江嘉敏（Kaman）日前现身好友黄嘉乐的验车真人骚宣传活动，受访时除了分享拍摄HOY处境剧《你的保安 李宝安》的趣事、对剧集被指对撼旧东家《爱．回家之三代同糖》的想法，以及分享去瓦努阿图的旅游感受外；亦回应近日网上的狙击，先是指她早前现身马场，被指衣著性感兼“弹弹吓”钓金龟，之后post新相又无辜被批评“绿茶味浓”及质疑P图等，对此她一一大方回应，还原“弹弹吓”真相，指当日其实是因为首次买马就赢得第三，开心得手舞足蹈，不过最终发现食“诈糊”因为冇揿掣落注。对于身旁被网民形容为“金龟”的叔叔，她严正澄清关系，否认有发展空间，笑言：“啋！我哋成班认识，佢睇住我大，auntie喺隔篱㗎！唔明点解镜头唔影住auntie，你哋唔好咁样啦！”更直言认识与对方女儿也相识多年，直呼冤枉。至于被指绿茶及炫富晒命有新电话，她不讳言：“我以前系用iPhone 11嚟㗎咋，我有收到message直程话我炫富，用iPhone炫富？咁如果系，香港全部都有钱人啦！”

《你的保安 李宝安》被靓仔包围：可能导演觉得我Dry

讲到黄嘉乐经过两个月训练，已正式成为一位合格的验车师傅，江嘉敏透露自己都有份客串其真人骚短片，预告会找嘉乐验车：“佢已经学有所成，我真系约咗佢去验车，我自己架车都揸咗有十零年，所以一路都想换车嘅，最近都睇咗几架，有啲心水㗎喇，所以就约咗嘉乐去验车。”近日Kaman有份参与HOY处境剧《你的保安 李宝安》拍摄，从预告所见，她跟Meaning王耀宏颇多对手戏，她透露与李尚正、妹头、叶振弘Marco也多：“导演可能觉得我dry啩，俾晒啲靓仔我，仲要全部都系小鲜肉嚟，都几开心兴奋。”她指自己角色“小忌廉”是老板的女秘书，但被保安以为是老板女友，其任务其实是潜入保安室监察众人工作，更作势问：“我见到李宝安最近喺threads偷懒㖞！楼又唔巡，走去玩threads㖞李宝安，我话畀我老板知！”

HOY处境剧未播先添食　回应对撼旧东家：唔同主题冇得比较

Kaman说剧集一直仍然开工中，早前何爵天透露剧集未开播已添食，Kaman都知道消息，但就不清楚加开集数：“我知系过咗20集，因为之前开工嘅时候，剧本仲有写住系第几集，而家我收剧本系冇写第几集，张通告都冇写，所以都几秘密，我自己作为剧里面演员我都唔知！”早前HOY的threads admin出post问大家想8点还是9点半播，结果大比数网民支持8点播直接“撼”《爱．回家之三代同糖》，作为前无线艺人，Kaman认为：“其实系唔同主题嚟㗎㖞，冇得咁样去比拼嘅，因为大家可能用嘅人又唔同，故仔又唔同，好难咁样去比较，咁样对大家都唔公平。”她指现时科技重温，可以上网重温，所以可以两个台都睇：“我以前公司有盒子㗎嘛，我而家都仲系会员，点会睇唔返呀？”

瓦努阿图旅行睇火山去土著部落　半个月近乎断网反而更快乐

此外，Kaman近日去了冷门国家瓦努阿图，原来是应当地旅游局邀请拍摄旅游节目，她直言最初都有点担心“有伏”：“我话会唔会卖走我㗎？因为我身边冇一个朋友系有去过呢个地方㗎。”不过做了资料搜集后她接受邀请，发现不枉此行，又睇火山、看海、深入土著部落：“我哋𠮶日系Lucky日子，平时系一级嘅活跃程度，冇乜熔岩，我哋𠮶日系二级，你会见到啲熔岩喷喺你眼前，见到熔岩喺你眼前喷起，呢样嘢非常满足！同埋个风向系咁样（向外）吹，所以硫磺、沙尘、全部往晒𠮶边吹，我哋完全冇事，个trip都几开心。”香港人认识瓦努阿图，因为以前移民广告说“瓦努阿图，我想住嘅地方”，Kaman经过今次后，觉得当地虽然不算先进，但以大自然景观等角度去看，确实是退休的好选择，又透露该半个月电话讯号差，反而更快乐：“我觉得去到𠮶边个人反而快乐咗，啲人话瓦努阿图系一个快乐嘅国家，我觉得系真！都收唔到WhatsApp，睇唔到人哋点样去烦你，真系㗎！玩少咗IG、玩少咗Facebook，令到个人会开心啲呀真系。”

