游学修今日（29日）晚上，以发行代表身份出席电影《怎么可能我家的祖先是你家的鬼》首映，今次是他首次担任电影发行，透露主要跟前辈学习，所以压力不大。讲到近日转职车手，他分享与参与《Max vs 100》赛事，与四届一级方程式（F1）世界冠军韦斯塔本（Max Verstappen）较量的心情，又形容之后化身“游学Max”跟16位圈中人对战，要超越他们，感觉“胜之不武”，瞬间体会到Max赢过100个人其实都是同样心情。最后，他亦有回应昨日JFFT工作室大火后，将“特级咒物”试当真牌匾移送至小薯茄，惊讶为何高Ling先生会愿意接收，又相信牌匾其实是吉祥物，所以每次火灾都可以大步槛过。最后，他指火灾后，咒物同款碰石贴需求急增，“我到时JFFT年宵摆一个试当真遗物区，将我剩低嘅货尾清埋佢。”

首次做发行抱学习心态　钟情恐怖喜剧

游学修介绍《怎么可能我家的祖先是你家的鬼》，指因为是恐怖喜剧，而且虽然是日本片，但又有日本演员渡边直美参演，透露自己当年的毕业作品都是恐怖喜剧，对同类题材情有独钟：“我觉得呢种题材系比较新颖，尤其是如果香港而家你仲要喺影视上有啲创作或者发挥，都要寻求一啲新嘅题材、做法，呢样嘢都好紧要。”首次担任发行工作的他，形容自己只是挂名，抱住学习心态去了解行业运作，亦感激有前辈们带领住。讲到做演员及发行商所面对的压力会否不同，游学修说：“冇乜压力，都系靠班前辈带住我去学吓嘢先，前年《公开试当真》𠮶阵有试过接触过，原来一部戏嘅诞生、见街系咁样嘅事，但系𠮶阵时有Golden Scene帮手，今次叫做喺另一个岗位去学习吓。”

以试当真公司名发行　直认挂住演员工作：等咋嘛

海报上所写的发行商是“试当真”而非游学修，他解释因为自己冇公司，而今次亦有先问准许贤、苏豪：“法律上间公司仲喺度，佢哋话发行要有公司名，我话我冇㖞，咁咪试当真啰，都好嘅，大家耳熟能详，知道，又同影视相关。”至于之后会否参与更多制作或项目，他认为要一步一步，不能心急，“唔好话一嚟有雄心壮志，细个试过，有啲嘢太雄心壮志未必系好事，唔好咁心急。”今次担任幕后，问到何时重返演员岗位，游学修说：“我而家转咗职，我而家系一个车手，暂时。我都唔知点解变咗个车手，又好幸运地参与咗一个咁高曝光嘅赛事，我见到好多观众都喺个网上去cap我𠮶啲图，我觉得佢哋睇得咁开心，我都好开心。”他不讳言欢迎任何演出机会，又说：“等咋嘛。”早前他参与Elka郑芷淇《洗脑歌》MV，不少网民留言指挂住做演员的游学修，他说：“我都好挂住，哈哈哈哈哈！冇办法，等吓啦。”

入坑卡丁车　自觉与郭富城吴彦祖级数差太远

早前游学修去英国SilverStone赛道参与《Max vs 100》赛事，跟其余99位来自世界各地的参加者，与四届一级方程式（F1）世界冠军韦斯塔本（Max Verstappen）较量！最终游学修奋战至第7圈，总成绩得第十，以接触小型赛车仅数个月而言绝对是超额完成，他透露自己并不是为了比赛才开始练车，主要是认识了YouTuber L佬，跟对方去深圳玩卡丁车，“因为香港冇得玩，就算我对赛车有兴趣都冇机会接触，卡丁车系叫做最平民化，可以接触到嘅赛车嘢，我未去到郭富城、吴彦祖𠮶啲级数，𠮶啲上上落落𠮶啲数字，佢条呔可能已经系我玩成个月嘅钱，我玩唔到，所以卡丁车就啱我玩。”被问会否“升呢”希望有日跟他们睇齐，他笑说：“首先我要喺外表上同身家上要升呢先至可以玩𠮶啲，你见到佢哋全部都好靓仔好有钱，我暂时未有依个能力去玩𠮶啲，但系卡丁车我都好钟意，因为佢系……譬如你房车唔会咁运动，当然都有好多要求，但系真系话成身汗、喘晒气𠮶种感觉，卡丁车我觉得系好enjoy呢个感觉。”

