孙慧雪今日（29/9）以“童心大使”身份现身九龙湾出席《“童”你每一刻》分享会。宣传关注儿童精神健康，并呼吁家长多聆听子女需求。

母子首度合唱拍MV无偿演出　孙慧雪以身作则教导“施比受更有福”

孙慧雪接受《香港01》访问时透露，早前与大仔一同拍摄MV兼合唱，大赞仔仔表现配合。被问到仔仔有否要求“收工酬劳”，阿雪笑言仔仔是无偿参与，自己平时亦有借机进行亲子教育：“佢梗系冇啦！因为我都同佢讲，其实呢个系一个善事嚟嘅，我常常都同佢讲：‘你知唔知你自己好幸福呀？’但你幸福嘅时候，你都要将呢样嘢传播出去，‘施比受更有福’，你有能力帮人嘅时候，要多啲帮人。”

7岁大仔懂事心声藏满满洋葱　坦言“怕阻妈咪做嘢”求每日倾偈1小时

提及亲子关系，阿雪分享了一段温馨又感人的小插曲。她透露早前拍摄访问影片时问及仔仔的心声，才惊觉仔仔非常体贴：“估唔到佢同我讲，佢原来成日都觉得我做嘢好忙，佢就话‘有啲怕自己阻住我’，我估唔到佢听得到呢啲心声！原来佢有呢个想法，然后佢就话如果可以，想我每日都可以同佢倾，可能一个钟都得。我听到个心好唔舒服，觉得自己做得唔系咁好。我开头仲谂我会唔会好烦佢呢？因为有时啲父母放学‘你今日点呀？做咗啲咩？’但原来佢话系想我同佢倾偈，了解我多啲嘢。”

至于仔仔是否知道妈妈是艺人，阿雪透露当初竟是由同学仔告知：“其实我都唔知点同佢解释，佢第一次返嚟问我嘅时候，系佢啲同学仔话畀佢听‘你妈妈系咪喺电视拍戏㗎？’佢返嚟问我：‘点解佢哋会知嘅？’原来系同学仔讲嘅。”

性感写真大方摆客厅不刻意隐瞒 孙慧雪笑对发福：等佢知生佢前阿妈好Fit

谈到昔日推出的性感写真集，若将来仔仔长大后发现或被同学提及会如何应对？阿雪大方表示早已做好心理准备，家中的写真集亦没有刻意收起：“我摆喺屋企㗎，但佢又冇兴趣攞嚟睇，佢仲细，未睇，我都喺度谂紧点样同佢讲呢个美感嘅嘢。其实我都预咗㗎啦，因为佢而家成日话妈妈系‘熊宝宝’、大肚腩好多肉，我就想同佢讲：‘其实妈妈未生你之前好Fit㗎！’到时俾返佢睇，其实你妈妈未生你之前系靓女嚟㗎！”