王氏港建太子爷王贤志（Vinci）破产后与另一半Kevin避走加拿大，遭胞妹指遗下巨债烂摊子连累留港家人，早前更被萧定一大爆“豪赌成瘾”。面对全网闹爆，Vinci日前开Live反击，指自己近20年没有入赌场，原来他私底下亦有向萧定一求助！萧定一昨日（25日）再度开Live，大爆Vinci主动发语音讯息要求代为澄清，更直斥对方大玩“语言伪术”避重就轻，将个波交由大众判断！

语音短讯客气求救　最介意另一半被拖落水

萧定一在直播中透露，大爆Vinci烂赌的节目出街当晚，Vinci已主动发语音讯息联络他，态度非常客气，更拜托他协助澄清两大重点。萧定一引述Vinci的说法：“第一点就系佢自己喺直播都有讲：‘我已经十几、二十年冇踏足过赌场，所以我嘅负债同赌钱系完全无关嘅。’”

除了极力撇清自己，Vinci更紧张另一半的声誉。萧定一续指：“第二点佢特别要求我一定要帮佢澄清，就系肯定佢嘅另一半无去赌场。呢件事系佢最介意嘅，可能佢嘅另一半诈型，佢强调佢另一半系一个唔赌钱嘅人。”

婉拒Call in对质　萧定一质疑大玩“语言艺术”

面对Vinci的私下请求，萧定一大方表示可以帮忙，更建议：“Vinci，我觉得最妥当嘅方法，就系你亲自打电话（call in）入嚟澄清。”结果Vinci考虑一晚后婉拒，只希望萧定一代为说明。此举令萧定一对其解释提出严重质疑，直指他在玩文字游戏：“我觉得喺佢嘅讲法入面，有少少文字同语言艺术。可能你真系十几年冇入过赌场，但系唔入赌场，并不代表完全冇赌钱。而家最大额嘅赌注，好多时系私底下嘅局，唔入赌场系咪等如完全冇赌钱呢？”

力撑爆料老友　点出最大盲点：阿妹生安白造？

对于消息来源，萧定一企硬力撑自己的好友绝对没有说谎：“我嘅立场系，呢个消息系源于我一个极之好朋友同我讲嘅。呢个朋友，我同佢确实非常之熟。呢个朋友亦都系一个非常之老实嘅人，我绝对唔相信佢会对我讲大话。”他透露，Vinci声称自己欠债数目不大，但老友最愤怒的是Vinci完全无交代就远走高飞。

萧定一更指出整件事的最大破绽，直指若Vinci真的清白，为何会被亲生妹妹王贤德大义灭亲公开炮轰：“如果你话根本冇呢件事，咁点解你妹妹会噉样指控你呢？你妹妹系咪生安白造，嫁祸畀你呢？呢个系最大嘅症结矛盾。”

他强调两人私下完全没有“吵大镬”，自己只是如实转达朋友的说话，并偏向信任相熟的好友。而萧定一解释自己身为破产人士，亦选择谈论王贤志欠债，他解释：“咁我讲晒所有娱乐新闻嘛。”他最后向网民大派花生：“大家系成年人，我相信我哋嘅听众同观众都非常有质素。成件事嘅来龙去脉就系咁，大众自己会有个判断：到底你欠下嘅债系咪赌债？入面系咪包含部分赌债？哪怕唔系全部。”