《Max vs 100》总成绩第十冇失望　自爆向Max大叫I love you

对于得第十，他未有失望，因为前一日冲刺赛已攞过第二，亦有小组第一，并谓：“喺100个人入面跑第十，我觉得已经系一个黐咗线嘅成绩。我有同阿Max挥手，然后睇唔到，但系我有同佢挥手，我架车第三起步，佢喺前面做访问，好近，我哋有同佢挥手，佢又同返我挥手，好似迷妹！（记者：有冇喺个咪度同佢讲嘢？）有呀！我喺度大嗌‘I love you Max’，但系我怀疑佢系听唔到，冇回应。”除《Max vs 100》外，游学修又跟16位艺人组成卡丁车明星赛，他化身“游学Max”要超前众人，最终顺利夺冠，他笑言：“我终于明个感受， 主办单位真系好好，佢先俾我感受完同世界冠军赛车，再俾我感受返喺后面过人嘅感觉，原来个感觉系……有啲心虚。因为佢哋冇玩开，就算过咗佢哋，你会有种胜之不武嘅感觉，我而家就明咗阿Max嘅感受，佢过100个人，其实佢一定系胜之不武，我只能够讲我体验到原来胜之不武系咁样嘅感觉，过咗16位朋友。”

目标挑战FIA认可赛事　坦言赛车烧钱多于揾钱

游学修透露接下来将参加FIA（国际汽车联盟）认可的国际赛事，与L佬视之为目标，所以都要多花时间练习，但毕竟只有国内能练车，所以间中都会回去两日一夜操车。被问赛车是否其未来发展主线，他苦笑说：“冇得拣，我只能够系赛车㗎咋，我而家。”他以赛车和跑步双线发展，预告周日与JFFT去札幌跑半马，讲到赛车能否揾钱，他表示：“梗系揾唔到啦！烧钱都烧死你，我都系靠黐住JFFT揾钱咋嘛而家。”而谈到会否邀请老板古天乐一齐赛车，他指有听过对方以前揸F3还是F4的经历，并直言好难，所以古生都有赞赏他赛车的表现。至于会否叫古生赞助自己，他说：“直接赞助我买车！（几钱？）我鬼知咩！可能买啲卡丁车玩住先，𠮶啲买得起嘅，大车买唔起。（卡丁车几钱？）二手好似几万蚊都有，应该都畀得起，食少几个麦当劳⋯”

试当真牌匾变特级咒物　游学修：JFFT真系好差！

最后，讲到JFFT工作室昨日失火，两度经历火灾的“试当真”牌匾被指是“特级咒物”，因而遭JFFT转送至小薯茄，游学修扮嬲说：“我觉得呢班人真系好差！我一定要公开批评佢哋，第一件事，佢屈个牌，第二件事，明明当初系佢哋要求摆个牌喺studio，而家佢又将我个牌送走咗俾小薯茄，即系当我个招牌系咩呢？你对唔对得住啲fans？我觉得好差啊呢班人！”他更说JFFT很“无赖”，对于他授权JFFT“传圣火”，游学修表示：“佢话俾小薯茄，我就觉得，人哋做乜会想要呢？你俾人做乜鬼呢？但系高Ling唔知点解肯上去攞，因为佢哋好近㗎嘛好似，佢哋钟意啦，如果有一日有需要咪问佢哋攞。”问到会否担心累小薯茄变“烧薯茄”，他笑言：“呢个我唔惊，呢个系佢哋惊，呢个系佢哋要担心，唔关我事。但系我怀疑其实我个招牌系一个吉祥物嚟，因为意外全部可以大步槛过，同埋我谂住借呢个机会去卖埋我剩返𠮶啲。”

磁石贴货尾需求急增　预告JFFT年宵设试当真遗物区

JFFT事故后，游学修火速在Story宣布“特级咒物”同款磁石贴尚余50多个货尾，问到现时是否成功促销，他说不停被炸IG问几时开卖，因此他宣布：“而家JFFT旺，咁我谂住佢哋摆年宵嘅时候，我将我啲货未拎晒去𠮶度寄卖，咁就清埋佢！（记者：得返50几只唔够卖。）但系我唔会加！（记者：咁你不如拍卖？）我应该卖$1000一个，咁就可以揾到钱。我到时年宵摆一个试当真遗物区，将我剩低嘅货尾清埋佢。我哋连墓碑都出过，我哋百无禁忌！”

被问与Jessica关系　称赛车活动已是最好生日礼物

最后，早前有网民留意到游学修与女友陈苡臻（Jessica）甚少互动，怀疑二人情变，不过Jessica都有去英国睇游学修赛车，故此能辟谣。他认为大家就算乱谂都没关系，而至于Jessica送了什么生日礼物给他，游学修说：“我都会同身边嘅人食饭，简简单单就OK，今年有一个意外嘅一个曝光，呢一个赛车活动，我觉得已经系我最好嘅生日礼物！”