娱乐圈中周永恒、张致恒、梅启明、李泳汉原本并列“四大废男”，前三位近日更在网上平台同框，做直播任闹，不过后来因为王贤志被胞妹大爆破产后拍拍箩柚远走高飞、留低“天文数字”烂账要家人“执手尾”，因而跻身“废男”之列，成为全城热话。日前，梁思浩与邓兆尊在网台节目《娱乐好好玩》中，就评论“四大废男”，指他们共通点为“从来唔觉得自己错”，之后思浩爆周永恒镜头后的轶事，指他其实疼锡女儿，只是经常“用下体谂嘢”，认为他与张致恒也品性不坏。而讲到王贤志时，梁思浩就引述“灿神”廖伟雄从顶流到破产，再一步步谷底反弹的励志经历，直言他能翻身正因为肯认输、有担当，劝王贤志：“输咗就要认，唔好再死撑！”他更大爆当年曾志伟拉大队去撑灿神，一句话令对方泪流满面的秘辛。

邓兆尊指“废男”共通点是无承担　张致恒相对较愿意面对

邓兆尊说：“我觉得呢四个人入面有个共通点，就系佢哋性格上系从来唔觉得自己系错！永远都系觉得人哋令到佢咁样，唔关自己事，系人哋令到佢咁样、咩都系人哋错，佢自己冇错，佢会话自己被迫，点解自己做嘅都唔愿意承担错误呢？”而梁思浩就说，大部份能从逆境扭转的艺人，都是因为有承担：“呢四个人好得意，头先你讲得啱，永远都系人哋错，第二样嘢就系冇承担。”节目工作人员就说，张致恒（Steven）应该不算，兆尊亦同意：“起码佢知道自己要维持屋企，佢出嚟挨，放低身段，已经系一个好嘅转变。”而思浩都认为他算是四位之中较愿意面对。

梁思浩爆周永恒为女儿落泪　称本性不坏但常用下体谂嘢

此外，梁思浩指当年拍《娱乐审死官》曾与周永恒近距离接触过，觉得他本性不坏：“当初佢发生咗一件好大件嘅事，但系我点解觉得佢唔系太差，我记得喺后台，我话你而家咁样搞到个家散晒，有冇谂过两个仔女？佢就即刻喊，佢未必对老婆好好，但系佢对两个女好好。（邓兆尊：即系仲有少少人性？）有㗎，佢有㗎！不过我都照喺节目闹佢，可唔可以唔好用下面谂嘢！佢次次衰就系用下面谂嘢，你个细佬……你系大佬嚟㗎嘛，你有咩理由听细佬话㗎 ？佢细佬可以控制佢成个人。（邓兆尊：细佬好恶，细佬好易起火，你揿唔住。）我话你将来都要面对自己两个女，你写封信俾两个女啦，其实喺后台，封信系我、佢同另一个幕后口述帮佢写点样同自己个女道歉，当时嘅佢，我成日都话佢一样嘢，佢本身唔系一个坏人，每次衰就系用下面谂嘢。（邓兆尊：过几年应该唔得㗎喇！）”

李泳汉被指童年演奸角影响性格　梁思浩吁向李家鼎道歉

讲到李泳汉，他认为其人格也跟童年有关，但希望修佛后能有所改变，又鼓励他跟父亲李家鼎道歉：“佢妈妈坦白讲，人可能系咁，特别似自己个样𠮶个呢，系特别锡啲嘅，因为阿哥就几似阿妈个样。由细到大，导演都真系几唔公平嘅对佢两个细路仔，永远弟弟做好人角色、哥哥永远都做衰人角色，其实对细路仔阴影好大。冯宝宝最近有个访问，话细路仔太细个，佢哋要返学，童年嘅人你做坏人，佢哋反而笑你，我唔多唔少觉得李泳汉有啲自卑，本身有啲自卑，越自卑嘅人就会越自大，佢细个开始不停做坏人，变咗佢阿妈特别锡佢，形成咗。不过佢而家开始睇经，要领悟啰！冇啦，妈妈走咗，我𠮶日听到鼎爷一句说话，我相信李家鼎，只要李泳汉肯打个电话同阿爸讲声对唔住，李家鼎当乜事都冇发生过，佢细佬就未必……但系起码你都应该同你阿爸讲声对唔住。”

忆与王贤志同台食饭　梁思浩称感觉对方以为他黐金糠

最后，谈到王贤志，梁思浩指与对方不熟，只同台过一次，当时他与江美仪食饭，偶遇王贤志与韩君婷，于是一齐坐，但他就分享自己的观察，指王贤志好像以为自己想黐金糠、等王贤志埋单：“我真系觉得佢有呢个感觉，佢唔知呢间餐厅系我长期帮衬，我见到佢面口麻麻哋，觉得我好似嚟黐金糠，可能佢身边好多呢啲人。嗌晒嘢食，我同美仪走，我话‘Belinda（韩君婷），我同美仪埋咗单喇。’佢个样突然间唔相信咁样！我未见过呢个样，好似话‘乜原来有人会请我食嘢嘅咩？’我就系凭佢呢个样就觉得，可能佢身边好多人吹捧佢……佢摆个牌头太犀利，令到佢都好难落返嚟。”

引李曾超群廖伟雄做例子　曾志伟一句话令灿神落泪

之后梁思浩引述李曾超群与“灿神”廖伟雄的故事，指自己很欣赏二人，李曾超群生意失利，70几岁时全世界都以为她欠债4000多万必然会申请破产，结果她却没有：“佢可以对住所有人讲，所有我嘅债仔，唔使担心，我用我余生嘅力不停揾钱还返俾你，我唔会宣布破产！做人要承担，我输咗，我认，佢后期喺内地煮饭，七年还返晒4000万俾人！”至于灿神，则因投资失败破产，转战马来西亚做饮食。思浩与兆尊多年前去当年拍《奖门人》系列节目，完骚后曾志伟拉大队去对方餐厅撑场：“就系全部几十人去撑阿灿！𠮶时佢卖紧叉烧，我睇住阿灿见到我哋几十个艺人嚟撑佢，眼泪流晒出嚟，佢净系一句，奖门人话‘唔怕啦！跌低咗，慢慢行返上去！’”

以灿神翻身勉励低谷艺人　梁思浩寄语输咗就要认

思浩认为灿神的优点就是不怕告诉大家自己失败，且有交带、有担当：“佢话俾人听佢破咗产，‘大家俾个机会我，我慢慢一步一步行返上嚟！’你睇住呢个人呢几年，一步一步行，行得几好！佢都有个岁数，有次佢争啲中风，佢话唔俾自己中风，要慢慢由逆境行上嚟，如果而家呢铺冧咗，我就对唔住曾经帮过我嘅人，我觉得好感动！佢呢个岁数都得，点解Vinci（王贤志）唔得？点解张致恒唔得？个个都得啦！佢跌低𠮶时年纪都好大，人哋一样翻到身。”二人讲到当年阿灿在娱乐圈是“顶流”，演出及代表作不断，但一样能坦然面对失败、谷底翻身：“佢以前顶流咁样落嚟都翻到身，你哋点会唔得？佢真系叻呀！连啲债主后期睇到佢努力，见到阿灿真系得，都话‘不如你争我啲钱个投资返落去。’”最后，思浩寄语：“输咗就要认，唔好再死撑！”他认为人生必然有高低，身处低潮也不应逃避或怯懦。