢有剪到呢一个广告出嚟贴咗喺本簿，𠮶本簿仲有好多女artist，唔知佢仲有冇keep，因为可能老婆要佢抌咗，你知佢几惊老婆！佢真系好冇用！越老越惊老婆，我戥阿嫂开心呀真系。”小仪笑指可能怕老婆会发达，所以森美越来越发，一脸福相，至于老公怕不怕自己、有冇发达，小仪思索几秒后笑说：“唔知！我哋财政独立，所以我唔知。”

阿正升呢“太子道西女人”　小仪爆对方劲多名牌袋

近日接班人阿正（黄正宜）被爆进驻加多利山，成为新一代富婆，更自封“太子道西女人”，小仪听到记者说阿正承接自己后，即谦称：“真系唔敢当！佢比我更劲，真心佢比我更劲，你见佢‘哗！几多广告，𠮶时我哋好难得先会得到红隧广告，佢红隧广告咁多次㖞！’大厦Building𠮶啲大广告，虽然而家我同森美都劲、都多，但系阿正密，我哋追唔切，俾啲位我哋摄吓啦唔该！”问到从何时开始发现阿正荣升富婆，小仪更爆料：“由佢不停换名牌手袋开始！佢系咪瘾我唔知，我哋以前认识嘅阿正，佢𠮶时做我哋节目PA嘅时候，森美仲成日笑佢件衫，着件枣红色衫，成个教书老师咁，仲要成日都着𠮶件，唔系𠮶件就牛仔褛，一件浅色加大码嘅牛仔褛，𠮶时明明唔兴咁大件，但系唔知点解佢着咁大件，可能觉得着多几年都襟？佢以前系悭妹，真心，而家有钱，我见佢呢一次又呢个手袋，𠮶一次又𠮶个手袋，仲要𠮶啲手袋系讲紧𠮶个型号唔容易买嘅！当然佢唔系阔太𠮶只，系young嘅，而家年青一代大家会喜欢𠮶啲款嚟嘅，咁我就话‘哗！劲呀！”

至于知唔知阿正的手袋是否要六位数一个，小仪说自己冇研究名牌袋，所以不清楚，但款式确实多，不同衫、不同场合又会衬不同手袋：“佢系连casual嘅时候都有一个名牌袋喺侧跟！同埋顶帽呀！𠮶只鸭嘴帽，唔平㗎！我𠮶啲百几二百蚊㗎咋，佢𠮶啲系讲紧唔系千几蚊，系几千蚊，富婆呀！”不过小仪称暂时仍未去过对方的新屋，虽然阿正有邀请，但二人总是夹不到时间，但她就不时去帮衬阿正的咖啡店支持。

刘德华投资舞台剧改编贺岁片　小仪感激“牙齿当金使”

最后，小仪有份主演的舞台剧《关于那只龟回魂的故事》自月前公演后口碑载道，最近更吸引到天王刘德华投资开拍电影版，于明年贺岁片档期上映。小仪对此非常开心，因为以前拍贺岁片都是客串或插科打诨性质，但今次舞台剧每个角色都有很好发挥，令她非常期待。她感谢刘德华垂青：“佢好钟意剧本，睇完嘅时候，𠮶晚已经捉住我哋讲话好钟意好钟意个剧本，睇吓有冇啲咩合作，佢果然真系牙齿当金使！佢真系谂到个合作，就系佢投资拍呢个贺岁片，真系多谢华仔，我哋台前幕后每一个人知道呢件事嘅时候，都非常之开心。”

电影版未开镜　再“集气”召唤张栢芝出山

小仪透露目前仍在夹排摄日子，因为演员们各有工作，暂未开始拍摄，谈到原版舞台剧以张栢芝歌曲《任何天气》贯穿，演出时小仪更公开邀请栢芝入场：“大家可能估唔到，原来张柏芝有首歌对我哋套戏非常重要。所以想借大家力量帮我哋集气，希望可以邀请到张栢芝入场睇戏！希望可以呼唤到佢！”问到今次拍电影，会否希望华仔能成功召唤栢芝出山？小仪再三表示好期待：“嗱！呢一个呢，我好期待！真系圆咗我哋喺舞台剧嘅梦，我哋每一日都话希望张柏芝可以嚟睇，希望张柏芝可以嚟睇，如果今次有份演埋嘅话，甚至可能去到最后真系有个surprise俾我哋嘅话，我相信我哋台前幕后甚至Melody阮韵珊，因为剧本佢写嘅，佢有个原因摆张柏芝只歌落去，所以我谂佢更加更加开心！”