还原马场弹弹吓钓金龟真相：以为我买𠮶只马跑第三

不过返到香港，Kaman即卷入是非，自马场事件开始频频被网民狙击，先讲马场事件，由于有片段影到Kaman身穿低胸连身短裙现身看台，被捕捉到“弹弹吓”手舞足蹈一幕，而当时身边有位中年男士，网民就指她是献媚钓金龟。Kaman大方地逐样解释，先指衣著是尊重场合，再为“弹弹吓”解画：“都要着得靓靓嘅，马场有一个衣着嘅规限，不能着牛仔裤、短裤，好似我今日嘅衣着一定去唔到马场㗎喇，有一个基本穿着要求，我都系尊重场合。”她再续说：“至于弹弹吓！讲起我就嬲呀，点解会弹弹吓呢？因为我支持𠮶只马马，小赌就怡情，玩吓，平时我都好少，我冇乜呢方面嘅运，𠮶次买𠮶只马马，佢一开闸跑尾二，系咪嬲先？后尾冲刺嘅时候我哋就成班朋友喺度话，我哋买𠮶只马马究竟跑第三定第四？点解我弹弹吓？因为我confirm咗佢跑第三，咁我系咪有钱钱分先？然后原来我冇揿到confirm！冇赚到钱！我人生第一次以为自己买马赚到钱，哗，四位数，十几倍！我以为有钱赚，但系原来我冇揿到掣⋯⋯点解我弹弹吓？‘哗！我跑第三！’咁嘅意思，跑第三，有钱返，后尾段片其实系冇影到落去，我系即刻喺手袋里面攞咗部电话出嚟，睇吓自己买咗几多钱，原来冇揿掣。”

澄清身旁叔叔非“金龟”　对方夫妇睇住自己大：我系世姪女

今次输经验，她说可能“啲钱唔属于我”，还是继续努力工作算数。至于身旁叔叔被指是“金龟”，Kaman澄清：“唔好咁讲，我哋成班都系朋友，认识嘅认识嘅，唔好咁样。”而被问到会否有发展空间，她反应甚大、斩钉截铁表示不可能：“啋！你讲隔篱个Uncle？啋！我哋成班认识，佢睇住我大，auntie喺隔篱㗎！唔明点解镜头唔影埋auntie，你哋唔好咁样样啦！睇住我大㗎……喺隔篱，我系世姪女嚟㗎，人哋个女都识我㗎。”

自拍被批绿茶兼P图　否认以iPhone炫富：我以前用11咋

至于近日用新电话自拍，她说：“唔知点解成日影到个头咁大🥹系我唔熟部电话，定我个头真系大咗啊😳😱”之后，竟被网民截图大造文章，指她的帖文绿茶味浓，一方面炫耀新电话，一方面想人赞自己靓，她在访问中笑回：“绿茶养生㖞！”对于网民说她相中样貌不同，指她“一系P咗、一系整咗”，她反问：“你觉得呢？”并高EQ回复：“话我整咗，即系话我靓，咁都开心嘅，开心事嚟。但系讲起P图呢样嘢，一定会P相，暗疮、光暗、P色，而家社会有边个唔P？但𠮶张相我真系唔明我点解完全唔同咗样，因为我换咗新电话，我啱啱同佢哋影相，全部人都唔同样，唔系净系我，所以我系未适应到新电话，因为我以前系用iPhone 11嚟㗎咋，我有收到message直程话我炫富，用iPhone炫富，咁如果系，香港全部都有钱人啦！用iPhone就系炫富？我未玩得掂个iPhone啊真系。”

少玩Threads免受影响　接受批评惟不接受攻击家人

讲到上述评论主要来自Threads，Kaman坦言自己其实少睇，当初是客户想多一个宣传平台，所以才开Threads账户，她坦言：“我知道我个人就比较易受影响嘅，可能好随便一句‘你好丑样’，我以前都会唔开心，既然自己控制唔到人哋讲咩嘅时候，不如就控制自己，唔好睇，咁个心情咪唔会咩。但系香港有言论自由，返工压力大，咪上网发泄吓，都明白嘅，可能讲一两句OK，但系唔好玩到人身攻击，佢哋都系话我肥咗𠮶啲啫。（记者：肥咗咪人身攻击啰？）每个人观点唔同，可能有人觉得我肥咗丑样咗，我觉得呢啲冇乜所谓，但系如果佢对人身攻击，闹埋我屋企人，呢啲我就不能接受。”