林宝玉早前带姚正菁到米兰时装周睇骚，日前菁菁网上贴图爆出踏上当地天桥做Model，呢次复出第一击认真威水！姚正菁为泰国品牌在米兰时装周做Model，为今次表演刻意减磅，用最佳状态出场，呢日佢身穿紫色泰国民族服亮相，不少观众以为她是泰国华侨，为服装增添色彩：“ 真系发梦都冇谂过会做模特儿，仲要走上国际时装周嘅天桥， 绝对系最难忘嘅经验之一。”

姚正菁作为“模特儿”界新人，她笑称拉高全骚“平均年龄”：“我要多谢经理人林宝玉同埋主办方肯畀个机会我尝试，我见到身边好多模特儿都系年轻嘅小妹妹，得我一个系呢个年纪嘅新人，难免都会有啲紧张，后来主办方同我讲，我散发嘅女人味系后生Model揾唔到嘅，所以证明‘发梦’同年纪无关，最紧要把握每一次机会。”

经过今次“做Model”后，姚正菁萌生进军时装界的念头：“我今次真系好兴奋，想喺时装界继续发展，因为我觉得冇嘢系冇可能。今次行show我都摆咗个大乌龙，因为彩排嘅场地比会场细，我一路挂住‘表情管理’冇细心听书，原来会场嘅Runway有成150米长，我行咗一半就已经掉头走，真系超级尴尬！呢次算系我一个小遗憾，希望未来有其他机会可以再行show，完完整整咁样行晒成个天桥！”